Kati Struckowa, społnomócnjena za serbske naležnosće Zhorjelskeho wokrjesa, je wčera na posedźenju wokrjesneho sejmika radźićelam rozprawu podała a jich napominała, so za zachowanje serbskeje rěče a kultury angažować.

Zhorjelc (AK/SN). Jako wažny přikład za zdźerženje a wuwiwanje rěčnych rumow mjenowaše Kati Struckowa Němsko-serbski šulski kompleks w Slepom. W minjenym šulskim lěće je tu 183 wot dohromady 294 šulerjow wyšeje šule serbšćinu po koncepće 2plus wuknyło. To je 62 procentow. „Štyrjo wučerjo a šulska asistentka su maćernorěčni“, wona wuzběhny a doda: „Za pozitiwne wuwiće w centrumje mamy so wučerjam kaž Janej Hrjehorjej, Sandrje Stelzer a Petrje Rübesamowej dźakować“. Jědnaće w Slepjanskej gmejnje skutkowacych kubłarkow ma rěčny certifikat A1 za serbšćinu. Cyłkownje wokomiknje 40 kubłarkow w Serbskim kulturnym centrumje Slepo serbsce wuknje, społnomócnjena dale informowaše. „Podpěru dóstanu kubłarki ze stron Rěčneho centruma WITAJ“, wona přispomni.