Astrocentrum Łužica ma mjeztym serbske zjawnostne dźěło. A kak wo swětnišću a jeho wuslědźenju rjenje serbuješ, pokaza młody wědomostnik zajimcam we Wojerowskim domje Domowiny.

Wojerecy (SN/mb). „Najlěpši rěčny kurs mojeho žiwjenja“ je dźensa 27lětny Jan Winša z Lubija tři lěta na Drježdźanskej Techniskej uniwersiće dožiwił – serbšćinu pola Lubiny Hajduk-Veljkovićoweje. Doktorand na Instituće za jadrowu a dźělčkowu fyziku přednošowaše wčera w „Rěčnej swětłowni“ županki Gabriele Linakoweje pod hesłom „Z Łužicy k hwězdam“ wo natwarje Astrocentruma Łužica a prašenjach kosmosa. Rěčna motiwatorka Marija Šołćic je młodeho muža přeprosyła.