Šulerjo 11. lětnika Budyskeho Serbskeho gymnazija a šulerjo Sportoweje šule Altenberg zetkachu so kónc meje na hrodźe Colditz, zo bychu zhromadnje pla­nowu hru POL&IS hrali. Zetkanje je zwjazkowa wobora organizowała. W simulaciji smědźachmy so jako statni, zakitowanscy a hospodarscy ministrojo dźesać wšelakorych regionow swěta wuspytać. Hač bě to wikowanje, diskutowanje abo dźerženje narěčow – šulerjam je so wšitko derje poradźiło. Woni dyrbjachu mjez druhim z wliwom medijow, ale tež z njestatnymi organizacijemi kaž Greenpeace wobchadźeć a wotpowědnje reagować. Ale tež problemy kaž wójny, hłód a nuza abo samo piraterija w Africe mějachu so rozrisać, dźiwajo stajnje na materielne zastaranje ludnosće. W někotrych krajach nasta we wobłuku simulacije sylny rozmach. Druhe kraje bywachu porno tomu dźeń a chudše. Hra bě potajkim chětro realistiska. Tež hdyž bě wotběh druhdy trochu napinacy, akte­rojo problemy swěta w simulaciji wuspěšnje rozrisachu. Tuž so šulerjo z dobrej naladu a nowymi nazhonjenjemi domoj nawróćichu.