Policija (20.08.24)
Dwórnišćo so paliło
Čorny Chołmc. Swědcy su w Čornym Chołmcu njedźelu wječor wobkedźbowali, zo po zdaću zamyleny muž na kolijach přebywa, a policiju zazwonili. Na to je so Rumunjan do twarjenja dwórnišća podał a tam ležace wotpadki zapalił. Tak je woheń wudyrił. Policisća 56lětneho blisko zachoda do twarjenja namakachu a z kura wućahnychu. Wuchowanska słužba je lochce zranjeneho zastarała. Po tym su jeho zastojnicy zajeli. Dalši ludźo tón čas na dwórnišću byli njejsu. Rumunjan je po zajeću jednu nóc pola policije přebywał. Po wukazu statneho rěčnistwa su jeho póndźelu zaso pušćili. Wěcna škoda na dwórnišća wučinja něhdźe 5 000 eurow. Kriminalna policija pad přepytuje.
Pomoc, hdyž widźiwosć zhubiš
Wojerecy. Brigitty Reimannowa měšćanska biblioteka we Wojerecach přeprosy jutře, štwórtk, 22. awgusta na akciski dźeń pod hesłom „Rada a pomoc při zhubjenju widźiwosće“. Tam poskića fachowcy potrjechenym a přiwuznym wot 10 do 13 hodź. radu a pomoc. Impulsowy přednošk zaběra so z temu „Widźu hinak hač ty. Žiwi być ze zbrašenjom. Što to rěka?“ Wot 11 hodź. je indiwiduelne poradźowanje móžne. Zajimcy a potrjecheni móža wšelake pomocne srědki k widźenju wuspytać. Dale zhonja wo móžnosćach podpěry, prawniskich a financnych narokach, spěchowanju na dźěłowym městnje a kubłanskich poskitkach. Biblioteka informuje wo nowej, darmotnej dalokowupožčowarni Němskeho centruma za bjezbarjerowe čitanje. Zastup na zarjadowanje je bjezpłatny.
Wobydlerski forum
Kontrowersa Klětnoho dla
Diskusija wo rozšěrjenju biosferoweho rezerwata
Hamor (AK/SN). Po kontrowersnej diskusiji je so wjetšina čłonow Hamorskeje měšćanskeje rady přećiwo rozšěrjenju biosferoweho rezerwata UNESCO Hornjołužiska hola a haty na wjes Klětno z parkom rozsudźiła. Wokolina porno tomu do rezerwata słuša. Dźewjeć radźićelow je namjet wotpokazało, šesćo su jemu přihłosowali a třo su so hłosa wzdali. Próstwa gmejnskeho radźićela Thomasa Stenzela z Klětnoho na spočatku posedźenja, temu na přichodne zeńdźenje přestorčić a znowa wobjednać, nańdźe pola sydom Hamorskich radźićelow přihłosowanje, wosmjo so tomu spřećiwjachu a dwaj so hłosa wzdaštaj.
K jubilejej wubědźowanja přewjedli
Wohnjowa wobora z Łupoje pola Radworja zhladuje lětsa na 100lětne wobstaće. Minjeny kónc tydźenja su wobornicy jubilej z hosćimi a wubědźowanjemi hódnje woswjećili.
Łupoj (SN/BŠe). Wohnjowa wobora je za žiwjenje we wjesnych kónčinach njeparujomna. Předewšěm čestnohamtscy wobornicy tam wěstotu zasadźenja zaručeja. We Łupoji pola Radworja je tomu 100 lět, zo bu wohnjowa wobora tam załožena. Tohodla su wustajeńcu wo stawiznach wobory w tamnišej gratowni zestajeli. Minjeny kónc tydźenja witachu we Łupoji mjenujcy wjele hosći, kotrež chcychu jubilej z wjesnjanami woswjećili. Pjatk wječor přichwatachu zastupjerjo wohnjowych woborow z wokoliny a čłonam z Łupoje gratulowachu. Tež komunalni politikarjo běchu składnosć wužili, so wobornikam za jich čestnohamtsku pomoc dźakować.
„Best of“ zazběh pokročowanja „Wjesołeje póndźele“
Budyšin (SN/bn). Po „wulkim naprašowanju“ wotmě so wčera na Budyskim Hłownym torhošću „lětnja edicija“ akcije „Happy Monday Bautzen – Wjesoła póndźela Budyšin“ jako tak mjenowany best of dohromady dźewjeć kulturnych zarjadowanjow. Přinoški běchu nalěto cyłkownje něhdźe 3 000 wopytowarjow na wjacore naměsta sprjewineho města přiwabili. Moderatorojo Katja Gerhardi, Tim Heilmann, Madleńka Šołćic a Julian Nyča mjenowachu něhdźe třiapołhodźinski program „jónkrótnu wosebitu akciju“, připowědźichu pak zdobom pokročowanje. W tym zwisku wuzběhnychu, zo přizwolichu projektej we wobłuku wubědźowanja Němskeje załožby za angažement a čestne zastojnstwo „Machen 2024“ znajmjeńša 5 000 eurow.
Diskusije bywaja wótriše
Radźićelki a radźićeljo noweho wokrjesneho sejmika su so wčera prěni raz schadźowali. Dwě nowej stronje sej swój puć do sejmika namakaštaj: BSW a Swobodni Saksojo.
Krótkopowěsće (20.08.24)
Dźěłarnička zahajena
Miłoćicy. Při Miłočanskej skale bu wčera mjeztym hižo 18. mjezynarodna rězbarska dźěłarnička zahajena. Dohromady dźewjeć wobdźělnikow mjez druhim z Němskeje, Kolumbiskeje, Demokratiskeje republiki Kongo a Turkowskeje chce w přichodnymaj tydźenjomaj twórby ze zornowaca, drjewa a metala zhotowić. Wudźěłki prezentuja 1. septembra na swjedźenju za swójby, zajimcy smědźa tež cyły proces nastawanja wuměłcam přez ramjo hladajo sćěhować.
Myto předewzaćelej
Budyšin. Faza nominowanja wuspěšneho Hornjołužiskeho myta za předewzaćelow je zahajena. Mjeztym 29. raz pyta Marketingowa towaršnosć Hornja Łužica-Delnja Šleska w nadawku Budyskeho a Zhorjelskeho wokrjesa wusahowaceho předewzaćela. Požadanja měli akterojo hač do 17. septembra zapodać. Na internetnej stronje www.ol-up.de je wotpowědny formular podaty.
„Hrádek“ ponowjeny
Brjody w žołdku – přičiny a symptomy (I. dźěl)
Nic jenož na wsach, ale tež w městach maja mnozy doma skót. Něchtóžkuli nimo toho drobny skót plahuje. Wšitcy so wo strowotu swojich lubuškow prócuja. K tomu přinošować chce naša serija z pokiwami z weterinarneje mediciny. (39)
Běži-li požiwanje kaž na štryčku, je organizm strowy. Wězo njepřitrjechi to w kóždym padźe. Ale kaž je čłowjekej začuće w brjuše dobry radźićel, tak so často tež pola skotu pokaza, je-li schorjeł, zo jemu něšto ćežko w žołdku leži.
Spočatne zahorjenje w žołdku móže so hač k hłubokemu brjodej (Geschwür) wuwiwać. Přičiny nastaća brjodow su wšelakore. Formy brjodow rozeznawaja so mjez družinami zwěrjatow, runje tak kaž jich wuskutki.
Typiske wonkowne přičiny, kotrež přez picu brjody w žołdku wuskutkuja, su na př.: wótre abo škropawe dźělčki, parazity, medikamenty abo tež jědojte wabjenki (Giftköder).
Najprjedy dźěło a potom party
Policija (19.08.24)
Njezbožo ze štyrjomi mortwymi
Fischbach. Na B 6 w Arnsdorfje, we wjesnym dźělu Fischbach, je sobotu popołdnju k ćežkemu wobchadnemu njezbožu dóšło. Při přesćehnjenju je Audi Q7 z VW Passatom hromadu zrazył. Audi na to do štoma zrazy a so na druhim boku jězdneje přewali. 61lětnu sobujěducu sanitetarjo ćežko zranjenu do chorownje dowjezechu. 64lětny šofer awta a třo sobujěducy pak na městnje njezboža wudychachu.
