Gmejna chce pomnikaj na Fulkec hórce ponowić dać

Chrósćicy (JK/SN). Na Fulkec hórce w Chrósćicach dopominatej pomnikaj na 2 000 padłych pólskich wojakow, kotřiž su při wojowanjach na kóncu Druheje swětoweje wójny blisko Chrósćic swoje žiwjenje přisadźili. Pomnikaj tam hižo wjacore lětdźesatki stejitej. Jedyn je z čerwjeneho porfyra, wón bu w lěće 1967 postajeny. Z pólskim, serbskim a němskim napisom so na nim na padłych spomina. Tamny, šěsć metrow wysoki z betona w formje křidła worjoła, bě pólski twarski zawod Krakbud w lěće 1980 natwarił. Wón bu składnostnje 35. róčnicy wuswobodźenja wot fašizma swjatočnje wotkryty.