Tež pola Módreje Adrije za Astrocentrum Łužica hłuboko toča

Chróst (UM/SN). Ćežku techniku zasadźa bórze při Módrej Adriji blisko Chrósta, wjesneho dźěla Wulkeje Dubrawy. Wot 15. awgusta chcedźa tam za podzemski labor Astrocentruma Łužica (DZA) do zemje točić, zo bychu wjac wo tym zhonili, kotre woršty so pod powjerchom zemje chowaja.

Ale što ma so přichodne tydźenje a měsacy pola Chrósta dokładnje stawać? „Jako prěnje pruwujemy, po kotrych pućach móžemy k městnu přijěć, kotrež je za točenje postajene. Jeli trjeba, dyrbimy sej prowizoriski puć natwarić“, rozłoži projektny koordinator DZA Mike Lindner. Po tym přiwjezu tam kontejner a přizamknu jón k wodowej a milinowej syći. Hakle potom přijědźe kran, kotryž dźěru do zemje toči. „Točimy hač do 250 metrow hłuboko“, geologa dale rozprawja. Wutočeny material hnydom na městnje přepytuja, zo bychu zwěsćili, kak kruty je a kelko wody móže přiwzać. Pozdźišo jón wědomostnicy w laborje dokładnišo přeslědźa.