Nowe Město (JoS/SN). Wosebity jubilej woswjeća njedźelu, 24. awgusta, w hosćencu „Hamor“ w Nowym Měsće, wjesnym dźělu gmejny Šprjewiny Doł. Před 300 lětami dósta hosćenc prawo piwo warić a předawać. Při tutej składnosći přeprošuja za tydźeń na dujersku hudźbu z orchestrom „Łužiska brunica“, na samopječeny tykanc a kofej kaž tež na zymne napoje.
Hosćenc „Hamor“ je wot lěta 1658 přeco swójba wobhospodarjała. Wotpowědny zapisk namaka so w krajnych wizitaciskich aktach Sakskeje. Prěni korčmar bě wěsty Adam Jäckel. Wón bě předchadnik dźensnišeje korčmarjec swójby. Bywše pomjenowanje „Jäckelsche Schänke“ drje so na njeho poćahuje. Před 30 lětami pisaše wobydlerka Noweho Města Hanne-Lora Krawcowa wjesnu chroniku. Wona je tehdy w mnohich archiwach a bibliotekach za stawizniskimi zapiskami slědźiła. W starej ležownostnej knize namaka při tym zapisk z lěta 1725, zo smě so w hosćencu piwo předawać. Wo tym drje je hibićiwa chronistka korčmarjec swójbu informowała, za swoju chroniku pak so z tutym dźělom wjesnych stawiznow dale zaběrała njeje. Čehodla, to bohužel znate njeje.
