Zo bychu so ludźo před wohenjemi škitali, su před něhdźe połdra lětstotkom tež w Hornjej Łužicy wohnjowe wobory załožeć započeli. W našej lětnjej seriji chcemy někotre z nich předstajić a jich stawizny rozłožić. (15)

„Ručna pryskawa w Hermanecach pochadźa z lěta 1873. Tamniše ryćerkubło je ju při hašenju zasadźiło. Najskerje hižo do toho a po tym hač do lěta 1934 běchu wobsedźerjo ryćerkubła za wohnjoškit ­zamołwići“, měni Daniel Zieger. 39lětny je wot 2007 nawoda dobrowólneje wohnjoweje wobory Hermanecy-Wysoka. W aprylu 1934 je ju 18 kameradow załožiło. Posledni nastork bě woheń w młynje.