Gmejnska rada nastupajo prózdnu gmejnsku kasu přewšo wužadana

Pěskecy (JK/SN). W domje Pěskečanskeje wohnjoweje wobory je so wčera wječor zešła Njebjelčanska gmejnska rada. Mjez druhim steješe na dnjowym porjedźe informacija wo stawje lětušeho hospodarskeho plana. To samo na sebi njeje problem, ale Njebjelčanska gmejna schwaleny hospodarski plan dotal nima. A tež hewak z gmejnskimi financami derje njewupada. Gmejnska kasa pokazuje ­tuchwilu minus 312 000 eurow. Tutón minus by so lětsa hišće z dochodami z přemysłoweho dawka a z předanje dźěla gmejnskeho wobsydstwa wurunać hodźał. Klětu pak tutej móžnosći wjace njebudźetej, a wjesnjanosta André Bulank (njestronjan) liči potom z deficitom 1,46 milionow eurow.