Drěwcy (WL/SN). Najpozdźišo wot spočatka 2000tych lět su Drěwcy ze swojimi 110 wobydlerjemi we Łazowskej gmejnje daloko za swojimi mjezami znate. Wo­srjedź wsy dźě leži srjedźišćo serbskeho sydlenskeho ruma Sakskeje, woznamjenjene z błudźenkom ze zornowca a lipu. Zwěsćił, wuměrił a kartěrował je tole čłon Sakskeho krajneho sejma, měrjenski inženjer Marko Šiman, štož je MDR-Wuhladko we wusyłanju 28. meje 2003 dokumentowało. Wot toho časa je Marko Šiman rady widźany hósć we wsy, ­byrnjež Drěwcy wot jeho wólbneho wo­krjesa chětro zdalene byli.

Tak bě to tež njedawno składnostnje tradicionalneho rybarskeho swjedźenja a 25. wubědźowanja we wohnjowobornym sporće wo wosebity pokal w formje rapaka z keramiki. Pjeć mustwow so tónraz wobdźěli. Na kromje wubědźowanišća pohonjowaše je wjele wjace přihladowarjow hač maja Drěwcy wobydlerjow. Jako najspěšniši wopokazachu so Salowčenjo před kameradami z Debric/Wysokeje a z Drěwcow. Štwórte městno wobsadźichu Drěwčanske žony a pjate młodostni z Hermanec.