Łaz (AK/SN). Z Dnjom wotewrjenych duri 20. septembra a ze swjedźenskim tydźenjom wot dźensnišeho hač do pjatka spomina Łazowska wyša šula na swoje 70lětne stawizny. Z wuwićom kubłanišća je so mjez druhim Lothar Lange zaběrał, kotryž bě tam wot 1956 hač do 1992 ­matematiku, fyziku a astronomiju wuwučował.

Šula je wot 1953 hač do 1955 jako prěni šulski nowotwar w Sakskej po Druhej swětowej wójnje nastała. Hanno Gün­ther, po kotrymž ju tehdy pomjenowachu, bě antifašist. 1956 natwarichu sportownju. Dalši přitwar slědowaše 1965. Poněčim zarjadowachu fachowe kabinety. Kónc 1950tych a spočatk 1960tych lět je tam wurjadna lochkoatletka Rosemarie Ackermann (rodźena Witschas) do šule chodźiła. 1974 bu wona we wysokoskoku z 1,95 metrami europska mišterka a 1977 přewiny wona jako prěnja atletka swěta wysokosć dweju metrow. Tež po tym je wona Łazowsku šulu hdys a hdys wopytowała, so Lothar Lange dopomina.