Gmejnska rada chce milinowemu parkej dale zadźěwać
Łaz (AK/SN). Łazowska gmejna twar milinowych wětrnikow mjez Běłym Chołmcom a Hórnikecami dale wotpokazuje. Na zašłym posedźenju gmejnscy radźićeljo wozjewichu, zo njemóža pismo prawniskeho dohladowanskeho zarjada z 29. januara akceptować. Woni měnja, zo běchu wobzamknjenja gmejnskeje rady wo wotpokazanju wětrnikow njeprawniske.
Radźićel Udo Steglich (Lěwica) je nětko gmejnskej radźe nowu próstwu zapodał. Po jeho měnjenju dyrbja w měrcu 2024 mjez gmejnu a předewzaćom Sabowind wotzamknjene zrěčenje přepruwować. „Mjez druhim měło so zwěsćić, kak su tehdyšu gmejnsku radu do wudźěłanja zrěčenja integrowali. Wuslědki pruwowanja měli w juniju předležeć.“, tak Steglich.
