Dźensa často wo tym słyšiš, zo dyrbja hosćency zawrěć, dokelž dosć personala nimaja abo dokelž so dalšich přičin dla wobhospodarjenje hižo njezadani. We Wulkej Dubrawje porno tomu za něšto dnjow nowy hosćenc wotewru, ale z trochu hinašim konceptom, hač zwučene.
Wulka Dubrawa (UM/SN). Kóždy dźeń ma Sven Petasch „Lěsny hrodźik“ w dwójnej křiwicy na kromje Wulkeje Dubrawy do směra na Kamjenej před wočomaj. Runje napřećo su drjewowe dźěłarnje P&M, kotrychž jednaćel wón je. „Mje je bolało, jako widźach, zo je dom prózdny a rozpaduje“, předewzaćel powěda. Před pjeć lětami je wón twarjenje při nanuzowanym přesadźowanju přewzał. Wón chcyše gastronomiju z přenocowanjom natwarić.
