Nerlichec wobchod za płaty w Budyšinje wobsteji 75 lět
Budyšin (CS/SN). W płatowym wobchodźe na Budyskej Karla Marxowej, kotryž wjedźetaj Hella a Ronny-Enrico Nerlich, je Monika Cyžowa zaso raz něšto kmane namakała. Trochu běłeho płatu kaž tež módro-běłu mustrowanu bortu je wona tam wóndano kupiła. Monika Cyžowa je wobsedźerka drastoweho fundusa w Nowej Jaseńcy. Nerlichec płatowy wobchod wosrjedź Budyšina je za nju a dalše šwalče, kotrež serbsku narodnu drastu šija, hižo wjele lět dobra adresa. Přetož wobsedźerjej přeća swojich kupcow derje znajetaj. Stajnje spytataj wšo wobstarać, štož sej ludźo přeja. To njeje jednore. Druhdy dźě producenća prosće dźěło zastaja. Tak maš mjeztym hižo problemy při wobstaranju tak mjenowaneje chošćoweje borty (Besenborte). Tajka přišije so deleka při dołhich suknjach, zo njeby so płat wobškodźił, hdyž wón po zemi šmóra. Lěpša je situacija z trodlemi (Fransenborte). Jeje dla wudźeržuja Nerlichecy kontakt k manufakturje w Rudnych horinach, hdźež tule bortu za serbsku drastu zhotowjeja.
