Budyšin (SN). Towarstwo Cyrila a Metoda (TCM) přeprošuje wšitkich zajimcow na dalšej wjerškaj Chróšćanskeje wosady a gmejny w tutym lěće: na pasionsku hru a kongres Europasion. Po dźesaćlětnej přestawce předstaji něhdźe 250 sobuskutkowacych wot 5. do 14. septembra pjeć króć pasionsku hru w serbskej rěči na farskej łuce w Chrósćicach. Kruch z titulom „Sćěhuj mje“ staj Pětr Zahrodnik a Marcel Hoza napisałoj, režiju ma dźiwadźelnik Němsko-Serbskeho ludoweho dźiwadła Marian Bulank na starosći. Za wšitkich němskich wopytowarjow poskićuja zamołwići simultany přełožk z wjacorymi rěčnikami we wšelakich rólach. Nowostka je Wótčenaš w Jězusowej maćeršćinje aramejšćinje, kotryž so sobuskutkowacy a hosćo zhromadnje pomodla. Tekst w serbskim zwukowym pismje namakaja zajimcy na internetnej stronje www.posol.de/pasion-2025, hdźež su tež terminy předstajenjow a móžnosće wobstaranja zastupnych lisćikow wozjewjene. Dźěći hač do staroby 16 lět změja darmotnje zastup, młodostni hač do 18 lět płaća 10 eurow, wšitcy druzy 17 eurow zastupa.