Dohromady 1 800 holcow a hólcow na swjedźenskim ćahu wobdźělenych
Kamjenc (MČu/SN). Kóžde lěto wokoło swjateho Bartrołmja 24. awgusta přeměni so Kamjenc na jónkrótne morjo kćenjow. Pod nawodom lětsa krónowaneje Kamjenskeje kralowny kćenjow Lucije I. a nawodow měšćanskich šulow ćehnje pyšny ćah šulerkow a šulerjow z nutřkowneho města Kamjenca do Boršće. Wjace hač 1 800 dźěći a młodostnych z mjeńšimi a wjetšimi chorhojemi, z korbikami połnymi kwětkow kaž tež pletwami z kwětkow je so póndźelu a štwórtk na tak mjenowanym wućahu wobdźěliło.
Lětsa wšak je swjedźeń wosebje wuznamny: Najwjetši šulski a domizniski swjedźeń po wšej Sakskej swjeći 180. róčnicu zawjedźenja swjedźenskeho ćaha. W lěće 1845 běše jón Gottfried Leuner, direktor tehdyšeje Měšćanskeje a byrgarskeje šule při cyrkwi swj. Hany (dźensa je to Kamjenska 1. wyša šula), koncipował a organizował. Ze swjedźenjom składnostnje 800. róčnicy prěnjeho naspomnjenja města maja Kamjenčenjo lětsa potajkim njezapomnite swjedźenske lěto.
