Tež lětsa so do wałporneje nocy zaso mnozy młodostni na serbskich wsach kaž w Radworju, we Wotrowje, w Chrósćicach abo w Serbskich Pazlicach zhromadźichu, zo bychu swoje hromady chodojtypalenja stražowali.

Radwor (VaŽ/SN). W poslednich dnjach apryla je kruta tradicija, swójsku hromadu za chodojtypalenje wjacore nocy wobstražować, zo njemóhł nichtó z druhich wsow hromadu dočasa wotpalić. W Radworju rozprawjeja młodostni wo měrnych nocach. „Něhdy běchu časćišo pady, při kotrychž bu hromada hižo do poprawneho termina zapalena“, powěda Filip Kolca. Dźensa so to lědma hišće stawa. „Wjetšina młodźiny nima prosće žadyn lóšt, sej ekstra něhdźe dojěć a druhim hromadu wotpalić“, wón powěda.

Tež w Žuricach stražowachu wot 26. apryla. Tež tam młodostni wječor zhromadnje při wohenju sedźachu a so wuměnjachu. Přetož štóž zahe ze zběranjom hałzow započnje, dyrbi tež zahe stražować započeć. „Ručež prěnje hałzy na hromadźe leža, započinamy stražować“, skupina rozprawja.