„Smjerć poslednje słowo nima. Jutry bjeru nam strach před smjerću. Wona słuša k žiwjenju a twori jenož wrota k wěčnemu žiwjenju. Do toho křesćenjo wěrja.“ (dr. P. Brězan w interviewje w SN, 9. apryla 2020). Dnja 1. meje 2025 docpě dr. Pětr Brězan tute wrota k wěčnemu žiwjenju.

Pětr Brězan narodźi so 11. awgusta 1932 w Sulšecach do wulkeje Brězanec swójby, kotraž hospodarješe generacije dołho na Sulšečan młynje. Hižo w staršiskim domje nawukny dr. Brězan, zo maš za swój wšědny chlěb pilnje dźěłać a zo ći ničo wot samo do klina njepada.