Nowu regionalnu rěčnicu wutrobnje witali

Freitag, 15. Dezember 2023 geschrieben von:

Wojerecy (SN/mb). Grjekski korčmar hosćenca „Akropolis“ w starym měsće Wojerec je wčera wječor test wobstał: Na prašenje županki Gabriele Linakoweje, hač wě, w kotrej rěči so wobdźělnicy „Rěčneje swětłownje“ rozmołwjeja, wón hnydom „serbsce“ wotmołwi. A zo „jako wukrajnik“ wězo wě, zo so na wsach dokoławokoło Wojerec wjac serbuje hač w měsće samym. Tola tež tam serbšćina rozrostuje. Linakowa, něhdyša čestnohamtska społnomócnjena města za serbske naležnosće, bě z kursami serbšćiny pod nawodom Brigity Šramineje za přistajenych měšćanskeho zarjadnistwa hižo před wjele lětami našej rěči puć do zjawneho žiwjenja rubała. Wot 2019 zaruča „Rěčna swětłownja“ prawidłowne serbowanje wjetšeho kruha tež w hosćencach, zo bychu Wojerowčenjo nawrót našeje rěče takrjec live dožiwili.

Pawkojo na MENS-seminarje

Donnerstag, 14. Dezember 2023 geschrieben von:

Młodźina europskich narodnych skupin (MENS) je dalši raz na njedawny nazymski seminar přeprosyła. Tónkróć bě to w sewjernej Serbiskej, w Suboticy. Madźarojo w Serbiskej su tam hosći ze wšelakich europskich mjeńšin witali a w měsće při hranicy k Madźarskej seminar na temu tradicije přewjedli. Jako čłonojo Serbskeho młodźinskeho towarstwa Pawk smy sej tam zhromadnje z Jakubom Wowčerjom, Leticiju Frenclec a Feliciju Touvenot dojěli a serbski lud reprezentowali.

Něhdźe 50 čłonow Domowinskeje skupiny Pančicy-Kukow je so póndźelu na skupinskej adwentničce w Karstenowej piwowej stwičce wobdźěliło. Po słódnej wječeri je Katka Baierowa hodownu powědku Richarda Izelta a dalšu twórbu Jakuba Barta-Ćišinskeho wurazliwje přednjesła. Wězo tež zhromadny adwentny spěw pobrachował njeje. Foto: Marian Wjeńka

Serbscy radźićeljo so schadźowali

Montag, 11. Dezember 2023 geschrieben von:

Budyšin (SN/BŠe). Serbscy radźićeljo załožboweje rady zetkachu so zawčerawšim w Budyskim Serbskim domje na zhromadnu klawsuru. To bě wažne, wšako bu gremij w nalěću woleny a ma wjele nowych wobličow. „Rozestajachmy so ze zakładnymi dokumentami, wustawkami a spěchowanskimi směrnicami“, předsyda załožboweje rady Marko Kowar na naprašowanje wječornika zdźěli. Tohorunja rozdźělichu sej radźićeljo nadawki a ćežišća, wšako ma kóždy z nich wosebite znajomosće a zajimy. Dale dorozumichu so na wašnje dźěławosće. „Załožbowa rada je kontrolowacy organ a dźěło załožby pruwuje. K tomu słuša mjez druhim tež hospodarski plan“, Kowar wuswětli.

Rjadni zastupjerjo serbskeho ludu su Marko Kowar (předsyda Załožboweje rady), Marlis Młynkowa, dr. Susanne Hozyna, Daniel Nuk, Diana-Susanne Šejcowa a Angela Šurmanowa. K zastupowacym čłonam słušeja Michaela Hirchowa, David Kliemann, Frank Knobloch, Jan Hrjehor, Julian Brüning a Marcus Końcaŕ. Zastupjerjo serbskeho ludu wolitej zwjazkowe předsydstwo Domowiny a serbsku radu w Braniborskej.

Adwentnička znowa wjeršk była

Donnerstag, 07. Dezember 2023 geschrieben von:
Jedna z Domowinskich skupin we Wojerowskej župje „Handrij Zejler“ je ta w Spalach. Wjeršk jeje dźěła je kóžde lěto adwentnička. Je hižo z tradiciju, zo přewjedu ju stajnje krótko do prěnjeho adwenta. Tak zetkachu so skupinarjo njedawno we ­wjesnej korčmje. Po rozprawje předsydstwa wo dźěławosći cyłeho lěta dachu sej wječer słodźeć a hišće dołho při zhromadnej zabawje bjesadowachu. Foto: Lubina Dučmanowa

„... wón so přeco gratu přima!“

Mittwoch, 06. Dezember 2023 geschrieben von:

„Hdyž so we wsy za jeho skutkami prašeš, potom ći ludźo praja: ‚Franc njeje wulke hamty měł, hdyž- a hdźežkuli pak pomoc trjebaš – wón so přeco gratu přima!“ – Z tutymi słowami je čłonka mytowanskeho wuběrka Gabriela Linakowa, w swojej lawdaciji wosobinu Franca Langi wopisała. Jeho je Domowina lětsa ze swojim Čestnym znamješkom wuznamjeniła.

Wot Jana Cyža chcyše županka tójšto wědźeć

Mittwoch, 06. Dezember 2023 geschrieben von:

Budyšin (kl/SN). Adwentnička župy „Jan Arnošt Smoler“ Budyšin słuša k wokomikam Domowinskeho skutkowanja, hdźež skupinarjo hromadźe z čłonami pod třěchu župy skutkowacych towarstwow na aktiwity nachilaceho so lěta zhladuja. 35 čłonow z wosom Domowinskich skupin a towarstwow je wčera na žurlu Serbskeho domu přichwatało.

Prěni wjeršk lěta 2023 bě župna hłowna zhromadźizna w měrcu, hdźež wu­zwolichu delegaća nowe předsydstwo a nowu županku. W lěću wěnowaše so župa skerje zarjadowanjam za swójby. Předsydstwo je nastorčiło rjad přednoškow za skupiny, kotrež same hižo zarjadowanja njeorganizuja, ale serbsku rěč a zhromadnosć rady pěstuja. Koncerty wobohaćichu Domowinske žiwjenje w nalěću a nazymu w Malešecach, Radworju a w Budyšinje. Z tutej tradiciju chcedźa klětu pokročować.

Županka Leńka Thomasowa rysowaše předewzaća w nowym lěće. Župna kubłanska jězba, tak wona připowědźi, ­powjedźe hižo w aprylu do Berlina na wustajeńcu wo pčołkach a čłowjekach. Z tym chcedźa 300. posmjertniny Hadama Bohuchwała Šěracha spominać.

Malešecy (SN/AN). „Wjesołe hodźinki z Bohom“ wotměwachu so minjenu wutoru popołdnju za dźěći na Malešanskej farje raz cyle hinak. Claudija Wićazowa, katechetka wulkowosady při Lubaće ­(Löbauer Wasser), běše sej rěčneju moti­watorow Luciana Kaulfürsta, zamołwiteho za Malešanski region, a Mariju Šołćic, zamołwitu za Wojerowski region, na tamnišu faru přeprosyła.

Marija Šołćic běše na tutym popoł­dnju wosebite instrumenty z mjenom „Udu“ sobu přinjesła, kotrež wobsteja z hliny a na prěni napohlad kaž brjuchate wazy wupadaja. W běhu poł hodźiny wudebichu je dźěći z najwšelakorišimi mustrami. Wudebjene instrumenty dyrbja so hišće palić. Wokoło 3. adwenta chce Marija Šołćic je dźěćom wróćić.

Witaj-skupinya swójby podpěrać

Freitag, 01. Dezember 2023 geschrieben von:

Budyšin (kl/SN). Na prěnim městnje projektow župy „Jan Arnošt Smoler“ Budyšin w lěće 2024 steja rěč spěchowace přede­wzaća ze swójbami a Witaj-skupinami. Je chce župne předsydstwo wosebje podpěrować. Na swojim wuradźowanju wčera w Budyšinje su čłonki a čłonojo gremija wobkrućili, zo maja při tym zetkanja swójbow a spěchowanje serbskich ludowych nałožkow za faworizowanej formje.

Župa podpěruje planowany třidnjowski sympozij wo serbskich bajach. Dr. Christian Kessner z Towaršnosće Carla Gustava Junga chce jón hromadźe z partnerami w juniju 2024 w Domje tysac hatow w Stróži wuhotować. Klětušu kubłansku jězbu planujetej župje „Jan Arnošt Smoler“ a „Michał Hórnik“ hromadźe. Chcedźa přehladku „Wo pčołkach a čłowjekach“ w Berlinskim Muzeju europskich kulturow wopytać a so na slědy wuznamneju pčołarjow, Serba Hadama Šěracha a Słowjenca Antona Janše, podać.

Beno Sćapan, zastupjer župy w Zwjazkowym předsydstwje Domowiny, rozprawješe wo wuznamjenjenju za hospodarske zawody, kajkež chce Domowina za widźomnu serbšćinu mytować.

„Wupraju wulku chwalbu wšěm kursistam“

Dienstag, 28. November 2023 geschrieben von:

Dešno (SN/MG). Projekt „Zorja“, kotryž je sebi rewitalizaciju delnjoserbskeje rěče přez dospołnu imersiju do njeje jako cil stajił, traje hižo nimale 60 dnjow. Wučba rěče je kóždy dźeń znowa jara intensiwna. Wupłody jich dźěła su hižo derje­ widźeć­, kaž piše Domowina w nowinskej zdźělence. Zajimawe na projekće su drje wosebje tež najwšelakoriše motiwacije, kotrež pohnuja wobdźělnicy a wobdźělnikow delnjoserbšćinu nawuknyć: Hač rěč wšědnje na dźěle abo priwatnje na­łožować; ju zaso w swojej domiznje zakótwić;­ ju dźěćom dale dać abo samo serbske filmy produkować. „Widźomnje su wšitcy horliwi“, rěka w zdźělence dale.

Serbska debata

Neuheiten LND