Župa Budyšin: Wjerški za 2026
Budyšin (SN). Čłonojo župneho předsydstwa „Jan Arnošt Smoler“ Budyšin wuradźowachu na swojim wčerawšim posedźenju w Budyskim Serbskim domje hłownje wo klětušich předewzaćach. Kaž regionalna rěčnica Katja Liznarjec zdźěli, chcedźa 25. apryla hromadźe z dźěłarnistwom DGB literarno-hudźbne popołdnjo składnostnje 130. posmjertnin dr. Marje Grólmusec wuhotować. Mjez druhim budźe Marka Cyžowa z Lejna z dopomnjenkow wučerki a publicistki čitać.
Za serbsce wuknjacych šulerjow planuja prózdninske lěhwo w Połpicy, kónc lěćnych prózdnin wosebite zarjadowanje ze serbskimi poskitkami za šulerjow. Kubłanska jězba župy budźe zaso w septembrje a powjedźe do srjedźneje Łužicy. Adwentničku w decembrje a nalětni koncert w Malešecach tohorunja na zwučene wašnje přewjedu.
Přichodnu póndźelu přeprošuje župa w 15.30 hodź. na swoju adwentničku na žurlu Serbskeho domu. Zhromadnje z čłonami skupinow a towarstwow chcedźa na minjene lěto zhladować a při horcym winje bjesadować. Přeprosyli su sej chór Budyšin, kiž zarjadowanje wobrubi.
Domowina so z rěčnym niwowom šulerjow zaběra
Budyšin (SN/mb). Zwjazkowe předsydstwo (ZP) Domowiny so pjatk we Wuměłstwowej hali w Choćebuzu na swoje 3. posedźenje tuteje wólbneje periody zeńdźe. Wot 17.30 hodź. móže zjawnosć zajimawe temy pak tam, pak na youtube-kanalu @DomowinaBudysin přez livestream sćěhować. Na spočatku chcetaj nawodnica Rěčneho centruma Witaj dr. Beata Brězanowa a Choćebuski wotrjadnik Bernd Melcher „młodej ekscelency w delnjoserbšćinje“ zaso wosebite připóznaće přepodać. Tomu přizamknu so mjez druhim informacija wo widejowym projekće za wjelorakosć w Delnjej Łužicy a wólby mytowanskeho wuběrka třěšneho zwjazka za dobu 2026-2029. Wjeršk budźe tema „Serbske rěčne kubłanje na šulach Sakskeje“, za kotruž su cyłu hodźinu do přestawki zaplanowali.
Wšitcy za mjeńšiny we wustawje
Berlin (SN/MG). Prócowanja wo zapřijeće awtochtonych mjeńšinow do zakładneho zakonja su dale a wuspěšniše. Tole je wuslědk posedźenja poradźowaceho wuběrka za prašenja serbskeho ludu při zwjazkowym nutřkownym ministerstwje, kotrež bě so wčera wotměło. Na nje bě społnomócnjeny zwjazkoweho knježerstwa za prašenja wusydlencow a narodnych mjeńšinow Bernd Fabritius přeprosył. Nimo zastupjerjow Domowiny, krajow Sakska a Braniborska a ministerstwa so stajnje tež zapósłanče a zapósłancy zwjazkoweho sejma na posedźenjach wobdźěleja. Wčera bě jich sydom, potajkim z kóždeje frakcije zastupjerka abo zastupjer.
Župa Delnja Łužica: Nowa struktura
Předsydstwo župy Delnja Łužica je na swojim wčerawšim wuradźowanju w Choćebuskim Serbskim domje wobzamknyło, swoju dźěławosć hišće efektiwnišu sčinić.
Choćebuz (SN/mb). Kaž ze zdźělenki regionalneje rěčnicy Heike Apeltoweje wuchadźa, chcedźa strukturu dźěła načolneho gremija našeje narodneje organizacije w Braniborskej polěpšić. Kaž Apeltowa našemu wječornikej na naprašowanje wobkrući, wo tym rozmysluja, wuši kruh runja prezidijej w zwjazkowym předsydstwje Domowiny wutworić, kotryž měł so w přichodźe husćišo zetkawać. Wulke koło 13 čłonow župneho předsydstwa móhło so po tutym modelu štyri króć wob lěto schadźować. Zo bychu to konkretnje zrealizowali, chcedźa nachwilny dźěłowy wuběrk załožić, kiž namjety za změny wustawkow zdźěła a klětu na hłownej župnej zhromadźiznje jako naćisk k wobzamknjenju předpołoži. Zajimcy ze župneho předsydstwa za tajki wuběrk su nětko přeprošeni, so pola Heike Apeltoweje přizjewić.
Župa mězniki za klětu postajiła
Wojerecy (SN/mb). Čłonojo předsydstwa župy „Handrij Zejler“ Wojerecy su so na wčerawšim wuradźowanju předewšěm klětušej dźěławosći wěnowali. Kaž je županka Gabriela Linakowa našemu wječornikej wobkrućiła, chcedźa z woblubowanej „Rěčnej swětłownju“ pokročować a wšěm, kotřiž so za serbšćinu a serbsku bjesadu zajimuja, w kóždym kwartalu termin poskićić. Tež kubłanska jězba a popołdnjo za swójby so zaso wotmějetej. Nimo toho chcedźa hłownu zhromadźiznu přewjesć, zo bychu so zastupjerjo towarstwow tež bjez wólbow schadźowali.
Župa wopomnjensku taflu za Gertrud Wincerowu w Čornym Chołmcu sobu podpěruje. Wincerowa běše zamołwita za serbske naležnosće we Wojerecach, wjelelětna wjesnjanostka, wjesna předstejićerka a „mać Krabatoweho młyna“. Dalša wopomnjenska tafla ma so składnostnje 100. posmjertnin Awgusta Lapšticha, załožićela prěnjeje serbskeje ćišćernje we Wojerecach, připrawić. Wona ma być stacija planowaneje „Via Sorabica Hoywoj“, kotruž je Werner Sroka koncipował.
Dale za změnu zakładneho zakonja
Čłonojo prezidija Domowiny su so wčera na swoje 6. rjadne posedźenje w aktualnej wólbnej dobje w Budyskim Serbskim domje zešli.
Budyšin (SN). Mjez druhim přihotowachu přichodne posedźenje Zwjazkoweho předsydstwa Domowiny (ZP), kotrež wotměje so 5. hodownika w Choćebuzu, kaž ze zdźělenki rěčnicy třěšneho zwjazka Boženy Šimanec wuchadźa. Tam chcedźa młodej ekscelency w delnjoserbšćinje wosebite připóznaće přepodać, hódnoćo wuspěšne nawuknjenje delnjoserbšćiny na wysokim schodźenku nad wšědnym niwowom komunikacije.
Nowy design, nowe poskitki
Budyšin (SN). Dwójce wob lěto – raz nalěto, raz nazymu – přeproša předsyda Domowiny na wuradźowanje ze župankami a županami, předsydkami a předsydami čłonskich towarstwow kaž tež ze zastupjerkami a zastupjerjemi zarjada třěšneho zwjazka. Ćežišćo wčerawšeho zetkanja w Budyskim Serbskim domje bě planowane nowowusměrjenje Domowiny nastupajo jeje zjawne wustupowanje. Nawodnica za wizuelnu komunikaciju a design Veronika Bjarš předstaji wuslědki dźěłarničkow wo „wonkownym wobrazu Domowiny“, kotrež je zarjad Domowiny ze wšelakimi skupinami přewjedł. Hłowne prašenje bě: Kak předstajimy Domowinu a serbski lud? Měnjenje je pola wšitkich podobne: Wobdźěleni chcedźa so wšelako zwobraznić. Serbske barby, tradicije, stawizny a nic naposledk serbska rěč maja w tym zwisku prezentne być, wobmjezowanje ryzy na folkloru měło so wobeńć. Přikładnje předstaji wona naćisk noweje internetneje strony Domowiny. Zaměr noweho designa je sposrědkować kompaktnje zakładne informacije kołowokoło Serbstwa a zmóžnić zajimcam, so jednorje mjez sobu skontaktować.
Župa čestnohamtskich čłonow počesćiła
Slepo (SN). Hłowna zhromadźizna župy Jakub Lorenc-Zalěski wčera w Slepom, bě zdobom wólbna zhromadźizna. Wulkotny zazběh do zarjadowanja zmóžni najmjeńši cyłk Serbskeho folklorneho ansambla Slepo – a to najmłódši, wosomlětny čłon Toni Tschöbel ze swojim wučerjom Wolfgangom Kotissekom, kotryž je najstarši čłon ansambla, ze zdźělenki Domowiny wuchadźa. „Do nětka bě wjeselo, nětko budźe chutnišo“, zahaji županka Diana Maticowa zhromadźiznu. Nimo 35 wot cyłkownje 42 delegatkow a delegatow, witaše wona předsydu Domowiny Dawida Statnika. Tež krajny rada Zhorjelskeho wokrjesa dr. Stephan Meyer (CDU) je čestnohamtskim akteram swoje postrowy sposrědkował.
Na to předstaješe županka rozprawu wo dźěławosći župy wot lěta 2023 do 2025. Župa ma tuchwilu 525 čłonow. W fokusu steješe dźěło na bazy kaž tež dołhodobne zawěsćenje serbskich zarjadnišćow we wobłuku změny strukturow. Tež jednotliwe skupiny wužichu składnosć, wo swojej dźěławosći rozprawjeć. Mjez druhim předsydka Domowinskeje skupiny Trjebin Angelika Balccyna. Wona hódnoćeše aktiwity, kaž pěstowanje serbskich nałožkow.
Na dwurěčnosć hišće bóle dźiwać
Radworskeje šule dla zludani
Zo je kubłanje w kruhach narodnje angažowanych Serbowkow a Serbow bytostna tema, je tež wčerawše wuradźowanje předsydstwa župy „Jan Arnošt Smoler“ Budyšin pokazało.
Budyšin (SN). „Tole je naša najwažniša tema“, županka Leńka Thomasowa wuzběhny. „Wšo druhe dyrbi so tomu podrjadować“, praji županka nastupajo aktualnu situaciju na serbskej zakładnej šuli w Radworju. Čłonojo župneho předsydstwa „Jan Arnošt Smoler“ Budyšin so jeje słowam na swojim měsačnym wuradźowachu wčera w Budyskim Serbskim domje přizamknychu. Woni su zludani wo tym, što so ze staršimi w Radworju stawa. Wosebje so na „dobrej radźe“ Krajneho zarjada za šulu a kubłanje (LaSuB) postorkuja. Tón bě jim radźił, swoje dźěći do druhich šulow słać, chcedźa-li serbsku wučbu w dalšich předmjetach nimo serbšćiny. To njemóže w zmysle Domowiny być, wuchadźa ze zdźělenki regionalneje rěčnicy Katje Liznarjec wo posedźenju župneho předsydstwa. Čłonojo gremija sej žadachu, zo měła Domowina staršich a dźěći cyłkownje hišće sylnišo podpěrować.
