Generiski genus za runoprawosć

Freitag, 01. April 2022 geschrieben von:

Serbski institut (SI) a Maćica Serbska (MS) stej z „pragmatiskim a praktikabelnym“ doporučenjom na aktualnu debatu wo dźenderowanju w serbšćinje reagowałoj. Gremij rěčnych fachowcow je so při tym na přirodowědnej praksy orientował.

W měsće Karla Mayja spěwali

Donnerstag, 31. März 2022 geschrieben von:

Pančicy-Kukow (fk/SN). Chór Lipa je minjeny kónc tydźenja wuspěšne chórowe lěhwo w Hohensteinje-Ernstthalu přewjedł. 30 spěwarjow poda so ze swójbnymi do města, hdźež narodźi so před 180 lětami spisowaćel Karl May. Za Lipjanow bě dožiwjenje, po dołhim času internetowych probow zaso hromadźe zwučować.

A běchu sej tójšto předewzali: W probach nadźěłachu sej repertoire za mejski wustup w Lipsku, nalětni koncert w klóšterskej zahrodźe w Pančicach-Kukowje a za wosadny swjedźeń we Wotrowje. Nimo toho filowachu tež na spěwach za wuhotowanje prěnjeho swjateho wo­prawjenja w klóštrje a za wulki spě­wanski swjedźeń, na kotryž hotuja so w nazymje chóry z cyłeje Łužicy. Zo njeby so dźěćom spěwarjow při wěčnym probowanju dorosćenych wostudźiło, ­běchu sej swójbni wosebitu zabawu ­za nje wumyslili: Najwšelakoriše hry a eksperimenty pjerachow zahorichu.

Muzej přidźěłał

Mittwoch, 30. März 2022 geschrieben von:

Wojerecy (SN). Domowinska župa „Handrij Zejler“ je za planowanu šćežku „Via Sorabica HoyWoj“ wo serbskich stawi­znach města přidźěło Wojerowskeho měšćanskeho muzeja dóstała. Wo tym je zamołwity za projekt Werner Sroka wčera na posedźenju jeje předsydstwa informował. Nětko chce tamniša regionalna rěčnica Domowiny Sonja Hrjehorjowa ze serbskej projektnej managerku města wo pokročowanju projekta jednać.

Přichodnej wjerškaj župy budźetej přednošk wo něhdyšich Słowjanach we Wendlandźe 9. meje, kotryž so składnostnje wopyta wendlandskeje delega­cije wotměwa, kaž tež Serbski wječork 12. meje hromadźe z Domowinskej ­skupinu w Nowym Měsće. W ramiku projekta „Rěčna krajina we Wojerowskim regionje njech kćěje“, mytowaneho we wubědźowanju simul+, chcedźa nětko mjena ludźi zběrać, kotřiž wjesne dialekty swěrnje nałožuja. Jich žiwu lokalnu serbšćinu chcedźa nahrawać.

Sada skomolena była

Mittwoch, 30. März 2022 geschrieben von:
Bohužel je w přinošku „Towarstwo ,Zahrodka‘ dźěła za serbsku krajinu“, wudaće SN z 29. měrca, sada skomolena. W zwisku z lońšim znowazałoženjom towarstwa rěka wona prawje: „Knobloch, kotryž je tež wjesny předstejićel, to jako ,wažnu kročel‘ do směra wožiwjenja serbšćiny hódnoćeše.“ Wobžarujemy misnjenje. Redakcija SN

Słuša na digitalizacisku konferencu

Dienstag, 29. März 2022 geschrieben von:

Wožiwjenje hornjo- a delnjoserbšćiny steješe w srjedźišću posedźenja Zwjazko­weho předsydstwa Domowiny minje­ny pjatk w Slepom. Prěni raz za do­bu koronapandemije móžachu zajim­cy zarjadowanje jako hosćo direktnje na žurli sćěhować.

Slepo (SN/at). Přehlad wo dźěławosći we Wojerecach zaměstnjeneho Serwisoweho běrowa za serbšćinu w Sakskej je jeho sobudźěłaćer Jan Kral podał. W nošer­stwje Domowiny je zarjadnišćo komunam w serbskim sydlenskim rumje wo­krjesow Budyšin a Zhorjelc wot oktobra 2019 přede­wšěm ze zeserbšćenjom zarjadniskich tekstow poboku. Přednošowar rysowaše koncepcionelne nadawki a kak je so dotal poradźiło je spjelnjeć. Na přikład je Jan Kral wuwjedł, zo staj hro­madźe z Francisku Grajcarekec hnydom započałoj jednotliwe komuny wopytać, zo bychu jich zarjadnistwa we wužiwanju serbšćiny poradźowali. Wobmjezowanja koronapandemije su tele prócowanja přetorhnyli. Nětko pak staj opti­mistiskaj tele wopyty pokročować móc, a to přede­wšěm w Zhorjelskim wokrjesu.

Delni Wujězd (MB/SN). Tójšto čłonow a hosći je předsyda towarstwa „Zahrodka 1921“ Frank Knobloch minjenu so­botu w Delnjowujězdźanskej radnicy na hłownu zhromadźiznu witał. Składno­stnje 100. róčnicy załoženja serbskeho dźěłaćerskeho towarstwa su je loni 19. februara ze samsnym mjenom znowa zało­žili. Knobloch je zdobom wjesny předsteji­ćel, štož jako „wažnu kročel“ do směra na wožiwjenje serbšćiny we wsy hódnoćeše. Hižo do skutkowanja Mareka Krawca jako docent za serbšćinu w Rěčnym centrumje WITAJ­ běchu čłonojo towarstwa w online-kursu serbšćinu wuknyli a tež dale z tym pokročuja.

Impulsy tež za Hornju Łužicu

Donnerstag, 24. März 2022 geschrieben von:

Prěnja dźěłarnička noweho imersiwneho delnjoserbskeho rěčneho programa za dorosćenych „Zorja“ je so wčera po třoch dnjach w Choćebuskim měšćanskim muzeju w jendźelskej rěči zakónčiła. Arapaho-Indian a profesor za antropologiju a indigene studije na Uniwersiće Montana (USA) dr. Neyooxet Greymorning je wobdźělnikam swoju inowatiwnu metodu ASLA©™ předstajił a rozłožił, kak sej cilowu rěč aktiwnje přiswojiš, bjez toho zo rěč wjetšiny nałožuješ. Mjenowanu metodu zhromadźenstwa First Nation w USA, Kanadźe a Awstralskej wuspěšnje wužiwaja.

Choćebuz (SN). Na kromje dźěłarnički projekta „Zorja“ za rewitalizaciju delnjoserbšćiny staj so wčera popołdnju kubłanska referentka Domowiny Katrin Suchec-Dźisławkowa a prof. Neyooxet Greymorning rozmołwjałoj. Greymorning je swoju maćeršćinu arapaho, kotruž bě jenož hišće połsta ludźi nałožowało, ze swójskej metodu tak mjenowaneje dospołneje imersije wožiwił. Dorosćeni wuknu rěč – kaž dźěći swoju maćeršćinu – předewšěm z wobrazami a dospołnym zanurjenjom do noweje rěče.

Hač do 31. měrca spěchowanske próstwy zapodać

Montag, 21. März 2022 geschrieben von:

Budyšin (SN/at). Wo postupowanju z próstwami za serbske wulkoprojekty we wobłuku změny strukturow w Sakskej je so třiceći zastupjerjow Domowiny a serbskich institucijow minjeny pjatk na žurli Budyskeho Serbskeho domu a digitalnje dorozumiło. Na tule wuměnu bě wuběrk Zwjazkoweho předsydstwa Domowiny za naležnosće strukturneje změny, hospodarstwa a infrastruktury přeprosył. Prěni dźěl zarjadowanja bě zjawnosći přistupny. „Tam chcemy předstajić zakład toho, wo čimž chcemy w druhim dźělu diskutować“, rjekny zawodnje dr. Hartmut Leipner, předsyda mjenowaneho wuběrka a městopředsyda Domowiny.

Předsyda třěšneho zwjazka Dawid Statnik rysowaše skutkowanje Domowiny změnu strukturow po kóncu zmilinjenja brunicy nastupajo. Te měješe swój započatk w konferency „Quo vadis, Łu­žica“, wotměwacej so w septembrje 2018 w Złym Komorowje. Statnik wuzběhny rěč, kulturu a hospodarstwo jako stołpy spěchowanja. „Hłowny cil naprawow je, rěčne rumy tworić a skrućić.“

Powabne „tradicije wokoło jejka“

Freitag, 18. März 2022 geschrieben von:
Zo so jutry zbliža, wo tym swědča kónc tydźenja wšelake zarjadowanja w srjedźnej a Delnjej Łužicy. Župa „Handrij Zejler“ bě wčera na dźěłarničku „tradicije wokoło jejka“ we Wojerowskim župnym domje a pódlanskej bróžni přeprosyła. Dwě kole zajimčow stej so tam zetkałoj. Wosom žonow z Ćiska, Židźinoho, Wojerec a Nydeje je so zwažiło, někotre z nich prěni raz, pod nawodom Sigrun Nazdalineje a jeje dźowki Annemarije jejka wóskować a bosěrować. Zdobom su kursistki Wojerowskich rěčnych kursow w bróžni z docentom Marekom Krawcom wo jutrownych nałožkach bjesadowali a zhromadnje spěwali. Foto: Sonja Hrjehorjowa

Naležnosćam regionow puć rubać

Donnerstag, 17. März 2022 geschrieben von:

Předmjet wurjadneje hłowneje zhromadźizny Domowiny a přichodne kročele narodneje organizacije změnu strukturow nastupajo steještej w srjedźišću wčerawšeho wuradźowanja předsydy, župankow/županow a předsydow nadregionalnych čłonskich towarstwow serbskeho třěšneho zwjazka.

Budyšin (SN/at). Prawnisku płaćiwosć na lońšej hłownej zhromadźiznje wobzamknjenych změnow wustawkow po poručenjach Drježdźanskeho hamtskeho sudnistwa zaručić budźe zaměr nimale połdrahodźinskeje wurjadneje „hłowneje“ Domowiny, kaž jeje nowinski rěčnik informuje. Předsyda Domowiny Dawid Statnik je předsydstwa cyłkow Domowiny prosył, zo bychu namjetowane korektury hač do meje rozjimali.

Anzeige