Kónc Swobodneho społka wobzamknjeny
Drježdźany/Chrósćicy (SN/MG). Na swojej rjadnej zhromadźiznje rozsudźichu čłonki a čłonojo zapisaneho drustwa Swobodny społk dnja 29. decembra 2023 spočatk likwidacije cyłka. W nowinskej zdźělence pisaja sćěhowace wo přičinach: „Hladajo na běžne straty we wotbytku našich produktow a cofnjenje centralnych zastojnskich nošerjow z drustwa, začuwamy přiběrajo nuzu, Swobodny społk z.d. wot 1. januara 2024 do likwidaciskeje fazy přewjesć“.
Tak pobrachowaše wosebje na angažowanych ludźoch, kotřiž so na dalšim wuwiću społka wobdźěleja. Wot dohromady 23 drustwownicow a drustwownikow běše jenož horstka na skutkowanju aktiwnje wobdźělena. „Tole drje bě z wulkeho dźěla zdobom rezultat toho, zo běchu čłonojo drustwa w mnohich druhich projektach angažowani“, rozkładuje Hańžka Wjeselic, něhdyša předsydka społka a nětčiša likwidatorka.
Za rěč mocy wjazać
Skedźbnjeja na strachi socialnych syćow
Budyšin (SN/MG). Zo njeje internet stajnje jenož žohnowanje, ale druhdy tež pokleće, to dožiwjeja ći, kotrymž je něchtó na přikład intimne wobrazy připósłał. Tole móže so wězo we wzajomnym zrozumjenju stawać, ale tež nawopačne je móžno. „Sexting“ je nadzapřijeće za wonu formu wirtuelneje komunikacije, kotraž wobsteji z powěsćow, wobrazow a widejow.
Tři młode serbske žony, Sophia Hančikec, Hana Nukec a Celina Knopec, su so na temu nětko z krótkim widejom zwažili. Tutón su zhromadnje ze sobudźěłaćerku studija Lucija, Michelle Mikławškec, nadźěłali. Ma to być prěnje widejo cyłeho rjadu podobnych clipow. W dwumjeńšinskim wideju předstajeja strachi „sextinga“ za wobdźělenych, wosebje potom, hdyž so hranicy překročuja.
Swěrna politiska poradźowarka
Tež dr. Renate Harcke słuša do rjadu lětušich zasłužbnych Serbow, kotrychž je Domowina ze swojim Čestnym znamješkom mytowała. W lěće 1954 w měsće Calbe nad Solawu rodźena Němka je wosebje ze swojej hłubokej prawniskej ekspertizu na dobro Serbow skutkowała.
Jako absolwentka studija prawniskich wědomosćow w ruskim Woronježu dźěłaše najprjedy jako wyša asistentka, pozdźišo jako nawodnica katedry na Akademiji statnych a prawniskich wědomosćow w Podstupimje-Babelsbergu. Po tym, zo bu kubłanišćo juristow w Babelsbergu po přewróće rozpušćene, dźěłaše dr. Renate Harcke spočatnje jako referentka, pozdźišo jako frakciska jednaćelka w frakciji PDS krajneho sejma Braniborskeje. Mjeńšinowe prawo a mjeńšinowa politika běštej jej wot spočatka politiskeho skutkowanja wěc wutroby. Wona je zwjazkowe dźěłowe zjednoćenstwo Lěwicy „Etniske mjeńšiny“ 2003 sobu załožiła, kotrež hač do dźensnišeho z Hajkom Kozelom nawjeduje.
Napřećiwne měnjenja wo nałožkach
W štyrjoch dalšich jednanjach wobjednawaše Choćebuske zarjadniske sudnistwo wčera skóržby gmejnow Gójacki jazor/Schwielochsee, Markojska Góla/Märkische Heide z wokrjesa Dubja-Błóta kaž tež komunow Feliksowy jazor/Felixsee a Derbno pola Gubina/Schenkendöbern we wokrjesu Sprjewja-Nysa přećiwo přirjadowanju wjesnych dźělow serbskemu sydlenskemu rumej.
Choćebuz (HA/SN/at). Dosahaja hajene serbske ludowe nałožki w běhu lěta jako dopokaz, zo hodźeli so wjesne dźěle jednotliwych komunow serbskemu sydlenskemu rumej přirjadować? A su nałožki jeno „słaby“ dopokaz? Z wida Rady za naležnosće Serbow Braniborskeje tomu tak je. Tohodla je sej gremij wčera žadał, zo měło sudnistwo za kóžde dalše jednanje wěcywustojnosć etnologi sobu wužiwać.
Diskusija njeje nimo
Serbski sejm dyrbi so dorosćeny stać
Zhromadne dźěło hibanja Slavonic Europe ze Serbskim sejmom je nimo (hlej wčerawše wudaće SN). Wo tym je prezident David Chmelík sejmarjow a jich sympatizantow hižo 14. decembra w e-mailce informował.
Brüssel (SN/at). Kónc kooperacije potrjechi wšitke „běžne kaž tež planowane projekty ... pak na strategiskej kaž tež na financnej runinje“, rěka w e-mailce Chmelíka, kotraž našej redakciji předleži. To zdobom woznamjenja cofnjenje mandata za mjezynarodnu kencliju Dougthy Street Chambers, kotryž bě Slavonic Europe Serbskemu sejmej zmóžnił.
Kaž David Chmelík piše, je někotrym sejmarjam napřećo hižo před měsacom „poněčimne rozpušćenje strategiskeje a financneje podpěry“ mjenje a bóle jasnje připowědźił. „Njemějach ženje zaćišć, zo su tući rozmołwni partnerojo to woprawdźe rozumili a chutnje brali.“
Šulerjo so ze Serbami zaběrali
Přihotuja so na Europeadu
Nowa Wjeska (SN/MiP). Wuběrk Serbskeho mustwa za Europeadu je so wčera w Nowej Wjesce lětsa posledni raz schadźował, zo by swoju dźěławosć kaž tež wuslědk wulosowanja za klětušu Europeadu wuhódnoćił. To zdźěli nam Clemens Škoda, nawoda delegacije Serbskeho mustwa.
Wo wulosowanskim zarjadowanju spočatk decembra rozprawješe čłon přihotowanskeho wuběrka Milan Funka. Hladajo na skupinsku zestawu muži praji trenar Frank Ričel: „Němcy z Pólskeje su jara naročny přećiwnik. Dyrbimy wšitko dać, chcemy-li předkoło přetrać.“ Žónske mustwo pod nawodom Franciski Hellneroweje wodźěli so druhi raz na Europeadźe a změje po słowach trenarki „dobry a šěroki kader, wšako smy so z hrajerkami z Delnjeje a srjedźneje Łužicy womłodźili.“
Wuběrk zaběraše so nimo toho tež z wužadacej logistiku na městnje, wšako su zdalenosće mjez hrajnišćemi wulke. Tež přebytk za mustwje w bliskosći Flensburga wón hišće pyta. Spočatk januara přewjedu žony treningowe lěhwo we Werdauwje a mužojo w Choćebuzu. Přizjewjenske lisćiny pak su hižo połne.
Župa chce wjace informacijow
Do dweju směrow chce předsydstwo župy Delnja Łužica komunikaciju polěpšować resp. na nowej noze stajić. Stej to Rada za naležnosće Serbow a braniborske ministerstwo za kubłanje.
Choćebuz (SN/at). Wuměna mjez předsydstwom župy Delnja Łužica a braniborskej Radu za naležnosće Serbow ma so polěpšować. To su sej wobdźělnicy posedźenja gremija minjeny štwórtk w Choćebuzu předewzali. Pozadk je njespokojnosć ze stawom informacijow wo tym, kotre stejišćo chcedźa radźićeljo k naležnosćam zabrać, kotrež na swojich posedźenjach ze zapósłancami a zastupjerjemi ministerstwow wobjednawaja. Husto je so rada sama měnjenje wutworiła bjez dalšeje konsultacije župneho předsydstwa. Po słowach župana dr. Pětša Šurmana chcetej so předsydstwo a rada na přichodne zhromadne postupowanje dojednać. Zaměr ma być, „pozicije do posedźenja rady zhromadnje rozjimać“.
