Serbowanje w korčmje je wažne
Z wjeselom zhonichu čłonojo župneho předsydstwa, zo je so prěni raz radźiło, šulerjam wyšeje šule Wojerecy serbšćinu spřistupnjeć. Wo tym powědaše nowa rěčna motiwatorka Marija Šołćic.
Wojerecy (SN). Nimo wuzwolenja delegatow za lětušu hłownu zhromadźiznu Domowiny mějachu čłonojo předsydstwa župy „Handrij Zejler“ wutoru wječor dosć předewzaćow za 2023 na starosći. Z woblubowanej bjesadu „Rěčna swětłownja“ pod režiju ko-županki Gabriele Linakoweje pokročuja 7. nalětnika w bróžni domu Domowiny na Drježdźanskej we Wojerecach. 4. jutrownika budźe molowanje jutrownych jejkow w srjedźišću stać a 9. meje chcedźa so zaso w hosćencu schadźować. Wšako je po słowach Linakoweje wažne, „zo druzy ludźo dožiwjeja, zo so w zjawnosći našeho města serbuje.“ Wosebje dobra běše atmosfera w radnej pincy, hdźež polyglotny korčmar italskeho pochada z hosćimi samo tróšku serbsce bachtaše.
Serbske styki do Wendlanda tež lětsa wunošne
Mjeze Serbami a Wendlandom w lěće 1991 zahajena kulturna wuměna tež lětsa pokročuje, zaso so „Wendentag“ wotměje.. We Łuchowje (němsce: Lüchow) stara so wo to asociěrowane towarstwo Domowiny z mjenom „Wendischer Freundes- und Arbeitskreis e.V.“.
Łuchow (ws/SN). Tući domoródni zajimcy słowjanskich korjenjow krajiny kulowcow a zdobom přećeljo Serbow mějachu zašły tydźeń dwě zarjadowani ze serbskim podźělom. Dnja 2. małeho róžka přichwata z Choćebuza sobudźěłaćerka wotnožki Serbskeho instituta dr. Jenny Hagemann, zo by přednošowała wo temje „Wotkazane regiony“ – přirunowanju regionalne kulturne herbstwo Łužicy a Wendlanda. Wona bě jara překwapjena, zo bu rumnosć pod třěchu w starym hamtskim domje we Łuchowje z 80 zajimcami pjelnjena. Po přednošku wuwi so zajimawa diskusija wo prašenjach domizny, tradicijow, słowjanskeju rěčow wobeju regionow a dźensnišim wuznamje pěstowanja kulturneho herbstwa. Referentka je přilubiła, tematiku z dźěłarničku na tak mjenowanym „Wendentag“ spočatk septembra pohłubšić.
Prawe prašenje
Połoženje w měsće župu wužaduje
Próca wo wožiwjenje serbskeje rěče z pomocu motiwatorow we wšelakich komunach jeje teritorija je za Domowinsku župu „Jan Arnošt Smoler“ chětro wažna.
Budyšin (SN/at). Budyska župa „Jan Arnošt Smoler“ prócuje so wo wožiwjenje serbskeje rěče. Dokelž wopřija jeje teritorij 16 komunow bywšeho starowokrjesa Budyšin, maja w župnym předsydstwje za tónle nadawk podpěru motiwatorow za njewobeńdźomnu. „Wot apryla 2021 skutkuje Lucian Kaulfürst jako motiwator wokoło Malešec. W přichodźe ma so wón sobu wo Bukečansku gmejnu starać“, rozprawjatej rěčnicy předsydstwa Leńka Thomasowa a Hilža Mehrowa. Dotalna dźěławosć motiwatora z běrowom w Přiwćicach je wujewiła, zo žada sej serbskorěčne kubłanje w Malešanskej gmejnje dale zaměrnu pomoc. Přeběh spočatneho projekta je župne předsydstwo w tym posylnił, za wožiwjenje rěče na podobne wašnje tež w druhich kónčinach postupować. „Wot septembra 2022 je Rafaela Wićazowa jako motiwatorka za gmejny Radwor, Njeswačidło, Rakecy, Wulku Dubrawu a Hodźij zamołwita“, rysujetej rěčnicy aktualne połoženje.
Přichod nječaka!
Chcetaj rěč aktiwizować
Malešecy (SN). Tuchwilu natočitaj rěčna motiwatorka we Wojerowskej župje Marija Šołćic a rěčny motiwator w Malešan kónčinje Lucian Kaulfürst podcast za internetnu stronu gmejny Malešecy. Kaž Marija Šołćic našemu wječornikej zdźěli, jedna podcast wo prózdninskim poskitku. Za to staj motiwatoraj wšelake wotběhi za wuspytanje rěče z pomocu elektroniskeho pisaka BOOKii wudźěłałoj. Pilotowy projekt je najprjedy na Malešansku kónčinu wusměrjeny, bórze pak budźetaj motiwatoraj tež do Wojerec přeprosyć. Tohorunja mataj ideju, projekt po tym w šulach abo druhich kubłanišćach poskićeć.
To a dalše wudźěłki su spočatk skutkowanja motiwatorow we wšelakich serbskich kónčinach. Wuskutki jeju dźěła słuža wosebje rewitalizaciji serbšćiny. Wonaj słušetaj do noweje syće rěčnych motiwatorow pod třěchu Domowiny.
Župa spominanje Šěracha podpěra
Nimale měsac do hłowneje zhromadźizny serbskeho třěšneho zwjazka 22. apryla w Choćebuzu budźe 25. měrca hłowna a wólbna zhromadźizna Domowinskeje župy „Jan Arnošt Smoler“ w Budyskim Serbskim domje.
Budyšin (kl/SN). Předsydstwo Domowinskeje župy „Jan Arnošt Smoler“ Budyšin je wčera, na swojim prěnim lětušim wuradźowanju, hłownu a wólbnu zhromadźiznu župy za 25. měrc zwołało. Zhromadźizna budźe w Budyskim Serbskim domje. Wobdźělnicy wuzwola županku abo župana kaž tež nowe župne předsydstwo.
Dale je předsydstwo lětuše župne projekty rozjimało. „Serbske kino“ ze serbskimi filmami w Budyskim kinje bychu rady znowa přewjedli, wšako bě wothłós loni dosć dobry. Cyłkowne wudawki za prěnje tajke zarjadowanje pak běchu prosće přewysoke. Tuž chcedźa nětko za pućemi pytać, štó móhł zarjadowanje tajkeho razu wuhotować a přewjesć. Župna kubłanska jězba powjedźe čłonow a zajimcow w septembrje po slědach Hadama Bohuwěra Šěracha. Tradicionalny nazymski koncert w Serbskim domje budźe na dnju Budyskeje Romantici.
Dźěło z młodźinu w srjedźišću stało
Młodźinske dźěło je bytostny wobłuk w skutkowanju Domowinskeje župy Delnja Łužica. Z nim je so tamniše župne předsydstwo na posedźenju wčera w Choćebuzu hłownje zaběrało.
Choćebuz (SN/at). Jedne lěto wukonja Tobias Unger jako naslědnik Helmuta Matika zastojnstwo młodźinskeho koordinatora w župje Delnja Łužica. Na spočatku noweho lěta je wón hromadźe ze župnym předsydstwom na dźěławosć zhladował. W podatym přehledźe wusahowachu wěste wjerški w młodźinskim dźěle, kaž na přikład zarjadowanje superkokota w Nowej Niwje (Neuzauche), rozprawja župan dr. Pětš Šurman.
Předsydstwo je na wědomje brało, zo su młodostni přewšo spontani, spěšnje so na nowe zajimy a předmjety wusměrjeja. Na wšelake naležnosće ani po WhatsApp lědma reaguja. „To spušćomnosći w młodźinskim dźěle pod třěchu Domowiny runje njepolěkuje“, stołmači župan měnjenje čłonow předsydstwa. Na tamnej stronje pak zhonichu wo wusahowacej angažowanosći młodostnych, kotraž zwurazni so we wothłosu na online-zapustaj za čas koronapandemije, Šurman rjekny.
Pytaja rěčnika
Budyšin (SN). Na wčerawšim wurjadnym posedźenju zaběraše so prezidij Domowiny z přihotom na přichodne posedźenje Zwjazkoweho předsydstwa, kotrež přewjedźe so pjatk, 27. wulkeho róžka, we Wojerecach. Nimo lětušeho hospodarskeho plana a lońšeje rozprawy zarjada steješe dźěłowy plan 2023 na dnjowym porjedźe. Mjez druhim rozprawješe hłowna jednaćelka Judit Šołćina wo wužadanju njewobsadźenych dźěłowych městnow dla, wosebje hladajo na falowaceho nowinskeho rěčnika. Prezidij pokaza na to, zo chce Domowina fleksibelnišo při namakanju nowych wosobow postupować. Wšitcy su wutrobnje witani, so na zarjad wobroćić a swójske ideje předstajić. Zdobom je sebi prezidij wěsty, zo jedna so wo zajimawe a wužadowace dźěło.
Z wólbnej zhromadźiznu do noweho lěta startowali
Pančicy-Kukow (JKf/SN). We wobłuku swojeje hłowneje a wólbneje zhromadźizny předwčerawšim w Pančicach-Kukowje je chór Lipa na wuspěšne a wotměnjawe lěto wróćo zhladował. Po tym zo běchu sej Lipjenjo za čas pandemije online nowy spěwny repertoire nazwučowali, wobdźělichu so w Budyskej „Krónje“ na beneficnym koncerće na dobro Ukrainy. Z chórowym lěhwom w Hohensteinje-Ernstthalu přihotowachu so w běhu třoch dnjow na projekty, mjez druhim zhromadny koncert z Markkleebergskimi Vocalistami w Starej wikowanskej bursy w Lipsku a na koncert we wobłuku 250. jubileja Wotrowskeje wosady. Hudźbnej wjerškaj běštej předstajeni oratorija Korle Awgusta Kocora „Israelowa zrudoba a tróšt“ zhromadnje z druhimi ćělesami pod nawodom Judith Kubicec a wulki spěwny swjedźeń składnostnje „Lěta Zejlerja a Kocora 2022“ w Budyšinje. Prěni króć wuhotowachu w cyrkwi klóštra Marijina hwězda adwentny hudźbny nyšpor. Cyłkownje je Lipa loni 70 wšelakich spěwow a jedyn oratorij prezentowała.
