Namjety zapodać za wuzmjenjenja

Dienstag, 26. April 2022 geschrieben von:

Budyšin (SN). Wuznamjenjenske zarjadowanje Zwjazkoweho předsydstwa Domowiny, wotměwace so 7. oktobra, změje lětsa wosebity raz. Kaž třěšny zwjazk informuje, su wobmjezowanja korona-pandemije dla tež skutkowanje čestnohamtskich w sylnej měrje wobwliwowali. Nětko pak so dźeń a bóle móžnosće za zarjadowanja a wjac aktiwitow wotewrjeja. Dalši aspekt je spominanje na wótčincow Zejlerja a Kocora.

Hač do 30. junija je składnosć za čłonow župow, za towarstwa kaž tež jed­notliwcow, zasłužbne wosoby za lětuše wu­znamjenjenje z Mytom Domowiny, z Mytom Domowiny za dorost a z Čestnym znamješkom Domowiny namje­tować.

Swoje namjety njech zapodawaja z póštu na: Domowina – Zwjazk Łužiskich Serbow z. t., Póstowe naměsto 2/Postplatz 2, 02625 Budyšin/Bautzen, resp. z e-mejlku na .

Mytowanski wuběrk prosy wo to, za posrědkowanje namjetow nowy formular wužiwać, kotryž je tu na internetnych stronach Domowiny pod wšitkim zajimcam přistupny.

Narodna drasta na balu prezentna

Dienstag, 26. April 2022 geschrieben von:

Ćisk (JT/SN). Z tradicionalnym zaćahom porow a dźesać mjeńšin trajacej polonezu pod režiju Heidi Forche je so minjenu sobotu wosmy bal narodneje drasty na žurli Ćišćanskeho hosćenca „Zeleny wěnc“ zahajił. Po tym zo dyrbjachu bal loni korony dla wotprajić, bě lětuša organizacija, kotraž ležeše runja zašłym lětam znowa w rukomaj Gabriele Linakoweje z Ćišćanskeje rejwanskeje skupiny, wšo druhe hač jednora. „Dwaj tydźenjej do bala mějachmy jeničce 60 přizjewjenjow. Smy hižo rozmyslowali, hač dyrbimy znowa wšitko wotprajić. Potom pak je so tola hišće dosć zajimcow přizjewiło“, Gabriela Linakowa powěda.

Hainewalde (scu/SN). Pod hesłom „Přińdź twoje kralestwo“ schadźowachu so serbske ewangelske swójby na zhromadny kónc tydźenja w Hainewaldźe w Žitawskich horinach. Organizowany wot Serbskeho ewangelskeho towarstwa wobdźěli so dohromady 41 wěriwych, z toho 19 dorosćenych a 22 dźěći z Łužicy, Drježdźan a Badensko-Württembergskeje. Wot štwórtka wječora do njedźele připołdnja mějachu wobdźělnicy wotměnjawy a zajimawy program. Při najrjeńšim wjedrje rozmyslowachu wo wěrje, hajachu ze spěwom a z hrami serbsku zhromadnosć a zeznachu wokolinu.

Łaz (SN). Něhdźe 50 wopytowarjow mjez druhim z Wojerec, Čorneho Chołmca, Ćiska a Delnjeho Wujězda je minjeny pjatk na serbski wječork pod hesłom „Handrij Zejler – spěwy a fabule“ do Łazowskeje cyrkwje přichwatało. Mjez hosćimi bě wjele čłonow zarjadowarja-spěchowanskeho towarstwa zetkanišćo Dom Zejlerja a Smolerja kaž tež tamniši wjesnjanosta Thomas Leberecht. Tež dwě ukrainskej maćeri a jeju dźěći, kotrež po ćěkańcy we Łazu bydla, su z wulkim zajimom zarjadowanje sćěhowali.

Regionalna rěčnica Domowiny Wo­jerowskeje župy „Handrij Zejler“ Sonja Hrjehorjowa a Andreas Kirschke staj fabule­ serbsce a němsce čitałoj. Katrin Goeringowa, Monika Austowa a Rose­marie Kloßowa su jako spěwna trójka z Łaza zarjadowanje ze spěwami „Ha, widźu-li ptačata ćahnyć“, „Tu čerwjenu suknič­ku“ a „Wusni mój lubuško“ wob­rubili. Předsyda towarstwa Reinhardt Schneider so wšěm sobuskutkowacym dźakowaše a farar Christian Huth přitomnych žohnowaše. Na kóncu zarjadowanja su wšitcy hromadźe serbsku hymnu za­spěwali.

Gratulacije prof. dr. Helmutej Fasce

Freitag, 08. April 2022 geschrieben von:
Z čerstwym młodym postrowom je Domowinska skupina Komorow-Trupin-Rakecy dźensa swojemu bywšemu předsydźe prof. dr. Helmutej Fasce k 90. narodninam gratulowała. K tomu su dźěći Rakečanskeje pěstowarnje jubilara doma w Komorowje z małym programom překwapili. Helmut Faska bě skupinske zastojnstwo wot 1998 do 2008 wukonjał. Tež wjesnjanosta Rakečanskeje gmejny Sven Nowotny (CDU) bě mjez prěnimi, kotřiž su zbožo přeli. Za Budysku župu „Jan Arnošt Smoler“ staj Hilža Měhrowa a Jurij Łušćanski bywšemu županej najwutrobniše přeća spo­srědkowałoj. (Čitajće tež w předźenaku.) Foto: Feliks Haza

Móžnosće wuměny rozjimali

Mittwoch, 06. April 2022 geschrieben von:

Domowina a komunalne zamołwite za serbske naležnosće měli so w přichodźe prawidłownje wuměnjeć. Namjet bě wčera na posedźenju předsydstwa župy Delnja Łužica słyšeć.

Choćebuz (SN/at). Z komunalnej runinu na dobro serbskeje rěče a kultury skutkownje hromadźe dźěłać je za předsydstwo župy Delnja Łužica zasadny narok. Tohodla su so jeho čłonki a čłonojo na wčerawšim posedźenju w Choćebuzu z dwěmaj komunalnymaj zamołwitymaj wuměnili. Sabrina Kušyna, serbska społnomócnjena wokrjesa Dubja-Błóta, je wo praktiskich přikładach rozprawjała, kak wjesne towarstwa a tajke pod třěchu Domowiny z Domowinskej skupinu na městnje skutkowanje koordinuja. Jako zastupjerka wokrjesa, kotryž je połdra lěta ze spěchowanskim čłonom narodneje organizacije, přeje sej wona, předewšěm w rozšěrjenym dźělu připóznateho serbskeho sydlenskeho ruma nowe Domowinske skupiny załožić, zo móhli tam wjesne potenciale lěpje wužiwać. Jako přikład mjenowaše Sabrina Kušyna gmejnu Markojsku gólu, hdźež hižo přewšo aktiwne towarstwowe struktury wobsteja, kaž Domowina informuje.

Haperlejka

Montag, 04. April 2022 geschrieben von:
Kaž chutna a trěbna debata wo dźenderowanju w serbšćinje tež była – minjeny pjatk w Serbskich Nowinach wozjewjeny přinošk „Generiski genus za runoprawosć“ bě ryzy wunamakany. Małkej pokazce na to běštej mjeno awtora kaž tež datum wozjewjenja: Skrótšenka „jj“ steji za „jutrownik, jutrownik“; a 1. dźeń tohole měsaca je tež w nowinarstwje woblubowana přiležnosć za aprylski žort. Wjetšina našich čitarkow a čitarjow njeda sej módre a zelene nabać a dyrbješe so „z cyłeje wutroby smjeć“, kaž „citowana“ předsydka Maćicy Serbskeje dr. Anja Pohončowa w redakciji SN předležacej zdźělence piše. Smy-li přiwšěm někoho znjeměrnjeli abo samo rozhněwali, njech njewza to nam za zło. Bosćan Nawka

Generiski genus za runoprawosć

Freitag, 01. April 2022 geschrieben von:

Serbski institut (SI) a Maćica Serbska (MS) stej z „pragmatiskim a praktikabelnym“ doporučenjom na aktualnu debatu wo dźenderowanju w serbšćinje reagowałoj. Gremij rěčnych fachowcow je so při tym na přirodowědnej praksy orientował.

W měsće Karla Mayja spěwali

Donnerstag, 31. März 2022 geschrieben von:

Pančicy-Kukow (fk/SN). Chór Lipa je minjeny kónc tydźenja wuspěšne chórowe lěhwo w Hohensteinje-Ernstthalu přewjedł. 30 spěwarjow poda so ze swójbnymi do města, hdźež narodźi so před 180 lětami spisowaćel Karl May. Za Lipjanow bě dožiwjenje, po dołhim času internetowych probow zaso hromadźe zwučować.

A běchu sej tójšto předewzali: W probach nadźěłachu sej repertoire za mejski wustup w Lipsku, nalětni koncert w klóšterskej zahrodźe w Pančicach-Kukowje a za wosadny swjedźeń we Wotrowje. Nimo toho filowachu tež na spěwach za wuhotowanje prěnjeho swjateho wo­prawjenja w klóštrje a za wulki spě­wanski swjedźeń, na kotryž hotuja so w nazymje chóry z cyłeje Łužicy. Zo njeby so dźěćom spěwarjow při wěčnym probowanju dorosćenych wostudźiło, ­běchu sej swójbni wosebitu zabawu ­za nje wumyslili: Najwšelakoriše hry a eksperimenty pjerachow zahorichu.

Muzej přidźěłał

Mittwoch, 30. März 2022 geschrieben von:

Wojerecy (SN). Domowinska župa „Handrij Zejler“ je za planowanu šćežku „Via Sorabica HoyWoj“ wo serbskich stawi­znach města přidźěło Wojerowskeho měšćanskeho muzeja dóstała. Wo tym je zamołwity za projekt Werner Sroka wčera na posedźenju jeje předsydstwa informował. Nětko chce tamniša regionalna rěčnica Domowiny Sonja Hrjehorjowa ze serbskej projektnej managerku města wo pokročowanju projekta jednać.

Přichodnej wjerškaj župy budźetej přednošk wo něhdyšich Słowjanach we Wendlandźe 9. meje, kotryž so składnostnje wopyta wendlandskeje delega­cije wotměwa, kaž tež Serbski wječork 12. meje hromadźe z Domowinskej ­skupinu w Nowym Měsće. W ramiku projekta „Rěčna krajina we Wojerowskim regionje njech kćěje“, mytowaneho we wubědźowanju simul+, chcedźa nětko mjena ludźi zběrać, kotřiž wjesne dialekty swěrnje nałožuja. Jich žiwu lokalnu serbšćinu chcedźa nahrawać.

Serbska debata

Neuheiten LND