Wopyt ze šwedskeje LEADERoweje kónčiny we Łužicy
Rakecy/Budyšin (SN/at). LEADERowej regionaj Hornjołužiska hola a haty (OHTL) a „Torndalen 2020“ w Šwedskej dźěłatej hromadźe. Wobě stej perifernej pomjeznej kónčinje w změnje strukturow, hdźež zdobom připóznate narodne mjeńšiny bydla. Kaž André Köhler z Rakečanskeho běrowa OHTL zdźěli, tči za kooperaciskim předewzaćom ideja, so nastupajo temowe wobłuki zhromadne žiwjenje narodnych mjeńšin, regionalne tworjenje hódnotow, ale tež w přirodnym turizmje a wo zachowanju kulturneho namrěwstwa wuměnjeć.
Wosomwosobowa delegacija Samow a dalšich wobydlerjow doliny Tornedalen wot wčerawšeho swojeho tudyšeho LEADERoweho partnera wopyta. Prěni dźeń běchu w Budyšinje po puću. Tam rozhladowachu so w Serbskim muzeju. Při wuchodźowanju po měsće pobychu mjez druhim na Mikławšku, doniž so na rozmołwu z Domowinu njepodachu.
Prěnju serbsku fiblu w Kalawje prezentowali
Kalawa (WeM/SN). Před wjace hač 350 lětami bě wučer Juro Ermel w Kalawje wudał prěnje serbske ABC-knižki. Němska wyšnosć je fiblu dała 1669 přećiwo wótrym protestam serbskich a němskich měšćanow Kalawy (Calau) sćazać a zničić. Tola jedyn eksemplar Ermelowych ABC-knižkow bu wuchowany, kotryž wobswědči wo tym, zo je 1671 po zdaću wušoł druhi nakład. Tute je Spěchowanske towarstwo za serbsku rěč w cyrkwi z.t. nětko wudało jako faksimilowy ćišć z wědomostnym nastawkom profesora Michaela Ermela.
Składnostnje nowowudaća prěnjeje serbskeje fible je Choćebuske spěchowanske towarstwo na wosebite, ze serbsko-němskej nutrnosću zahajene, zarjadowanje minjeny štwórtk do Kalawskeje Serbskeje cyrkwje přeprosyło.
Delnjoserbska „sotra“ bórze online
Budyšin (SN/JaW). Přełožowanska aplikacija Rěčneho centruma WITAJ „sotra“ změje hišće lětsa delnjoserbsku sotřičku. To připowědźi nawoda delnjoserbskeje wotnožki RCW w Choćebuzu Bernd Melcher na pjatkownym posedźenju Zwjazkoweho předsydstwa Domowiny. Wone wotmě so znowa hybridnje w Budyskim Serbskim domje, hdźež bě pjatnaće čłonow gremija přitomnych, pjeć dalšich bě přez internet přiwjazane. „Najpozdźišo w septembru chcemy z delnjoserbskej wersiju do zjawnosće hić“, připowědźi Melcher. Kaž wón dale wuwjedźe ma delnjoserbska warianta „sotry“ 70 000 słowow wopřijimać a w dobrej rěčnej kwaliće z hornjoserbšćiny do delnjoserbšćiny a němčiny kaž tež nawopak přełožować móc.
Sorabija Lipsk ma nowe předsydstwo
Lipsk (SN/JBo). Wuhotowanje swójskich póstnic, chodojtypalenje, mejemjetanje, planowanja zetkanjow z němskimi přećelemi Lipšćanskich studentskich jědnatkowych radow – to su někotre z organizatoriskich dypkow, kotrež předsydstwu zapisaneho studentskeho towarstwa Sorabija Lipsk w běhu lěta předleža.
We wobłuku lětušeho mejemjetanja Rakečanskeje zakładneje šule ...
Hotuja so intensiwnjena swój jubilej
Wudwor/ Wodowe Hendrichecy (SN/JBo). Přihoty Serbskeho folklorneho ansambla Wudwor (SFAW) su pomału w finalnej fazy. Hladajo na 40lětne wobstaće cyłka, kotrež chcedźa wot 15. do 17. julija na Smolic statoku w Hórkach swjećić, dojědźechu sej čłonojo rejwanskeje skupiny minjeny kónc tydźenja do proboweho lěhwa do Wodowych Hendrichec (Seifhennersdorf).
Nimale sto rejwarjow a rejwarkow zwučowaše tam w štyrjoch skupinach. Probowe lěhwo ma městopředsyda SFAW Ambrož Handrik za jara wuspěšne. „Dorostowa skupina je dwě nowej reji nazwučowała. Hłowna skupina nawukny nowu reju ‚Schadźenje słónca‘ a najstarša skupina, kotraž bě so sobotu přidružiła, je z choreografom Georgijom Marinowom jazzowu reju nazwučowała a dwě staršej reji skrućiła.“ Dale Handrik měni, zo je ansambl „hladajo na časowy ćišć derje na jubilej spřihotowany. Probowy wulět je nam tójšto wjesela wobradźił. Mjez rejwarjemi a rejwarkami je stajnje dobra nalada – tak wězo tež z lóštom trenujemy.“ Za lěpšinu proboweho lěhwa ma Ambrož Handrik, zo su čłonojo dlěši čas hromadźe a so mjez sobu hišće lěpje zeznawaja.
Towarstwo Cyrila a Metoda z nowym nawodu
Towarstwo Cyrila a Metoda ma noweho předsydu. Předsydstwo je na swojej hłownej zhromadźiznje minjeny pjatk w Chrósćicach 44lětneho Cyrila Hančika do zastojnstwa wuzwoliło.
Chrósćicy (SN/MkWj). Na spočatku hłowneje zhromadźizny ma Chróšćanskej farskej žurli słyšachu přichwatani čłonojo dźěłowu rozprawu dotalneho předsydy Jurja Špitanka, kiž bě katolske zjednoćenstwo dwanaće lět swěru nawjedował. Rozprawa wšak bě koronapandemije dla zaćěmnjena: Před lětomaj, 2020, móžachu we Wotrowje poslednju hłownu zhromadźiznu přewjesć. Póstny seminar samsne lěto bě takrjec poslednje zarjadowanje. Dalši struchły podawk bě smjerć fararja Clemensa Hrjehorja a jeho chowanje loni po jutrach, wědźeše Jurij Špitank rozprawjeć.
Serbske reje w Praskim muzeju
Tradiciju tež w měsće dale haja
Lipsk (jb/SN). Mejemjetanje je jedyn z wosebitych wjerškow lěta za studentow a studentki towarstwa Sorabije Lipsk. K swojemu swjedźenjej při studentskim domje „Handrij Zejler“ na Arna Nitzschowej přeprosychu sej Sorabičenjo wčera přećelow z Lipska kaž tež ze studentskeho towarstwa Bjarnat Krawc z Drježdźan.
Dohromady dwanaće porow bě so na lětušim mejemjetanju wobdźěliło. Po starym wašnju zarejwachu wone reje k znatym ludowym spěwam kaž „Wjesele dźensa“, „Hdźež so módra zelenja“ a „Hančička wowčerjowa“. Wo instrumentalny přewod staraše so na akordeonje Sorabičan Syman Handrik. Najspěšniši w běhu wo mejski wjeršk bě Jurij Hantuš, kiž wuzwoli sej Theju Čórlichec za mejsku kralownu.
Dalše projekty předstajił
Přiwćicy (SN/at). Přichodne projekty je Lucian Kaulfürst, motiwator Domowiny za serbsku rěč w Malešanskej kónčinje, čłonam předsydstwa župy „Jan Arnošt Smoler“ Budyšin předstajił. Gremij schadźowaše so wčera w rumnosćach motiwatora w Přiwćicach. Tak je na přikład 29. julija serbski lěćny swjedźeń we wsy z programom a spěwnym wječorom w našej maćeršćinje předwidźany. Kaž Katja Liznarjec, regionalna rěčnica Domowiny za teritorij Budyskeje župy, zdźěli, chce Kaulfürst serbske radijo za dźěći z wokoliny hromadźe z Łužiskej medijowej syću na 4. etaži Budyskeho Serbskeho domu krok po kroku natwarić. Radijowe wusyłanja chcedźa lětsa w druhim połlěće zahajić. Wšelake techniske nastroje pak dyrbja hišće wobstarać a za projekt dźěći a swójby wabić. Motiwator ma za trěbne, pokazowaki po wsy zestajeć, zo bychu zajimcy jeho běrow našli.
Předsydstwo je nalětni koncert z chórom Meja 1. meje w Malešanskej cyrkwi jako jara poradźeny hódnoćiło. Tam nazběrane 364,40 eurow přewostaja podźělnje wulkowosadźe Hrodźišćo (Kirchspiel Gröditz) a ćěkańcam z Ukrainy.
