Prěnja dźěłarnička noweho imersiwneho delnjoserbskeho rěčneho programa za dorosćenych „Zorja“ je so wčera po třoch dnjach w Choćebuskim měšćanskim muzeju w jendźelskej rěči zakónčiła. Arapaho-Indian a profesor za antropologiju a indigene studije na Uniwersiće Montana (USA) dr. Neyooxet Greymorning je wobdźělnikam swoju inowatiwnu metodu ASLA©™ předstajił a rozłožił, kak sej cilowu rěč aktiwnje přiswojiš, bjez toho zo rěč wjetšiny nałožuješ. Mjenowanu metodu zhromadźenstwa First Nation w USA, Kanadźe a Awstralskej wuspěšnje wužiwaja.

Choćebuz (SN). Na kromje dźěłarnički projekta „Zorja“ za rewitalizaciju delnjoserbšćiny staj so wčera popołdnju kubłanska referentka Domowiny Katrin Suchec-Dźisławkowa a prof. Neyooxet Greymorning rozmołwjałoj. Greymorning je swoju maćeršćinu arapaho, kotruž bě jenož hišće połsta ludźi nałožowało, ze swójskej metodu tak mjenowaneje dospołneje imersije wožiwił. Dorosćeni wuknu rěč – kaž dźěći swoju maćeršćinu – předewšěm z wobrazami a dospołnym zanurjenjom do noweje rěče.