Wožiwjenje hornjo- a delnjoserbšćiny steješe w srjedźišću posedźenja Zwjazko­weho předsydstwa Domowiny minje­ny pjatk w Slepom. Prěni raz za do­bu koronapandemije móžachu zajim­cy zarjadowanje jako hosćo direktnje na žurli sćěhować.

Slepo (SN/at). Přehlad wo dźěławosći we Wojerecach zaměstnjeneho Serwisoweho běrowa za serbšćinu w Sakskej je jeho sobudźěłaćer Jan Kral podał. W nošer­stwje Domowiny je zarjadnišćo komunam w serbskim sydlenskim rumje wo­krjesow Budyšin a Zhorjelc wot oktobra 2019 přede­wšěm ze zeserbšćenjom zarjadniskich tekstow poboku. Přednošowar rysowaše koncepcionelne nadawki a kak je so dotal poradźiło je spjelnjeć. Na přikład je Jan Kral wuwjedł, zo staj hro­madźe z Francisku Grajcarekec hnydom započałoj jednotliwe komuny wopytać, zo bychu jich zarjadnistwa we wužiwanju serbšćiny poradźowali. Wobmjezowanja koronapandemije su tele prócowanja přetorhnyli. Nětko pak staj opti­mistiskaj tele wopyty pokročować móc, a to přede­wšěm w Zhorjelskim wokrjesu.