Budyšin (jwo/SN). Serbske młodźinske towarstwo Pawk je swój štyridnjowski seminar z młodostnymi němskich narodnych mjeńšin spočatk tydźenja zakónčiło. Póndźelu su so posledni wobdźělnicy na dompuć podali. Mjez cyłkownje sydom wobdźělnikami běchu zastupjerki a zastupjerjo mjeńšiny Danow w Němskej a Saterskich Frizow.

Hłownje wěnowali su so młodostni diskriminaciji, w kajkej formje so jewi a kak jej znapřećiwić. Přitomni rozprawjachu wo cyle wosobinskich nazhonjenjach. Zdobom pak sej wuwědomichu, zo njejsu jenož potrjecheni, ale tež skućićeljo. „Dyrbimy diskriminaciju nastupajo přeco zaso swoje postupowanje reflektować. Za najwažniše při tym mam, zo ze sobu rěčimy“, měni čłon Pawka Chrystof Grofa. Hromadźe z trenarjom Thomasom Hauptvoglom z Mnichowa su so z temu diskriminacija we wšěch fasetach roze­stajeli.

Budyšin (SN/bn). „Zo mi słowa pobrachuja, so mi přečasto njestanje. Dźakuju so wam za lube słowa a počesćenje. Rjadujo akty Serbskeho šulskeho towarstwa (SŠT) sym so sama dźiwała, kelko smy zhromadnje zdokonjeli. Do přichoda sej přeju, zo serbšćinu dale šěrimy a we wobłuku cyłotneho procesa wot žłobika hač k uniwersitnemu wukubłanju wuwiwamy.“ To rjekny Ludmila Budarjowa na rozžohnowanskej swjatočnosći minjeny pjatk w Budyskim Serbskim domje. Do jeje narěče běchu zastupjerjow politiki, wuměłstwa a pedagogiki tři lětdźesatki trajace skutkowanje Budarjoweje na čole SŠT chwalobnje zjimali a hódnoćili. Mjez druhim dźakowachu so jej nawoda Sakskeho krajneho zarjada za šulu a kubłanje Matthias Peter, zapósłanc Sakskeho krajneho sejma Marko Šiman, prěni přirjadnik Budyskeho krajneho rady Udo Wićaz (wobaj CDU) kaž tež Benedikt Dyrlich. W mjenje Choćebuskeho wyšeho měšćanosty wuzběhny tamniša zamołwita za serbske naležnosće Anna Kosacojc-Kozelowa: „Wšitcy, kotrymž serbšćina na wutrobje leži, měli Wam přewšo dźakowni być.

Štož njebě spočatk lěta znatych přičin dla móžno, su čłonojo a čłonki Serbskeho šulskeho towarstwa a mnozy hosćo zjawneho žiwjenja minjeny pjatk w Budyšinje nachwatali. Swjatočne rozžohnowanje wjelelětneje předsydki Ludmile Budarjoweje přitomnym hišće raz wuwědomi, kak njesprócniwje je so wona wot politiskeho přewróta hač do dźensnišeho dnja na dobro serbskeho kubłanja angažowała. To wotbłyšćowaše předewšěm ju portretowaca widejowa prezentacija z komentarami wjacorych rowjenkow, kotruž chce SŠT přichodnje na swojej internetnej stronje spřistupnić. Kónc januara wolenemu a nětko wobkrućenemu nowemu předsydstwu njebudźe potajkim přelochko, po jeje stopach kročić. Přiwšěm – to bě na zhromadźiznje takrjec mjez linkami pytnyć – njeměli so starosćić. Dobrych idejow dźě je dosć, a najwažniše kajkosće Budarjoweje wuprudźeja tež nětčiši zamołwići na čole SŠT: wutrajnosć, konstruktiwnosć a wosebje zapal. Bosćan Nawka

Loni, jako bě Praske Towarstwo přećelow Serbow (SPL) prěnje rěčne lěhwo serbšćiny w Budislavje přewjedło, wobdźěli so tam Kryštof Peršín hišće jako šuler. Lětsa pak skutkowaše wón hižo jako docent kursa za započatkarjow – spěšna to serbska karjera 24lětneho, pochadźaceho z Hradeca Králové, kiž w Brnje čěšćinu a rušćinu na wučerstwo studuje.

Serbšćinu wuknyć započa Kryštof Peršín lěta 2018 na ferialnym kursu Serbskeho instituta w Budyšinje. Tež loni bě za njón přizjewjeny, korony dla pak bu kurs wotprajeny, a SPL staraše so wo narunanje. Do mjenowaneho towarstwa bě Čech hižo w lěće 2016 zastupił. „Sym přez internet na nje storčił – hdyž z Prahi njejsy, njeje lochko je zeznać“, Kryštof powěda. „Zajimuju so za słowjanske rěče a kultury. Wědźach, zo Serbja su, doma staj staršej wo nich powědałoj. W Čechach je tróšku znate, zo tajki małki słowjanski lud eksistuje.“ Samo na uniwersiće w Brnje su jónu kurs wo kulturje Serbow poskićili. „Mjeztym mam serbskich přećelow. Chceš-li rěč nałožować, je wažne mjezy­čłowjeske styki nawjazać – a Serbja su super cool.“