Pančicy-Kukow (SN/MWj). Nic k mejemjetanju jako wulkemu wjesnemu swje­dźe­njej, ale k nyšporej takrjec jako narunanje koronoweje pandemije dla zhromadźi so sobotu popołdnju tójšto wobydlerjow při Kukowskim pomniku za padłych swětoweju wójnow. Hudźbnje a słownje wuhotowałoj stej jón młodostni Šołćic a Šnajdrec swójby hromadźe z fararjom Tomaszom Dawidowskim. Na te wašnje spominachu na 30lětnu tradiciju mejemjetanja na tymle městnje. Do swojich modlitwow zapřijachu tohorunja wopory pandemije, ale runje tak dźakownosć za rjanu tradiciju mejemjetanja.

Budyšin (SN/JaW). Hač wotměje so lětsa alternatiwny swjedźeń k narunanju korony dla wotprajeneho Mjezynarodneho folklorneho festiwala „Łužica“, chce Domowina kónc junija rozsudźić. To zdźěli wčera nowinski rěčnik Marcel Brauman po wuradźowanju jeje wjednistwa z regionalnymi rěčnicami a referentami Domowiny. Jako přičinu podawa třěšny zwjazk tuchwilne połoženje koronapandemije dla. Njewěstosć, što budźe scyła móžno, nuzuje Domowinu hakle planować, „hdyž budźe jasne, kotre postajenja płaća“. Referent za hospodarske a infrastrukturne naležnosće Pětr Brězan skedźbni na to, „zo měli kulturne ćělesa ze wšěch regionow Łužicy zapřijeć. Při­wšěm so swjedźeń jenož wotměje, njebudźe-li hižo wobmjezowanjow kaž wotstawk, nahubnik a zakaz alkohola“, rěka w nowinskej zdźělence Domowiny.

Jědnaće žonow a jedyn muž tworja nowe předsydstwo župy „Michał Hórnik“ Kamjenc

„Kamjenska župa so wobstajnje dale wo­młodźa. A to je derje tak.“ Tole zwěsći Měrko Šmit na hłownej a wólbnej zhromadźiznje župy minjeny pjatk w Chróšćanskej „Jednoće“, hdźež je jako nawoda zhromadźizny delegatow wo přiwzaću dweju młodźinskeju klubow wothłosować dał.

Jednohłósnje su delegaća młodźinskej klubaj Konjecy-Šunow a Pančicy-Kukow jako pjaty a šesty do župy přiwzali. „Smy loni wo přistup k Domowinje prosyli, dokelž smy serbski klub a hajimy serbske nałožki a tradicije. Nimo toho mamy wjacore swójske zarjadowanja w běhu lěta, kaž na přikład swjedźeń němsko-serbskeho přećelstwa DSF-party. Tak dopo­kazujemy, zo móža němscy a serbscy młodostni wuběrnje mjez sobu wuńć“, wujasni zastupnik Konječansko-Šunowskeho kluba Chrystof Hrjehor. Za Pančičansko-Kukowski klub rozłoži Richard Hawš, zo su jón před lětomaj załožili, zo bychu „sylnišu zhromadnosć hajili a čłonow hromadu wjedli. Tak pokazujemy, zo móžemy zhromadnje něšto zahibać.“