Prózdniny přihot kopolakow njehaća
Serbske wólbne kopolaki přihotuje předsydstwo župy „Handrij Zejler“, zo móhło pozicije kandidatow k wólbam wyšeho měšćanosty Wojerec nastupajo serbske naležnosće sčasom zhonić.
Wojerecy (pi/SN). Domowinska župa „Handrij Zejler“ chce kandidatam za wólby wyšeho měšćanosty Wojerec 6. septembra sčasom zjawne prašenja k serbskim naležnosćam sposrědkować. Zajimcy maja hišće chwile hač do štwórtka, 2. julija, zo bychu swoju kandidaturu přizjewili. Najebać wulke šulske prózdniny chcedźa čłonojo župneho předsydstwa na posedźenju 22. julija serbske wólbne kopolaki rozjimać a schwalić. Kaž župa informuje, je so gremij na tele postupowanje na wuradźowanju wčera wječor w bróžni domu Domowiny we Wojerecach dorozumił.
Staršim w Budyšinje a Radworju pomoc přilubili
Zwjazkowe předsydstwo Domowiny je so na swojim zetkanju minjeny pjatk w Slepom tež kubłanskim temam wěnowało a dwě personalnej naležnosći zrjadowało.
Slepo (SN/JaW). Prezidij Zwjazkoweho předsydstwa Domowiny je zaso kompletny. Minjeny pjatk wuzwolichu z jeničkim hłosawzdaćom Delnjoserba Maksimiliana Hasackeho do gremija. „Wjeselu so, zo sym młodeho čłowjeka za sobudźěło zdobyć móhł. To budźe zawěsće wobohaćenje za gremij a wšitkich jeho čłonow“, rjekny předsyda Domowiny Dawid Statnik. Hasacki dźěła jako referent w Choćebuskim kompetencnym centrumje zwjazkoweho wobswětoweho ministerstwa za škit klimy w industriji, kotraž wjele energije přetrjebuje. „Sym jara wjesoły, zo sym we Łužicy dźěło našoł. Nětko chcu tež wjac zamołwitosće přewzać“, Delnjoserb zwurazni.
Wotškódnjenje, za čo?
Maja w sebi mysl zjednoćeneje Europy
Krabatowe towarstwo chce styki k dalšim cyłkam nawjazać a serbskosć dale skrućić
Lětstotki chowamy jako Łužičenjo, wosebje pak jako Serbja w sebi duch kuzłarja Krabata. Zašłe lěta je zajim přiběrał. Zo by tomu tak wostało, wo to prócuje so Krabatowe towarstwo. Milenka Rječcyna je so z jeho předsydu Reinerom Deutschmannom rozmołwjała.
Što maće za wjeršk dźěławosće minjenych lět?
R. Deutschmann: To běše bjezdwěla Krabatowy swjedźeń na Budyskim hrodźe. Přičina, z kotrejež runje tónle swjatk wuzběhuju, je, zo mějachmy tehdy w Serbskim muzeju wustajeńcu, wěnowanu realnej wosobje Krabata, wyškej Jankej Šajatovićej. Lěto po tym slědowaše swjedźeń podłu Chorwatsko-słowjenskej mjezy tam, zwotkelž běchu jeho prjedownicy a hdźež jeho potomnicy hač dodźensa skutkuja. Lětsa wšak swjedźeń njebudźe, na kotrymž móhli zwučenu wulku ličbu zajimcow witać.
Pandemija haći mnohe towarstwa w skutkowanju. Kak začuwaja to čłonojo Krabatoweho towarstwa?
Nowa normalita z planom hygieny
Do Budyskeho Serbskeho domu ma zaso normalita zaćahnyć. Tohodla stej Załožba za serbski lud a Domowina plan hygieny zdźěłałoj, kotryž maja personal tam zaměstnjenych institucijow a wopytowarjo w jenakej měrje dodźeržeć.
Budyšin (SN/at). Domowina a Załožba za serbski lud wróćitej so po wolóženjach w zjawnym rumje koronapandemije dla k wěstej normaliće. To zwurazni plan hygieny, kotryž ma na najprjedy njewěsty čas za Serbski dom w Budyšinje płaćić. Kaž Domowinski zarjad informuje, su so referenća a regionalne rěčnicy minjeny tydźeń na to dojednali. Po słowach jednaćela Domowiny Marka Kowarja chcedźa „telko normality a wotewrjenosće, kaž je móžno. To pak je dołhodobnje jeno zawěsćene, hdyž nowym koronainfekcijam zadźěwamy. Dołhož šćěpjenje přećiwo koronje k dispoziciji nimamy, njeje stara normalita móžna.“
Sorabija z nowym předsydstwom na čole
Chrósćicy (mtw/SN). Hłowna a zdobom wólbna zhromadźizna Sorabije wotmě so minjenu sobotu w Chrósćicach. Korony dla zetka so 25 studentow lětsa prěni raz we Łužicy a nic kaž hewak zwučene w „Centrifuze“.
Předsydka Marie-Luise Matješkec zhromadźiznu zahaji a rozprawješe zhromadnje z městopředsydu Józefom Donatom wjerški dweju lět. Tak zhladowaštaj na přikład na wuspěšny póstniski program loni a lětsa kaž tež na wuske styki k dalšim studentam w Lipsku. Čłonojo Sorabije su zakładnu šulu w měšćanskim dźělu Connewitz wopytali a tam wo Serbach rozprawjeli.
Zhromadnje postupować
Wojerecy (SN/at). Prezidij Domowiny a předsyda sakskeje Rady za serbske naležnosće Marko Suchy staj sej přezjednaj, zo njesmědźa so aktualne wužadanja nastupajo strukturnu změnu we Łužicy tak wuskutkować, zo so substanca Serbstwa znowa pomjeńši. Suchy, kiž wobdźěli so jako hósć na wuradźowanju wčera we Wojerecach, dopomni zhladujo do stawiznow na to, zo bě tudy dotal kóžda změna struktury bytostne straty zawinowała.
Kaž z nowinskeje zdźělenki Domowiny wuchadźa, je dojednanje mjez serbskej radu a třěšnym zwjazkom wo praktiskej kooperaciji předwidźane. Tak móhła Domowina jako zastupjerka zajimow našeho ludu po serbskim zakonju serbsku poziciju přidźěłać, je-li rada wot krajneho sejma abo knježerstwa wužadana, k naćiskam zakonjedawarstwa a ćišćenkam zapósłancow abo frakcijow stejišćo zabrać. Předsyda Domowiny a sam čłon rady Dawid Statnik, „konsekwentne postupowanje“ Sucheho wita: „Nam njeńdźe wo abstraktne prawniske debaty, ale wo cyle konkretne kročele na dobro serbskeho kubłanja, serbskeje kultury a serbskeje rěče w zjawnym rumje.“
Serbske zajimy derje zastupowane?
Domowina přepruwuje skutkownosć swojich gremijow.
Budyšin (SN/JaW). Zwjazk Łužiskich Serbow přepruwuje skutkownosć zastupnistwow swojich a serbskich naležnosćow. Wotpowědny naprašnik su zastupjerjam Domowiny w cyłkownje 28 gremijach, kotrež sahaja wot europskeje hač do komunalneje politiki, připósłali. To zdźěli nowinski rěčnik Marcel Brauman.
Kaž referent za nutřkowne naležnosće Werner Sroka rozłoži, je zakład naprašowanja „nadawk w dźěłowych směrnicach Domowiny na dobu wot lěta 2019 do 2021“. Tak ma wona hač do klětušeje 20. hłowneje a wólbneje zhromadźizny swoje zastupnistwo „w druhich towarstwach, gremijach a funkcijach analyzować“.
Myta za wědomostny dorost
Maćica Serbska je wozjewiła, koho z dorostowymi mytami Arnošta Muki, Bogumiła Šwjele a Michała Hórnika wuznamjeni. Prěni raz běchu kandidaća wědomostne dźěła we wšěch třoch kategorijach zapodali.
Budyšin/Choćebuz (SN/bn). Myto Arnošta Muki měri so na studentki a absolwentki/ studentow a absolwentow uniwersitow a wysokich šulow. Za nje běchu štyri namjety dóšli, kotrež „su po tematice resp. wědomostnych disciplinach jara wšelakore. Zwjeselace je, zo jedna so wo dźěła w hornjoserbskej, delnjoserbskej a němskej rěči“, městopředsydka Maćicy Serbskeje dr. Anja Pohončowa zdźěli.
Posudźowanska komisija je myto jednohłósnje Annje Měrćinowej za esej „Alojs Andricki – martrar serbskeho ludu. Wjacewoznamowosć rjekowskeho naratiwa po Druhej swětowej wójnje“ přiznała. Tamnym třom wudźěłkam, kotrež wěnuja so Jurjej Chěžce, serbskej narodnej drasće jako wobstatk kulturneho namrěwstwa a „róli serbskich žónskich“, spožča spěchowanske myta. „Tak zwuraznja Maćica Serbska swoje připóznaće za wysoki niwow wšitkich zapodatych dźěłow“, dr. Pohončowa podšmórny.
Rownišćofararja Domaški wobnowić
Předewzaćow na polu serbskich wopomnišćow lětsa přewjele njeje. To zwěsćichu předwčerawšim čłonojo pomnikoweho wuběrka Maćicy Serbskeje na swojim wuradźowanju w Budyskim Serbskim domje.
Budyšin (ML/SN). Swójbne pohrjebnišćo fararja Michała Domaški, zemrěteho 7. junija 1897 a w Ketlicach pola Lubija pochowaneho, chcedźa hišće lětsa wobnowić. Wutoru su so zastupnicy Serbskeho ewangelskeho towarstwa (SET) a Ketličanskeje wosady na to dojednali. Předsydka Maćičneho pomnikoweho wuběrka Trudla Malinkowa rozprawješe wo tym na zeńdźenju.
Před 200 lětami w Komorowje pola Rakec rodźeny Michał Domaška bě wot lěta 1849 do 1892 farar w Nosaćicach, pilny serbski spisowaćel a kěrlušer. Jeho pohrjebnišćo na Ketličanskim kěrchowje pyši wulki křiž a ma štyri narowne kamjenje za fararja a swójbnych. Kamjenje chcedźa wobnowić a pismo čitajomne sčinić.
Před dwaceći lětami je Ketličanska wosada wobnowjenje pohrjebnišća wotpokazała. Nětko pak su tam k tomu zwólniwi. Wosada, SET a Załožba za serbski lud chcedźa renowěrowanje poslednjeho wotpočinka fararja Michała Domaški zapłaćić.
