Institut je partner bazy
Hnydom ze „Zernički“ spěwali
Budyšin (mm/SN). Čas čakanja bě skónčnje nimo. Serbski superintendent Krystof Rummel z Hodźija a wosadna fararka Jadwiga Malinkowa ze Slepoho předstajištaj druhu adwentnu njedźelu na adwentničce serbskich ewangelskich wosadnych wčera na Michałskej farje w Budyšinje nowe spěwarske za dźěći a młodostnych. Spodobnu 164stronsku knihu ze schowanej spiralnej wjazbu stej Serbske ewangelske towarstwo a Serbski wosadny zwjazk wudałoj. Projekt je so wot Załožby za serbski lud, Ewangelskeje cyrkwje Berlin-Braniborska-šleska Hornja Łužica a wot mnoho darićel(k)ow spěchował.
Okcitansko-serbske zetkanje
Drježdźany (fk/SN). Muske hłosy znošowachu so sobotu nawječor po hodownych wikach na Drježdźanskim Körnerowym naměsće. Tójšto z tych, kotřiž tam rumpodicha honichu abo sej horce winko a praženu kołbasku słodźeć dachu, so prašachu, w kotrej rěči drje spěwaja. To wujasnić njebě ani tak jednore, přetož słyšeć běchu wotměnjejo okcitanske a serbske spěwy.
Pěsnički w romaniskej rěči z južneje Francoskeje přednjesechu spěwarjo skupiny Lo Cocut, kotřiž hižo tójšto lět na wjacorych hodownych wikach w Drježdźanach a wokolinje wustupuja. Spěwy z Łužicy přednjesechu z nimi spřećeleni Přezpólni. Woni zaspěwachu nimo serbskich ludowych pěsnjow ze swojeho repertoira tež dwě juhomorawskej a jednu słowaksku pěsničku. Nimo toho zaklinča – na dnju 200. posmjertnych narodnin Korle Awgusta Kocora – mócnje tež serbska hymna, kotruž serbscy wopytowarjo wikow spontanje sobu spěwachu.
Po połdrahodźinskim romanisko-słowjanskim „spěwarskim duelu“ přeprosychu Okcitaničenjo Serbow do swojeho Drježdźanskeho přebytka.
Tuchwilna struktura załožby do ćežow wjedźe
Přichodnu rjadnu hłownu zhromadźiznu Domowiny je jeje zwjazkowe předsydstwo za 22. apryl 2023 do Choćebuza zwołało. Z tym slědowaše gremij na posedźenju minjeny pjatk w Serbskim ludowym ansamblu namjetej prezidija. Rezimej skutkowanja serbskich čłonow w radźe Załožby za serbski lud je přitomnym wobsahowje nowe wužadanje připowědźił.
Budyšin (SN/at). Klětu so štyrilětna aktualna wólbna doba serbskich załožbowych radźićelkow a radźićelow skónči. Rezimej jich skutkowanja bě hižo dypk dnjoweho porjada na posedźenju zwjazkoweho předsydstwa 25. septembra. Chorosće předsydki rady dla dyrbjachu tematiku přestorčić. Minjeny pjatk jimachu so nimo předsydki někotři z nich słowa.
Přewšo trěbna změna
Jubilejna Maćična konferenca
Budyšin (SN/bn). Lětsa swjeći serbske wědomostne towarstwo Maćica Serbska (MS) 175. róčnicu swojeho załoženja. Tři lětdźesatki po jeho znowawožiwjenju zhladuja z konferencu pod hesłom „Skutkowanje MS w 20. a 21. lětstotku“ na aktiwity po 1989 a rozjimuja prašenja wo sebjezrozumjenju towarstwa tehdy, dźensa a w přichodźe.
Konferencu, kotruž wuhotujetej MS a Serbski institut, wotměja jutřiši pjatk a zajutřišim w Budyskim Serbskim domje. W pjeć modulach k předstawiznam, wozrodźenju towarstwa, mjezynarodnym stykam, skutkowanju Maćičnych cyłkow a k wužadanjam do přichoda přednošuja mjez druhim Lubina Malinkowa wo Maćicarju a tibetoloze Augusće Hermannje Francke, Piotr Pałys wo „Połoženju zakładneho kamjenja za nowy Serbski dom w lěće 1947“ a Tadeusz Lewaszkiewicz wo powšitkownych poćahach MS a druhich Maćicow. Petr Kaleta porěči wo „wědomostnych poćahach MS k čěskemu Towarstwu přećelow Serbow na spočatku 21. lětstotka“. Edmund Pjech chce „skutkowanje MS we Weimarskej republice a w 1990tych lětach“ přirunować, dr. Hartmut Leipner wěnuje so historiskej róli duchownych w MS.
Po starym recepće warili
Skedźbnja na 100. róčnicu
Wojerecy (SN). Předsydstwo Domowinskeje župy „Handrij Zejler“ Wojerecy je na swojim wutornym posedźenju lětušu schadźowanku za swójby ze sto a połsta ludźimi w Kulowje jako wuspěšnu wuhódnoćiło (SN rozprawjachu). Klětu chcedźa na druhim městnje zaso tajke zarjadowanje w nazymniku přewjesć. Składnostnje 100. róčnicy załoženja wotnožki Serbskeje ludoweje banki we Wojerecach w lěće 1922 je čłon předsydstwa Werner Sroka koncepciju prěnjeje stacije puća serbskich stawiznow „Via Sorabica Hoywoj“ předstajił. Na fasadźe twarjenja w starym měsće ma so foto domu z tehdomnišim napismom „Serbska ludowa banka – Wendische Volksbank“ připrawić, kaž kožupan Marcel Brauman informuje. Cyły historiski puć ma klětu w kooperaciji župy z městom nastać. Dotal předleža z pjera Wernera Sroki ideje za 14 stacijow. Za nowe lěto planuje župa kubłansku jězbu do Domu Měrćina Nowaka-Njechorńskeho a wopyt swojeho předsydstwa pola wjesnych towarstwow.
Přichodna „Rěčna swětłownja“ budźe 15. decembra hromadźe z wobdźělnikami rěčnych kursow.
Serbske filmy na wulkej płachće
Budyšin (SN/bn). Pod hesłom „Serbske kino“ je župa „Jan Arnošt Smoler“ předwčerawšim wosebity cineastiski dźeń w Budyskim Filmowym palasće wuhotowała. Dopołdnja dožiwichu dźěći z třoch pěstowarnjow sprjewineho města na połnje wobsadźenej žurli trikowe filmy, kaž na přikład „Myškolinku“. Swójbne popołdnjo ze serbsce synchronizowanym paskom „Mała wjera“ přiwabi něhdźe 25 zajimcow. Dwójce telko wopytowarjow zličichu na wječornym programje z dohromady štyrjomi přinoškami. Najprjedy pokazachu dokumentaciji „Serbscy ludowi hercy“ wo tudyšej hudźbnej tradiciji a typiskich serbskich instrumentach kaž tež „Njepřetrachu jenož mólby“, portretowaceje čěskeho wuměłca, ludoweho slědźerja a přećela Serbow Ludvíka Kubu. Slědowaše nahrawanje telewizijneho wusyłanja „Serbske wokno“ z lěta 2002, wopřijimace mjez druhim premjeru hry „Swěca abo měca“ a wotewrjenje Smolerjec kniharnje na Budyskej Pchalekowej. Hybridny, z animěrowanych a realnje sfilmowanych scenow montěrowany pask „Z wójny jědu“ Maje Nageloweje a Juliusa Günzela wječor skulojći.
