Wjeselo nad „młodej frakciju“

Dienstag, 20. Dezember 2022 geschrieben von:

Kaž mnohim serbskim towarstwam njebě tež Zwjazkej serbskich wuměłcow cyłu chwilu znatych přičin dla móžno, adwentničku wuhotować. Minje­ny pjatk je něhdźe 25 čłonkow a čłonow ZSW w Budyskej Röhrscheidtowej bašće tradicionalne dohodowne zeńdźenje po lětomaj přestawki znowa wotměło.

Statnik: Rozsud běše „zmylk“

Montag, 19. Dezember 2022 geschrieben von:

Budyšin (SN). Předsyda Domowiny, Dawid Statnik, je čłonow narodneje organizacije wo wodaće za swój „zmylk“ prosył, zo je zašłu póndźelu jako radźićel CDU we wokrjesnym sejmiku za namjet AfD hłosował. Do toho bě Statnik swoje zadźerženje wjacekróć wusprawnosćał, mjez druhim dwójce napřećo Serbskim Nowinam. Tola mnohe rozmołwy „su mi wuwědomili, kak jara sym sobučłowjekow přesłapił“, rěka w aktualnym stejišću Statnika. Dale: „We wokomiku mojeho rozsuda njeběch sebi politiskeje dimensije tutoho wědomy. Za to chcu so zamołwić.“ A: „Zmylk je ćim wjetši, dokelž njewotpowěduje mojemu swětonahladej a mojemu přeswědčenju. Naša organizacija, čejiž předsyda sym, steji za wotewrjenosć. Tole nochcu z mojim wopačnym rozsudom do prašenja stajić.“

Julian Nyča, čłon załožboweje a sakskeje serbskeje rady, běše na Facebooku Statnika namołwił, so rozsudźić, dokelž so wotwisnosće mandata na lisćinje politiskeje strony ze zastojnstwom na čole nadstronskeho třěšneho zwjazka „nje­znjesu“. Nyča: „Chcu, zo Dawid předsyda wostanje.“

Hodownička Sorabičanow z bohatym programom

Freitag, 16. Dezember 2022 geschrieben von:

Lipsk (JBo/SN). Studowacy Lipšćanskeje Sorabije běchu so wčera w klubowni studentskeho domu na Arna Nitzschowej, w tak mjenowanej centrifuze, zetkali, zo bychu tam swoju hodowničku woswjećili. Do pisaneho wječorneho programa podachu so z Benediktom Dyrlichom, kotryž čitaše ze swojeje noweje prozoweje zběrki „Na motawych mjezach“. Předewšěm pak tež dale spo­srědkowane žiwjenske stawizny a nazhonjenja basnika běchu Sorabičenjo a Sorabičanki z wulkim zajimom slědowali. Jich zahoritosć wotbłyšćowaše runje tak rozmołwne koło po čitanju.

Rabat móhł rozsud wolóžić

Donnerstag, 15. Dezember 2022 geschrieben von:

Zhromadna wuprawa sobustawow z Delnjeje a Hornjeje Łužicy su wupruwowane wjerški w skutkowanju Zwjazka serbskich rjemjeslnikow a přede­wzaćelow kóžde lěto. To znajmjeńša su Serbske Nowiny z delnjoserbskeho wobłuka zhonili.

Załožba z DIGISERBom za digitalnu serbšćinu

Mittwoch, 14. Dezember 2022 geschrieben von:

Budyšin (SN/MiP). Před někak lětom wotmě so 2. serbska digitalizaciska konferenca, na kotrejž wobdźělnicy wuslědki digitalizacije serbskeho zjawneho žiwjenja wuhódnoćichu a dalše ćežišća definowachu. Proces je dynamiski a dyrbi so njepřestawajcy přiměrjeć. „Jako wažny element transparency digitalnych poskitkow- ale tež jako forum za wšitke serbske digitalne temy- smy internetny portal DIGISERB wuwili“, praji nam Felicitas Birkhofenowa, zamołwita za zjawnostne dźěło w Załožbje za serbski lud. „Tu namakaš informacije, přiručki, nahrawane přednoški a workshopy kaž tež terminy, kotrež serbske digitalne žiwjenje nastupaja“, wona rozłožuje.

Serbski dom pomórany

Mittwoch, 14. Dezember 2022 geschrieben von:
Tele difamowace pomóranje na wonkownej sćěnje Serbskeho domu pod woknami Serbskeje kulturneje informacije su wčera našli. Dotal njeznaći su tam z čornej barbu němske wopřijeće za ludaka popryskali. Njeskutk steji po zdaću w zwisku z demonstraciju předwčerawšim na Póstowym naměsće w Budyšinje. Po słowach předsydy Dawida Statnika Domowina z toho wuchadźa, zo popryskanje do demon­stracije hišće njebě. To je prawdźepodobnje, rěka ze Zhorjelskeje policajskeje direkcije. Domowina je chłostanske wozjewjenje wěcneho wobškodźenja dla zapodała. Areal před Serbskim domom jako nachwilnu městnosć za póndźelne demonstracije bě Zwjazk Łužiskich Serbow wótrje kritizował. Foto: Dawid Statnik

Zhromadnje za wožiwjenje serbšćiny we Wojerecach

Dienstag, 13. Dezember 2022 geschrieben von:

Diana Karbowa budźe wot pjatka nowa społnomócnjena za serbske naležnosće Wojerec. Wčera wječor běše wona na nastupnym wopyće pola předsydstwa župy. Tema: prěni zhromadny projekt.

Wojerecy (SN). „Sym Serbowka a so z wutrobu za Serbow we Wojerecach angažuju“, praješe Diana Karbowa na swojim prěnim wuradźowanju z předsydstwom župy „Handrij Zejler“ na sydarni domu Domowiny w měsće nad Čornym Halštrowom. Runja swojej předchadnicy Gabrieli Linakowej budźe wona tutu funkciju čestnohamtsce wukonjeć. A tež wona je sobudźěłaćerka měšćanskeho zarjada. Diana Karbowa je projektna managerka a ma spěchowanje hospodarstwa na starosći. Wyši měsćanosta Torsten Ruban-Zeh (SPD) widźi maćernorěčnu Serbowku jako partnerku župy při zwoprawdźenju projektow w ramiku změny strukturow.

SŠT nowy projekt LUCIJA předstajiło

Montag, 12. Dezember 2022 geschrieben von:

Hłowna zhromadźizna je spomóžna přiležnosć, zo njebychu čłonki a čłonojo jenož wo zdokonjanym dźěle a jeho hódnoćenju słyšeli, ale zdobom na­drobniše wo nowych předewzaćach Serbskeho šulskeho towarstwa zhonili.

Smjerdźaca (MiR/SN). Wo dźěławosći Serbskeho šulskeho towarstwa (SŠT) w minjenym lěće je předsydka Katharina Jurkowa zhromadnje z jednaćelom Andreasom Ošiku na hłownej zhromadźi­znje cyłka minjeny pjatk w Smjerdźacej rozprawjała. Do ćežišćow w towarstwowym skutkowanju słušeše mjez druhim klawsurne posedźenje předsydstwa, na kotrymž su přitomni ideju zrodźili medijowopedagogiski projekt wuwić. Mjez dalšimi wjerškami zhoni přichwatanych přibližnje 40 sobustawow, zo je SŠT kooperaciju z kubłanskim srjedźišćom LIPA w Smjerdźacej wožiwiło a prěnje zhromadne projekty přewjedło. Do domicila LIPY bě SŠT zdobom na hłownu zhromadźiznu přeprosyło.

Ćělesa njech Domowina namjetuje

Montag, 12. Dezember 2022 geschrieben von:

Zhromadne dźěło Domowiny z wjednistwom Biosferoweho rezerwata UNESCO Hornjołužiska hola a haty staj partneraj nastupajo dwurěčnosć w minjenych lětach zaměrnje pohłubšiłoj. Rozmołwy kaž minjeny pjatk w rezerwatnym zarjadnistwje w Stróži zhromadnemu postupowanju tyja.

Stróža (SN/at). Serbskorěčne poskitki Biosferoweho rezerwata Hornjołužiska hola a haty stejachu wosebje w srjedźišću najmłódšeje wuměny myslow krótko do třećeho adwenta w Stróžanskim sydle rezerwatneho zarjadnistwa. Předsyda Domowiny Dawid Statnik a Katja Liznarjec, za teritorij Budyskeje župy „Jan Arnošt Smoler“ zamołwita regionalna rěčnica Zwjazka Łužiskich Serbow běštaj z hosćom nawody zarjadnistwa Torstena Rocha. Wobdźělena bě dale zamołwita biosferoweho rezerwata za zjawnostne dźěło Susanne Bärisch.

SPL w Budyšinje

Montag, 12. Dezember 2022 geschrieben von:

Budyšin (SN/mb). Delegacija towarstwa „Společnost přátel Lužice“ (SPL) z předsydu Lukášom Novosadom je sobotu Ochranow a potom Budyšin wopytała. Ondřej Šramek, čłon předsydstwa SPL, wodźeše čěskich přećelow Serbow po „serbskim Budyšinje“. Na programje steještej koncert 1. serbskeje kulturneje brigady w Marje Marćinej cyrkwi a wopyt Smolerjec kniharnje, kotraž budźe tež přichodnu sobotu a patoržicu wočinjena. Skupina 24 ludźi, kotřiž su sej z busom dojěli, je na Wjacławskich wikach pobyła, doniž njejsu so do Prahi wróćili. Wjednica Smolerjec kniharnje, Annett Šołćić, wšelakich „starych znatych“ wuhladawši, wjeseleše so, zo su čěscy hosćo sebje a dru­hich z nakupom wjele serbskich knihow bohaće wobdarili.

Serbska debata

Neuheiten LND