Turistikarjo na wopyće w katolskich Serbach pobyli
Njeswačidło/Konjecy (ML/SN). Čłonojo Zwjazka za serbski kulturny turizm z předsydu Pětrom Brězanom podachu so tutón tydźeń z dalšimi zajimcami na wuprawu na temu „Hosćo w katolskich Serbach“ do wšelakich wsow mjenowaneje serbskeje kónčiny. Cyłodnjowska ekskursija skónči so w Njeswačanskim domizniskim muzeju. Jeho nawoda Arnd Lehmann a žurnalist Manfred Laduš přewodźeštaj po nim a porěčeštaj wo Serbach w tutej gmejnje w přitomnosći a zašłosći. Wulětnikarjo zhonichu, zo bydleše 1884 w Njeswačidle 441 Serbow a 90 Němcow, z kotrychž 35 tohorunja serbsce rěčachu. W cyłej wosadźe bě w tutym lěće 3 389 Serbow a 383 Němcow doma, z kotrychž 196 tež serbsku rěč wobknježachu. Hač do 1930 chodźachu konfirmandki hišće we wosebitej serbskej drasće, kotraž je w muzeju wustajena.
Zaměr Serbow: swětowa lisćina
Maćična akademija ze zajimawym přednoškom
Maćica Serbska z.t. je składnostnje 250. posmjertnin Hadama Bohuchwała Šěracha wčera na Maćičnu akademiju přeprosyła. Jan Malink je wo awtoru a fararju a wo nabožnym skutkowanju Šěracha we 18. lětstotku přednošował.
Leipner kandiduje za funkciju FUEN
Budyšin (SN). Na 25. posedźenju prezidija Domowiny w aktualnej wólbnej periodźe stejachu wčera wječor na dnjowym porjedźe mjez druhim přihoty třěšneho zwjazka na klětuše wólby krajneju sejmow. Wšako chcedźa zaso wólbne kopolaki z prašenjemi kandidatam w Sakskej a Braniborskej posrědkować.
Dalša tema bě wobdźělenje Domowiny na słowjanskim seminarje FUEN w Zagrebje. Wot dźensnišeho hač do njedźele tam městopředsyda dr. Hartmut Leipner a hłowna jednaćelka Judit Šołćina sobu dźěłataj. Hosćićel lětušeho seminara je serbiska mjeńšina w Chorwatskej. W tutym zwisku diskutowachu čłonojo prezidija rólu Domowiny w FUEN. Tuchwilu je Domowina w štyrjoch dźěłowych skupinach FUEN zastupjena. Prezidij podpěruje kandidaturu dr. Hartmuta Leipnera za nawodnistwo słowjanskeje dźěłoweje skupiny. Dotalna rěčnica je přizjewiła zastojnstwo złožić.
Nimo toho bě sej prezidij wědomostneho sobudźěłaćerja projekta ZARI Juliana Nyču na rozmołwu přeprosył.
Z ministerku so rozmołwjeli
Diskutuja wo mjeńšinowych temach
Fachowa ekskursija je čłonow Serbskeho kulturneho turizma z.t. a ...
Wjac młodych ludźi w Domowinje
Młodźinske dźěło Domowiny je wjace hač jenož woblubowane ludowe nałožki pěstować. To su sej čłonojo předsydstwa župy Delnja Łužica na wšelakich přikładach znowa wuwědomili.
Choćebuz (SN/at). Dźěło z młodźinu steješe w srjedźišću posedźenja předsydstwa župy Delnja Łužica wčera w Choćebuzu. Z namjetom běše so gremij hižo lětsa w januarje zaběrał. Tehdy běchu sej přezjedni, wo problemach diskusiju dale wjesć. Tomu wčera tak bě a młodźinski koordinator Tobias Unger rozprawješe wo dźěławosći młodźinskich skupin pod třěchu Domowiny w Delnjej Łužicy.
Přiběracy njedostatk je župny młodźinski koordinator nastupajo pěstowanje ludoweho nałožka jutrowneho wohenja zwěsćił, kaž župan dr. Pětš Šurman na naprašowanje našeho wječornika zdźěli. Na někotrych wsach za nałožk žane zjawne płoniny wjace njezměja. Na přikład su w Turjeju (Tauer) w prjedawšich lětach husto areale prodrustwa wužiwali. Te nětko zwjetša priwatnikam słušeja, Tobias Unger rozprawješe. Podobnje je połoženje w Pśiłuku (Preilack). „Bjez płoniny pak je přewšo ćežko tradiciju dale wjesć“, rjekny župan.
Nowy předsyda z čerstwymi idejemi
„Wažne je młodostnym rum za ideje poskićeć, zo by serbska rěč dale žiwa była a kultura so dale wuwiwała“, praji nowy předsyda serbskeho młodźinskeho towarstwa Pawk – Lukaš Pěčak. 23lětny naslěduje Jakuba Wowčerja, kotryž je towarstwo štyri lěta nawjedował. „Za mnje je tuta funkcija wulka česć a zdobom nowe wužadanje“, Radworčan wuzběhny. Wužadanjow a zarjadowanjow je tójšto w přichodźe. Tak wuzběhny Serb sam w tutym zwisku: „Hižo klětu w nalěću wuhotujemy MENS seminar w Budyšinje a tak přeprošujemy sebi młodostnych tamnych europskich mjeńšinow do Łužicy. Zdobom čaka na nas wjeršk 30lětneho wobstaća PAWKa.“ Lukaš Pěčak bydli tuchwilu w Lipsku a dźěła wot lětušeho při tamnišim lětanišću jako zastojnik cła. W swojim wólnym času honi Lukaš zahoriće za swoje domjace mustwo ST 1922 Radwor za bulom. Nimo toho wón rady kolesuje, pućuje w Alpach a lubuje sej nowe kultury wotkrywać. Runje z tuteje přičiny wobradźa jemu skutkowanje pola PAWKa wulke wjeselo, wšako móže so přez towarstwo „z druhimi mjeńšinami Europy zeznajomić a mjez sobu zwjazować.
