Wojerecy (SN/MiP). Čłonojo Wojerowskeje přirady za serbske naležnosće, mjez nimi županka Wojerowskeje župy Gabriela Linakowa, su so wčera popołdnju w Starej radnicy schadźowali, zo bychu sej klětuši dźěłowy plan wudźěłali. Serbska přirada je sej hladajo na hłowny cil w swojim skutkowanju, mjenujcy serbsku rěč a serbske žiwjenje w měsće přisporjeć, wjacore wopyty pola wažnych Wojerowskich hospodarskich akterow na lětnu agendu stajiła. Tak na přikład chcedźa so w tutym zwisku z managerku Łužiskeho centera Madeleine Matschke schadźować. Tež wulke předewzaće za zhotowjenje tepjenskich systemow YADOS, w kotrymž wjace hač 300 ludźi dźěła, chcedźa wopytać. „Tójšto sobudźěłaćerjow je serbskeho pochada. Tohodla chcemy zamołwitych mjez druhim při tym podpěrować, dwurěčne taflički w zawodźe instalować“, praji Gabriela Linakowa w rozmołwje z našim wječornikom. Županka wjeseli so tež na planowany termin z Chorwatku Moniku Braćiku, kotraž je potomnica historiskeje wosobiny Krabata – Janka Šajatovića.