Slepo (SN). Hłowna zhromadźizna župy Jakub Lorenc-Zalěski wčera w Slepom, bě zdobom wólbna zhromadźizna. Wulkotny zazběh do zarjadowanja zmóžni najmjeńši cyłk Serbskeho folklorneho ansambla Slepo – a to najmłódši, wosomlětny čłon Toni Tschöbel ze swojim wučerjom Wolfgangom Kotissekom, kotryž je najstarši čłon ansambla, ze zdźělenki Domowiny wuchadźa. „Do nětka bě wjeselo, nětko budźe chutnišo“, zahaji županka Diana Maticowa zhromadźiznu. Nimo 35 wot cyłkownje 42 delegatkow a delegatow, witaše wona předsydu Domowiny Dawida Statnika. Tež krajny rada Zhorjelskeho wokrjesa dr. Stephan Meyer (CDU) je čestnohamtskim akteram swoje postrowy sposrědkował.

Na to předstaješe županka rozprawu wo dźěławosći župy wot lěta 2023 do 2025. Župa ma tuchwilu 525 čłonow. W fokusu steješe dźěło na bazy kaž tež dołhodobne zawěsćenje serbskich zarjadnišćow we wobłuku změny strukturow. Tež jednotliwe skupiny wužichu składnosć, wo swojej dźěławosći rozprawjeć. Mjez druhim předsydka Domowinskeje skupiny Trjebin Angelika Balccyna. Wona hódnoćeše aktiwity, kaž pěstowanje serbskich nałožkow.