To a tamne (13.06.25)
70lětneho wikowarja drogow su policisća na Sicilskej lepili – na mopedźe. Muž bě podhladny, dokelž bě chětro spěšnje po puću. Při kontroli nadpadnyštej policistam kałata wóń hašiša a nerwozita starca. Na to namakachu 50 titkow hašiša, cyłkownje bě to wjace hač pjeć kilogramow. Wočiwidnje běchu drogi za kupcow předwidźane. 70lětneho dealerja zajachu. Wón ma wotnětka domjacy arest.
Hudźbnik Herbert Grönemeyer smě kónc tydźenja w Bochumje a Essenje cyły orchester dirigować. 69lětny popstar nawjeduje na třoch koncertach Bochumskich sinfonikarjow. Na programje steji mjez druhim sławny klawěrny koncert Sergeja Rachmaninowa. Za klawěrom sedźi ruska pianistka Anna Winnickaja. Nimo toho zaklinči suita, kotruž je wjelelětny hudźbnik Grönemeyera, Alfred Kritzer, ze znatych spěwow wuměłca zestajał.
To a tamne (12.06.25)
Brian Wilson – hudźbna legenda a sobuzałožer sławneje skupiny „Beach Boys“ je z 82 lětami zemrěł. Tole je management hudźbnika wobkrućił. Ze spěwami kaž „Fun Fun Fun“, „Good Vibrations“ a „Surfin‘USA“ swjećeše skupina hólcow Beach Boys w 60lětach po wšěm swěće hoberske wuspěchi. Samo Beatles so na jich hudźbnym stilu orientowachu. Wilson je nimale wšitke spěwy sobu spisał. Naposledk ćerpješe wón pod demencu.
Trend dale a wjetšich awtow w Europje spóznawaš tež na wysokosći motorowych hawbow. Tole ma negatiwne wuskutki na wěstotu dźěći, dokelž šoferojo małych ludźi před awtom njewidźa. Nimo toho su zranjenja hrudźe při zražkach ćim hórše. Přerězna wysokosć motorowych hawbow w EU je so wot lěta 2010 wo poł centimetra powyšiła a wučinješe 83,4 centimetrow w lěće 2024.
To a tamne (11.06.25)
Zhromadnje hudźić, spěwać a hudźbu aktiwnje dožiwić, je přewšo wunošne za derjeměće čłowjeka. Wědomostny pospyt při lětušich Drježdźanskich hudźbnych swjedźenskich dnjach je tute dopóznaće doraznje wobkrućił. Wobdźěleni probandźa mějachu wo wjele wyšu koncentraciju oxytocina, znaty jako hormon zbožownosće. Naměrjene mnóstwo hormona bě wyše hač při hubkowanju abo při splažnych aktiwitach.
Nawal zymy je w Južnej Africe nadróžny chaos zawinił. Sněh, wichor a zliwki blokowachu dróhi a zawinowachu zapławjenja a zesuwanje zemje. Wosebje potrjechene běchu wuchodne prowincy. W někotrych kónčinach mějachu telko sněha, zo njemóžachu ludźo wažne wobchadne zwiski wjace wužiwać. Zamołwići wukazachu za někotre gmejny druhi najwyši warnowanski schodźenk sněha dla.
To a tamne (10.06.25)
Staru granatu je žona w Neuruppinje na sewjeru Braniborskeje z rěki wućahnyła. Wona bě z magnetom za swojimi klučemi pytała, kotrež běchu do wody padnyli. Při tym měješe naraz zerzawy kruch železa w rukomaj. Sobudźěłaćerjo zarjada za wotškódnjenje municije jón jako staru rusku tankowu granatu identifikowachu a wottransportowachu. Hač je žona tež swoje kluče namakała, njeje znate.
Stary tačelak w spěšniku ICE je na Hamburgskim dwórnišću Altona wjetše zasadźenje policije zawinował. Sobudźěłaćer železnicy bě wosamoćeny paket pjatk wuhladał. Na to policija dźěl dwórnišća wokoło ćaha zaraći. Dokelž spočatnje njewědźachu, hač njejsu w pakeće strašne maćizny, zawołachu fachowcow za znješkódnjenje. Woni paket přeswětlichu a tačelak namakachu. Policija ludźi namołwja, swoje wačoki stejo njewostajić.
To a tamne (06.06.25)
We woknje swojeje kupjele tčacy wostał je muž w Nürnbergu. Hornje ćěło sahaše z wokna, brjuch bě hišće w kupjeli. Wohnjowa wobora muža wuchowa. Wobornicy wokno wutwarichu a muža z runje 21 centimetrow wulkeho wokna wuswobodźichu. Muž po swojich mocach pomhaše a brjuch „do so sćahny“. Čehodla bě muž z woknom zalězć chcył, njeje znate.
Na wšěch 124,7 kilometrow wróćo storkało je elektriske nakładne awto na motorowym wubědźowanišću w Oscherslebenje w Saksko-Anhaltskej. Jězba traješe šěsć hodźin a 22 mjeńšin při spěšnosći 20 km/h. Čara wobsahowaše 476 křiwicow. Za wodźidłom sedźeše oficěr zwjazkoweje wobory Marco Hellgrewe. Dotalny rekord z lěta 2020 wučinješe 89 kilometrow. Z akciju chcychu na elektrifikowanje wobchada, wěstotu na dróhach a połoženje šoferow skedźbnić.
To a tamne (05.06.25)
Pokradnjena wóskowa figura francoskeho prezidenta Emmanuela Macrona steji zaso na swojim městnje w muzeju w Parisu. Aktiwisća wobswět škitaceje organizacije Greenpeace běchu postawu před centralu energijoweho koncerna EDF nastajili, zo bychu přećiwo dale trajacym stykam Macrona k ruskim energijowym koncernam protestowali. Direktor muzeja paducham wobkrući, zo su jara kedźbliwje z wóskowym Macronom wobchadźeli.
Na wšěch 28 000 eurow pokuty nakopił je přistajeny italskeje kupnicy na sewjeru kraja. Šěsć měsacow bě wón wšědnje ducy na dźěło ze swojim awtom přespěšnje jěł a sej při tym do pasli derje schowaneho błyskača zalězł – bjez toho zo by to pytnył. Mjeztym chłostanki běžnje z póštu dochadźeja. Wšitke pospyty přistajeneho, sej w zarjadach smilnosć wuprosyć, su dotal zwrěšćili.
To a tamne (04.06.25)
200 lět stary kondom z erotiskim pomolowanjom pokazuje Amsterdamski Rijksmuseum w swojej najnowšej wustajeńcy k stawiznam splažnosće a prostitucije. Kondom zhotowili su 1830 prawdźepodobnje ze slepeho črjewa wowcy. Na nim zwobraznjena je scena rjadniskeje knježny z třomi mnichami. Wustajeńca dokumentuje, zo so ludźo při wšej zabawje hižo přeco tež splažnych chorosćow a njewotpohladneje samodruhosće bojachu.
Plyšowe zwěrjatka na dróze su we Wilhelmshavenje zasadźenje policije zawinili. Wobsadce policajskeho awta běchu wčera wječor wjacore tajke zwěrjatka napadnyli, kotrež bě drje něchtó z wokna ćisnył. Zastojnicy zwěsćichu 13lětneho w toho bydlenju, kiž bě so při rumowanju stwy rozsudźił, zwěrjatka z woknom wotbyć. Pod dohladom policistow smědźeše wón wšitke zaso zezběrać.
To a tamne (03.06.25)
Mylnje smjerć zwěsćili su pola 88lětneje staruški w Čěskej. Jeje muž bě nuzowe čisło wolił a rjekł, zo žona hižo njereaguje a zo je drje mortwa. Přiwołana lěkarka smjerć žony pisomnje wobkrući. Jako chcychu sobudźěłaćerjo pochowanskeje słužby ćěło do kašća połožić, seniorka woči wočini. W chorowni žonje wobkrućichu, zo je najebać wšelake chorosće hišće poměrnje čiła.
3 333 króć je 85lětna rentnarka po seklowej čarje we wólnočasnym parku w Cleebronnje njedaloko badensko-württembergskeho Heilbronna jěła. Swojich jězbow dla je žona mjeztym atrakcija parka. Ursula Dees twjerdźi, zo su so bolosće w jeje chribjeće nimale dospołnje pominyli. Mjeztym je jej park jězdźenku na čas žiwjenja přepodał. Žona kóždu jězbu dokładnje zapisuje. Tohodla tež wě, zo bě mjeztym 3 333 króć na čarje.
To a tamne (02.06.25)
Njewšědnje ćopły wětr je płujadłoweho płachtakowarja w Chinje 8 000 metrow wysoko pozběhnył. Muž chcyše w prowincy Gansu poprawom jenož trjebany parašut wuspytać. 55lětny muž njemóžeše so wulkemu ćišćej powětra hižo dowobarać a docpě spěšnje wysokosć 8 589 metrow. Přez spěšny lět do njezwučeneje wysokosće zhubi wón nachwilnje samo wědomje, dokelž kislik pobrachowaše. Njewšědny podawk zamó wón dopokazać, dokelž bě kamera wšitko natočiła.
Hołbikaj w lětadle stej w USA chaos a zapozdźenje zawinowałoj. Jako pasažěrojo na lětanišću w Minneapolisu do mašiny zastupichu, wuhladachu ptačka, kiž pod sedłami běhaše. Při jězbje lětadła na start naraz dalši hołb w mašinje zalětowaše. Wjacori pasažěrojo reagowachu panisce. Někotři spytachu hołbikaj popadnyć. Na to so pilot zawróći.
To a tamne (30.05.25)
Něhdyša wonkowna ministerka Annalena Baerbock je na hłowje stała – za komikarku Carolin Kebekus. W teje wusyłanju bě politikarka Zelenych hru „prawda abo winowatosć“ sobu hrała. 44lětna zwaži so tam radšo na postoj na rukomaj, zo by njediplomatiske prašenje wobešła, kiž rěkaše: „Radšo jenož hišće knihi Roberta Habecka čitać abo ženje wjace wo Roberće Habecku widźeć a słyšeć?“
W sewjeru Guatemale su archeologojo něhdźe 2 900 lět stare město Mayjow wotkryli. Slědźerjo pomjenowachu městnosć „Los Abuelos“ (dźěd a wowka), dokelž běchu tam dwě postawje z kamjenja našli, kiž poćahujetej so prawdźepodobnje na kult česćowanja prjedownikow. Při wurywanjach wotkrychu nimo toho obserwatorij, pyramidy, wołtarnišća, fragmenty stelow a wšelke keramiki stareje wysokeje kultury.
