To a tamne (12.11.25)
Kruwa je we wowčim stadle w badensko-württembergskim Neckargmündźe zbožo našła. Ducy do rězarnje bě wona twochnyła a wjacore tydźenje po lěsach błudźiła. Skónčnje bě so wowcam při-družiła. Wowčer nochcyše swojimaj wočomaj wěrić, tola wowcy a kruwa so derje znjesechu. Jako dyrbješe stadło dale ćahnyć, bě ze swobodu kruwy nimo: Nětko bydli wona na dworje hnady w Hessenskej mjez skotom, kiž ma podobny dóńt.
Helene Fischer planuje 2026 swój comeback po staršiskim času. Spěwarka chce po tutym puću swój 20lětny jewišćowy jubilej woswjećić a přihotuje wulku turneju pod hołym njebjom. Před 750 000 fanami wustupi wona w stadionach na hoberskim jewišću. W lěću bě so jeje druha dźowka narodźiła.
To a tamne (11.11.25)
Při ćežkich njezbožach přez hoberske žołmy na dowolowej kupje Teneriffa su so tež třo turisća z Němskeje zranili. Woni so snadnje zranichu, wonkowne ministerstwo w Berlinje zdźěla. Konsulat w Las Palmas je mjeztym kontakt k potrjechenym nawjazał. Hdźe je k njezbožu dóšło, njeje znate. Hoberske žołmy běchu turistow překwapili, kotrež so na pobrjóžnych promenadach wuchodźowachu. Mnozy buchu do morja storhnjeni.
Ze skóržbu wjacorych miliardow dolarow hrozy prezident USA Donald Trump britiskemu sćelakej BBC. Pozadk je rozprawa sćelaka wo podawkach 6. januara 2021 a wo narěči Trumpa, kiž je sćelak po jeho měnjenju skomolił. Prawiznicy Trumpa sej žadaja, zo sćelak wšitke „ranjace wuprajenja“ hač do pjatka cofnje, so zamołwi a wotškódnjenje zapłaći. Šef BBC Tim Davie je hižo wotstupił.
To a tamne (10.11.25)
Spjaceho paducha je policija we wulkowobchodźe w Mnichowje wubudźiła a zajała. 38lětny bě w nocy na sobotu z plesternakom škleńčane durje wobchoda rozbił a so na to „wulkomyslnje posłužował“. Wón wočini wjacore bleše palenca a z nich piješe, runje tak wobchadźeše ze słódkosćemi. Po tym sej we wobchodźe wusny. Policija, mjeztym wot alarmoweje připrawy wo njeskutku informowana, spjaceho paducha wuhlada a zaja.
Dźewjećlětny hólc za wodźidłom wosoboweho awta je w porynsko-pfalcowskim Pirmasensu zasadźenje policije zawinił. Swědkojo běchu dźěćo w awće widźeli a zastojnikow informowali. Tući nańdźechu awto na pólnym pućiku a wočiwidnje při zwučowanju. W jězdźidle sedźeštej nimo 57lětneho nana tež mać a šěsćlětna sotra pachoła. Staršej njedowidźeštaj, čehodla policisća zhromadnu jězbu skónča.
To a tamne (07.11.25)
Drohotne debjenki Habsburgow zjawnosći zaso spřistupnja, po tym zo su je lětdźesatki w składach chowali. Čłonojo bywšeje awstriskeje kejžorskeje dynastije běchu historisce wuznamne juwele 1940 na ćěkańcy před němskimi nacionalsocialistami do kanadskeho Québeca wuchowali, Habsburgska swójba zdźěla. K debjenkam słušeja „Florentiski diamant“ a dalše wosobinske wěcy kejžorki Marije Theresije (1717–1780) a kralowny Marie-Antoinette (1755–1793).
Zelene awtowe papjery móža šoferojo přichodnje doma wostajić. Wotnětka je móžno, dokument přez app na mobilnym telefonje składować a tak digitalnje při sebi měć. Při kontrolach tole akceptuja. Zwjazkowy minister za wobchad Patrick Schnieder (SPD) je nowostku dźensa oficialnje zahajił, kiž ma žiwjenje ludźi polěpšić a zarjadnistwam dźěło wolóžić.
To a tamne (06.11.25)
Razniše chłostanja hroža přichodnje za rozbuchnjenje pjenježnych awtomatow. Zwjazkowy sejm je wčera wječor zakoń schwalił, z kotrymž minimalne chłostanje wot jednoho lěta na dwě lěće pozběhnu. Štóž při rozbuchnjenju druhich wohrožuje, dyrbi z jastwom hač do pjeć lět ličić. „Njeńdźe jenož wo pjenjezy w awtomatach, dźe wo wěstotne začuće ludźi“, rjekny zapósłanc CDU Marec Henrichmann. W Němskej je ličba rozbuchnjenych pjenježnych awtomatow minjenych dźesać lět masiwnje přiběrała.
Před strachami alkohola warnuje społnomócnjeny zwjazkoweho knježerstwa za bój přećiwo drogam Hendrik Streeck. Wón wobkedźbuje lochkomyslne wobchadźenje z alkoholom, „kiž steji při kóždej składnosći w srjedźišću“. Politikar CDU so za to wupraja, „přewodźane piće“ za młodostnych wot 14 lět wotstronić, dokelž wostanje alkohol strašna droga.
To a tamne (05.11.25)
Na wšěch 300 brónjow, dźěle brónjow kaž tež municiju a rozbuchadło je policija w domje zemrěteho rentnarja w bayerskim Augsburgu našła a sćazała. Za wjace hač połojcu brónjow njeměješe muž, kiž bě přirodneje smjerće zemrěł, žanu dowolnosć, policija zdźěla. Policija trjebaše cyły tydźeń, zo by ilegalnu zběrku dokumentowała a wotwjezła. Kriminalna policija nětko slědźi, zwotkal brónje pochadźeja.
Z „Mytom přećelstwa“ je ruski prezident Wladimir Putin němskeho pianista a dirigenta Justusa Frantza w Moskowskim Krjemlu wuznamjenił. „Justus Frantz přinošuje hižo wjele lět spomóžnje přibliženju a mjezsobnemu wobohaćenju kulturow Ruskeje a zwjazkoweje republiki Němskeje“, rjekny Putin w swojeje narěči składnostnje spožčenja rjadu na Dnju narodneje jednoty Ruskeje. Frantz bě najebać sankcije do Moskwy přijěł.
To a tamne (04.11.25)
Pačenosć towaršnosće njeje scyła tak wulka, kaž so na prěni napohlad zdawa. Wo tym su wědomostnicy organizacije „Wědomosć w dialogu“ w swojej rozprawje 2025 přeswědčeni. Byrnjež 77 procentow woprašanych ludźi měnjenja było, zo towaršnosć přiběracy rozpaduje a 54 procentow samo znjepřećelenej lěhwje widźało, su sej ludźo w zasadnych prašenjach přezjedni, slědźerjo twjerdźa.
Smjertnje znjezboženi krosnowarjo, kotřiž běchu na swjedźenju wšěch swjatych a južnym Tirolu žiwjenje přisadźili, přińdu wšitcy z Bayerskeje. Tole je italska policija w Bozenje powěsćerni dpa wobkrućiła. Krosnowarjo běchu sobotu krótko do 16 hodź. po puću na 3 545 metrow wysoki Cima Vertana w Ortlerowym masiwje, jako jich lawina překwapi. Čehodla běchu woni při ćmičkanju přeco hišće po puću na horu, njeje znate.
To a tamne (03.11.25)
Z wjerćatym rěblom je wohnjowa wobora ćeknjeneho papagaja z třěchi domu w sewjerorynsko-westfalskim Bocholće wuchowała. Wobydlerjo běchu pisaneho ptačka wuhladali a wohnjowu woboru informowali. Runočasnje prošeše swójba w interneće wo pomoc při pytanju za zhubjenym ptačkom. Wohnjowa wobora so pola swójby přizjewi. Zhromadnje z pomocnikami so skónčnje poradźi, papagaja z mjenom Zazu z dźewjeć metrow wysokeje třěchi wuchować.
Njewšědny nuzowy telefonat je policiju w Erfurće zaběrał. Wobydler domu je so sam z ručnymi putami při tepjenju přiwjazał – njeměješe pak žadyn klučik wjace. Zastojnicy jeho wuswobodźichu, po tym zo bě jim muž kluče z woknom ćisnył. Policisća zwěsćichu, zo njebě to prěni pad tajkeho razu pola wobydlerja a ručne puta z jeho dowolnosću sćazachu.
To a tamne (30.10.25)
Mjeza spěšnosće za pěškow w Słowakskej, wo kotrejž powěsćernje wčera z Bratislavy rozprawjachu, bě drje wuslědk njedorozumjenjow. Pěškam tajka mjeza njehrozy, zapósłanc Ľubomír Vážny, kiž bě naćisk zakonja zdźěłał, hišće raz wujasni. W zwisku ze zražkami mjez pěškami a wužiwarjemi rolerow na chódnikach bě rěč wo tak mjenowanej „spěšnosći běhanja“ šěsć km/h. Tole běchu tak wukładowali, zo chcedźa tež pěškam předpisać, kak spěšnje maja so pohibować.
Po spektakularnym zadobywanju do Pariskeje wustajeńcy Louvre staj zajataj paduchaj njeskutk zdźěla přiznałoj. Wonaj mataj nětko do přepytowanskeje jatby přińć. Rubizna pak wostanje dale zhubjena, policija zdźěla. Po informacijach medijow je policija dalšich podhladnych zajała. Historiske debjenki w hódnoće wjace hač 88 mio. eurow su jónkrótne.
To a tamne (29.10.25)
Mjezu spěšnosće dyrbja přichodnje tež pěšcy w Słowakskej dodźeržeć. Tole wobsahuje nowe postajenje wobchadneho zakonika, kotryž je parlament w Bratislavje wčera wobzamknył. Potajkim njesmědźa so tam přichodnje ludźo pěši spěšnišo hač šěsć km/h pohibować. Nowy zakoń płaći wot 1. januara 2026. Zaměr je, zo ličbu zražkow mjez pěškami a skaterami kaž tež wužiwarjemi e-rolerow a scooterow zniža. Hač dyrbja ludźo z chłostanjom ličić, hdyž k čakacemu busej spěchaja, njeje znate.
Stary Airbus zwjazkoweje wobory je z pomocu nakładneho awta derje do Serengetijoweho parka w delnjosakskim Hodenhagenje dojěł. Poslednju dźesać kilometrow dołhu čaru su minjenu nóc derje zmištrowali, rěčnica parka zdźěli. Lětadło A310 běchu minjene tři dny rozebrane transportowali. Hač do pózdnjeho lěća 2026 ma z njeho hosćenc nastać.
