To a tamne (02.01.24)
Přihot pizzy je w Italskej „swjata“ tradicija, na kotruž su Italčenjo jara hordźi. A tohodla je za nich jara wažne, kotre wudźěłki za pokładźenje pizzy wužiwaja. Sławny pjekar pizzy z Neapela pak je nětko z widejom w socialnych medijach wulku kedźbnosć wubudźił. Gino Sorbillo, mějićel wjacorych hosćencow w Italskej a we wukraju, chce pizzu z ananasom pokłasć a je hosćom poskićeć. W Italskej pak je pizza z ananasom „smjertny hrěch“. We wideju Sorbillo ludźi namołwja, kulinarisku chłóšćenku woptać.
Policisća su w Połčnicy pašturlicu wuchowali. Pazoraka ze zranjenym křidłom su zańdźenu sobotu na kromje města Połčnicy wuhladali, policija zdźěli. Ptačka dowjezechu zastojnicy skótnemu lěkarjej.
To a tamne (29.12.23)
Kołp na kolijach na mosće we Wolgasće zapadnje kupy Usedom w Mecklenburgsko-Předpomorskej je železniski a nadróžny wobchad nachwilnje zlemił. Železnicar bě zwěrjo wuhladał a policiju informował. Pomoc přińdźe ze stron čakaceho šofera wosoboweho awta. „Wočiwidnje wěcywustojny muž“ zwěrjo hrabny a na druhi bok mosta donjese, hdźež jeho zaso na swobodu pušći.
Na zwěrjeći wuměnk rozžohnowali su Podstupimscy cłownicy na drogi wukubłanu psycu Fluse. Dźesać lět dołho bě mjeztym dwanaće lět stary pos aktiwnje słužbu wukonjał a při 264 zasadźenjach nimale 270 kilogramow drogow wuslědźił. Zasadźena bě Fluse předewšěm na Berlinskim lětanišću Tegel a na nowym BER. Wosebje chwalachu sej policisća jeje charakter: Dźěćom bě wona jara přichilena, skućićelam pak scyła nic.
To a tamne (28.12.23)
60 lět bjez jězbneje dowolnosće po puću był je muž w Jendźelskej. Policisća su jeho při kontroli na awtodróze njedaloko sewjerojendźelskeho Prestona lepili. Zastojnikam pokaza muž prastary a dawno wotběžany certifikat, kotryž jemu dowola, z přewodnikom w awće po puću być směć. Nětko dyrbi šofer ze sudniskej skóržbu ličić. Dotalny rekord bě druhi muž loni nastajił: Wón sedźeše 70 lět bjez jězbneje dowolnosće za wodźidłom.
Dwě promilej alkohola w kreji měješe 36lětna wodźerka wosoboweho awta, jako takle wopita w vogtlandskim Auerbachu do parkowaceho awta zrazy. Kaž policija zdźěli, bě žona na napřećiwny bok jězdnje zajěła a tam do awta a do płota prasnyła. Wona so snadnje zrani. Pomocnicy ju ambulantnje zastarachu. Wěcni škodu zražki trochuje policija na nic mjenje hač 28 000 eurow.
To a tamne (27.12.23)
Přez generacije jako swjata česćena kamjentna kula je so w centralnej Indiskej jako jejo dinosawriera wukopało. W přihotach wotewrjenja wulkeho geologiskeho parka w zwjazkowym staće Madhya Pradesh su wědomostnicy swójbu zeznali, w kotrejž potajny kamjeń chowaja. W samsnej kónčinje su stajnje zaso powostanki prazwěrjatow namakali, mjez druhim hnězda z jejemi. Jedne tutych hnězdow leži njedaloko wsy swójby.
Pakety z drogami je morjo minjeny dny na pobrjohi južneje Awstralskeje připławiło. Wšo dohromady jedna so wo wjace hač sto kilogramow kokaina, policija zdźěla. Prěni paket běchu ludźo 80 kilometrow južnje metropole Sydneyja našli a policiju informowali. Policija so kedźbliwym swědkam dźakuje. Zdobom warnuja, namakanki sobu domoj wzać. Zwotkel pakety pochadźeja, njewědźa.
To a tamne (22.12.23)
Z trawusyčakom za sedźenje jědźeše wuměnkarka w Sontheimje nětko nakupować. Žona njewobsedźi žanu jězbnu dowolnosć a tež trawusyčak nima žanu čisłowu tafličku, policija wčera zdźěli. Zastojnicy běchu 66lětnu předwčerawšim lepili. Po informacijach policije móže tajki trawusyčak hač do 12 km/h spěšnje jěć. Žona trjeba za tajke jězdźidło w zjawnym wobchadźe jězbnu dowolnosć.
W Južnej Africe je stadło elefantow z rezerwata Ithala ćeknyła. Wobydlerjo wokolnych wjeskow běchu do toho płót wottwarili a dźěle toho předali, tamniše medije tele dny rozprawja. Nětko chcedźa zamołwići za zwěrjatami z helikopterom pytać. Elefanty drje agresiwne njejsu, ale móža wulke škody pola ratarjow zawinować, jeli so po polach z kukuricu pohibuja.
To a tamne (21.12.23)
Něhdźe 3 000 jatych w Sakskej hodowne dny w swjatočnej atmosferje dožiwja. Tak su wšelake hodownički a Bože słužby předwidźane, zdźěli wčera sakske justicne ministerstwo. Zdobom wobsteja móžnosće dlěje jatych w jastwje wopytać. Zajeći smědźa sej ze swojimi dźěćimi hrajkać a paslić. Tohorunja chcedźa jatym dariki přepodać. Kuchnje w jastwach přihotuja nimo toho wšelake słódne pječenki.
Krótko do hód maja zajimcy astronomije składnosć, hwězdźiny w nocy na njebju wobkedźbować. Najwjac hwězdźinow wočakuja fachowcy 23. decembra. „Najlěpši čas, je na njebju wuhladać, je tuchwilu zahe rano wokoło 4.30 hodźin“, wuswětli předsyda zjednoćenstwa přećeljo hwězdow Uwe Pilz. Jelizo wjedrowe wobstejnosće dowola, smědźa so zajimcy na zajimawe wokomiki wjeselić.
To a tamne (20.12.23)
Wuměnkarski porik w Francoskej čuješe so wot čaporoweho wikowarja chětro zjebany a je na to skoržił. Tak njeznaještej hódnotu afriskeje maski a stej ju jemu za 150 eurow předałoj. Wikowar pak dósta za masku na awkciji 4,2 milionaj eurow. Skóržbu porika, zo měł so kup z lěta 2021 cofnyć, je sudnistwo w južnofrancoskim Alèsu wčera wotpokazało. Tak njeměješe wikowar čapora žanu wosebitu wědu nastupajo wuměłske objekty, sudnistwo rozsudźi.
Nižozemska železnica přewjeduje tuchwilu „tydźeń zhubjeneho plyšoweho zwěrjatka“. W běhu lěta su přistajeni železnicy w ćahach wjele tajkich dobrych přećelow dźěći našli. Fota někotrych zhubjenych a njewotewzatych pleńčatkow nětko wšědnje z małym tekstom w socialnych medijach wozjewjeja, předewzaće předwčerawšim w Utrechće zdźěli.
To a tamne (19.12.23)
Jenož z kupanskim płašćom zdrasćeny spytaše paduch handyja w Hammje policiji wućeknyć. 37lětny přebywaše wčera w sawnje dožiwjenskeje kupjele, byrnjež tuta na tymle dnju jeno žonam přistupna była, policija zdźěli. Sobudźěłaćerjo spytachu podhladneho zadźeržeć, jako zwěsćichu, zo je šmóratko pokradnył. Tón pak skónčnje nahi ćekny a sej po puću kupanski płašć zwoblěka. Za kerkami schowaneho 37lětneho policija lepi.
Po dźesać dnjach pytanja su ludźo na juhu Indiskeje tigra popadnyli, kotryž je bura morił. Něhdźe 13 lět stare zwěrjo su na kofejowej plantaži w distrikće Wayanad našli, medije wozjewichu. Rubježne zwěrjo chcychu nětko do tigroweje stacije dowjezć. Tola wobydlerjo protestowachu přećiwo rozsudej a sej žadachu, zo měł so tiger morić. Woni so boja, zo jeho po něšto času zaso do wokoliny pušća.
To a tamne (18.12.23)
Derje do Chiny dolećałoj staj pandamjedwjedźej Pit a Paule z Berlinskeje coologiskeje zahrody. Po wjace hač dźesać hodźinach stej wobaj nětko w Chengdu w tamnišej staciji za plahowanje pandamjedwjedźow a jich přeslědźenje. Staršej wobeju wostanjetaj w Berlinje. Přećah lěta 2019 rodźeneju dwójnikow bě hižo dlěši čas planowane. Pandemija bě tomu dotal zadźěwała. Mjedwjedźej stej kaž jeju staršej swójstwo Chinskeje republiki.
Na awtodróhowym wotpočnišću zabyli su 73lětnu wčera, njedźelu. Žona bě so minjenu nóc na parkowanišću při A 96 w Bayerskej na nuznik podała. Jako so nawróći, bě awto preč. 67lětny bratr bě na jězbje z Bosniskeje do Šwicarskeje pozastał a njebě pytnył, zo je tež žona wulězła. Tole widźo, so hnydom zawróći. Sobudźěłaćer tankownje bě hižo policiju wołał, „rozpjeršeneje žony bjez kabata“ dla.
To a tamne (15.12.23)
Wjace hač 50 000 zhubjenych wěcow su Berlinske wobchadne zawody lětsa w swojim běrowje namakankow znosyli. To je wo něšto wjace hač loni, jako bě pandemije dla mjenje ludźi w busach a železnicach po puću, zamołwići zdźěleja. Wěcy namakali běchu na dwórnišćach, zastanišćach kaž tež w busach a železnicach. Paleta kurioznych wěcow saha wot protezow nohow, přez twarske mašiny hač k rolatoram a dalšim pomocnym srědkam.
Tež lěto po puknjenju hoberskeho akwarija w jednym z Berlinskich hotelow njejsu přičiny njezboža přeco hišće wujasnjene. Tež sćěhi zapławjenjow na dróhach wosrjedź nutřkowneho města němskeje stolicy su dale widźomne. Hotel je přeco hišće zawrjeny. 16. decembra 2022 bě 16 metrow wysoki hoberski akwarij do tysacow kruchow rozpadnył a něhdźe milion litrow wody so wulało.
