To a tamne (22.05.25)
Rezerwat dźiwich zwěrjatow přepołožili su na sewjerozapadźe Mexika. Přičina je trajaca namóc cwólbow drogoweho kartela. Wjace hač sto zwěrjatow mjez nimi elefantaj, dźesatki tigrow a lawow su mjeztym z Culiacána do 250 kilometrow zdaleneho Mazatlána dowjezli. W Culiacánje wojujetej cwólbje kartela Sinola wo nadknjejstwo. Zwěrjata njemóžachu wjace picować, dokelž sej sobudźěłaćerjo hižo na dźěło njezwěrichu.
Postawa britiskeje princesny Kate steji wotnětka w sławnym kabineće wóskowych figurow Tussauds w Londonje. Wóskowa figura 43lětneje mandźelskej trónoweho naslědnika princa Williama (42) nosy z błyšćatym posměwkom frinkolacy so šat designerki Jenny Packham a klockate črije Gianvita Rossija. Na hłowje ma napodobnjenu krónu princesny Diany.
To a tamne (21.05.25)
Bjez zaměrneho zasahnjenja bydli w lěće 2030 wjace hač połojca wšěch młodostnych w krajach, hdźež hroža jim wulke strowotne strachi. Tole twjerdźi komisija Lancet w swojej swět wopřijacej rozprawje. Potrjechena je miliarda młodostnych hač do 24 lět. K najwjetšim stracham słušeja po měnjenju wědomostnikow HIV, zažne samodruhosće, depresije a špatne zežiwjenje. Zdobom ćerpi w lěće 2030 wjace młodych ludźi nadwahi a psychiskich problemow dla.
Dospołnje wopity bě šofer nakładneho awta, kotryž je wčera na křižowatce awtodróhow A 4 a A 71 pola Erfurta znjezbožił. W křiwicy zajědźe awto z jězdnje, suny so do přirowa a so powali. Při tym nasta škoda 30 000 eurow. Policistam napadny, zo 51lětny za alkoholom wonješe. Dobrowólny test zwěsći 2,7 promilow. Wotjězdka na A 71 bě wjacore hodźiny blokowana.
To a tamne (20.05.25)
Čerwjeny sněhakowarski woblek, elegantny wječorny šat, róžojty kłobuk: Kónc junija chcedźa wšelake drasty a dopomnjenki britiskeje princesny Diany (1961–1997) w kaliforniskim Beverly Hills přesadźować. K wosebitosćam słušatej kremowy barbny koncertny šat designerki Catherine Walker z lěta 1986 w hódnoće hač do 300 000 dolarow a kwětkaty šat studija Bellville Sassoon z lěta 1988, kotryž trochuja na 200 000 dolarow.
Hrožaceje lawiny kamjenjow dla su w šwicarskej dowolowej kónčinje Lötschental w kantonje Wallisu cyłu wjes ewakuowali. Něhdźe 300 wobydlerjow Blattena dyrbješe swoje domy wopušćić. Blatten leži direktnje pod 4 000 metrow wysokej horu Bietschhorn. Fachowcy su zwěsćili, zo drje so nahła skała hory nad wsu bórze wotłama a zo wulke mnóstwa kamjenjow wšón doł pod nim zapusća.
To a tamne (19.05.25)
Darmotnje zmjerzlinu rozdźělił je njeznaty muž w lodarni w badensko-württembergskim Pforzheimje. Starši muž bě do wobchoda přišoł, 180 eurow ze zaka wućahnyć a wo to prosył, ludźom za to lód wudać. Wjace hač sto kulkow lodu su na to w běhu třoch hodźin wopytowarjam darili, kotřiž běchu runje we wobchodźe. Mějićelej lodarnje njeznaty přeradźi, zo je runje infarkt wutroby přetrał a zo ma jeho dźowka narodniny.
Dźesać mjeńšin bjez pilota je pasažěrske lětadło Airbus wot Frankfurta do španiskeho Sevilla lećało. Jako bě kapitan wustupić, so kopilot na swojim stólcu sedźo zwjeze. Najebać to lětadło z pomocu awtopilota stabilnje dale lećeše. Nahrawanja rekordera połoženje dokumentuja. Hakle dźesać mjeńšin pozdźišo so pilotej poradźi, durje cockpita z nuzowym čisłom zaso wotewrěć.
To a tamne (16.05.25)
Dźěći a młodostni wopruja dale a wjace časa za wobrazowku – hač za tiktok, internetne hry abo wuknjenje. Němscy młodostni při tym wosebje wusahuja. 15lětni w Němskej hladaja 48 hodźin wob tydźeń na wobrazowku, to je nimale sydom hodźin wšědnje. Depresije, strowotniske škody a wosamoćenosć móža sćěhi toho być, warnuje nowe přepytowanje OECD. W Francoskej nałožuja sydom- do dźesaćlětni wšědnje dwě hodźinje za internet.
1 446 ludźom žiwjenje wuchowali su čłonojo towaršnosće wuchowarjow žiwjenja Němskeje DLRG loni po wšej Němskej. Lěta 2023 bě jich hišće 1 120 padow. Při tym liča tež tych, kotřiž mějachu při brjoze wodźiznow infarkt abo problemy z wobtokom kreje. 699 ludźi wuchowachu loni před zatepjenjom, towaršnosć zdźěla. 2023 zličichu 870 wuchowanjow. DLRG dyrbi dale za dorostom pytać.
To a tamne (15.05.25)
Po njezbožu ćeknjeneho kolesowarja pyta policija w sewjerorynsko-westfalskim Bergheimje. Tam bě dotal njeznaty na kolesowarskej šćežce do napřećo jěduceje žony prasnył a padnył. Po tym muž zaso stany a so na swojim kolesu wotsali, bjez toho zo by so wo znjezboženu žonu starał. Tež přewodnica muža, kotraž njebě na zražce wobdźělena, so wo znjezboženu njestaraše. Policija pyta za swědkami.
Wulki traktor pokradnyli su njeznaći njedaloko delnjosakskeho Buchholza. Něhdźe 100 000 eurow drohe jězdźidło steješe na ratarskim statoku. Paduši traktor startowachu a natwarichu z drjewjanymi rjadami a paletami rampu. Po njej jědźechu z traktorom typa Deutz-Fahr na připowěšak abo nakładne awto, zo bychu jón wotwjezli. Kriminalna policija je wšelake slědy zawěsćiła.
To a tamne (14.05.25)
Astronawt Alexander Gerst smě so wotnětka „professor“ mjenować. Ministerski prezident Badensko-Württembergskeje Winfried Kretschmann (Zeleni) je jemu čestny titul spožčił. Z Künzelsau pochadźacy Gerst bě 2014 a 2018 k mjezynarodnej swětnišćowej staciji ISS lećał a tež w swojej badensko-württembergskej domiznje zahorjenje zbudźił. Ludźo mjenuja jeho wot toho časa „Astro-Alex“. Nětko přińdźe doktorski titul hišće k tomu.
Truskalca je z wotstawkom najwoblubowaniši płód mjez wobydlerjemi Němskeje. Na wšěch 79 procentow woprašanych mjenuje truskalcu na prěnim městnje mjez domjacymi płodami. Tole je institut Yougov při woprašowanju w nadawku powěsćernje dpa zwěsćił. Na druhim městnje slěduje jabłuko z 58 procentami lubowarjow před malenu (53 procentow) a wišnju (50 procentow).
To a tamne (13.05.25)
Samlutki do lěsneje kupjele doběžała je třilětna holčka w Gmündenje nad Mohanom w delnjej Frankskej. Sobudźěłaćerjej dźěćo napadny. Po informacijach policije je holca dwaj kilometraj daloko nóžkowała a přez wotewrjene wrota do kupjele přišła, kotraž njebě za nowu sezonu ani hišće wotewrjena. Krótko po policiji je tež mać dźěsća dojěła, zo by holčku njezranjenu zaso sobu domoj wzała.
Wjace wopytowarjow hač wobydlerjow zličili su w Italskej: Tam je loni na wšěch 60 milionow hosći turistiske zajimawostki kraja wopytało. To je wjace hač ma kraj wobydlerjow. Na čole steji Kolosej w Romje z nimale 15 milionami wopytowarjemi. Sćěhujetej galerija mólbow Uficije w Florencu a antikske město Pompeji, kotrež bu něhdy z woporom wudyrjeneho wulkana. Turisća su statnej kasy 382 milionow eurow wobradźili.
To a tamne (12.05.25)
Muski balet z Finsterwalde je němski mišter 2025 w turněrje wjesołych rejwarjow. Skupina z Braniborskeje je so we wubědźowanju cyłoněmskeho zwjazka muskich baletow we Würzburgu přećiwo 14 dalšim mustwam w kategoriji hač do 35 lět přesadźiła. Mužojo z Finsterwalde wustupowachu z choreografiju „Rybjaceho mandźelstwa“. Za to běchu cyłe lěto zwučowali. Muske balety pochadźeja poprawom z karnewala. Mjeztym pak wustupuja tež zwonka póstnicow.
Na wšěch 50 dnjow na swoje wuchowanje na morju su rybarjo w pacifiskim oceanje čakać dyrbjeli. Ekwadorska mórska straža je pjeć muži z Peruwa a z Kolumbiskeje wuchowała, po tym zo běchu druzy rybarjo skóncowany kuter wuhladali. Jako chcychu jón wotwlec, čołm rozpadny. Tuž dyrbješe mórska straža wupomhać. Motor kutera bě wupadnył.
To a tamne (09.05.25)
Na wšě tři miliony tabletow drogi Fentanyl je policija USA w Albuquerque w staće New Mexico namakała a sćazała. Je to najwjetša namakanka tutoho razu w stawiznach kraja. W tym zwisku rěča tež wo „historiskim zajeću“ hladajo na kartel kriminelnych, kotřiž drogi produkuja a rozdźěluja. Dalše drogi kaž meth, kokain a heroin su tohorunja namakali. Cyłkownje 16 wodźacych čłonow mexiskeje cwólby Sinaloa su při tym zajeli.
Na nowu sezonu kriminality we wodowym sporće hotuje so policija w Mecklenburgsko-Předpomorskej. Najwjace dźěła načinjenja paduši, kotřiž měrja so na wonkowne motory čołmow w přistawach. Loni su 198 tajkich padow registrowali, lěta 2023 bě jich 155. Paduši pak kradnu mjeztym cyłe łódźe. Loni w meji běchu w Rostocku drohotnu 14 metrow dołhu motorowu jachtu pokradnyli.
