To a tamne (24.08.22)
Klimowej aktiwistaj staj wčera jedyn z najwuznamnišich wobrazow galerije Starych mištrow w Drježdźanach za swójsku akciju znjewužiwałoj. Wonaj nalěpištaj po słowach rěčnicy skupiny „Poslednja generacija“ swoju ruku na ramik Raffaeloweje „Sixtinskeje madony“. Wuměłska twórba sama a historiski ramik wobškodźenej njejstej. Restawratorojo pak sej nětko wšitko dokładnje wobhladuja. Policija mjeztym wobkrući, zo su přepytowanja přećiwo aktiwistomaj zahajene.
Twochnjeny byk je so w Israelu do zarjadniskeho twarjenja banki zadobył a tam po chódbach ćěrił. Wobrazy kamery zawčerawšim pokazachu, kak so wulke zwěrjo po hładkim špundowanju suwaše a do sćěny zrazy. Rěčnica banki zdźěli, zo su byka skónčnje dosahnyli a z twarjenja w Lodźe pola Tel Aviva wotwjedli. Wjetšu wěcnu škodu w twarjenju zwěsćili njejsu.
To a tamne (23.08.22)
Wopačneje wjedroweje předpowědźe dla staj nawodnica madźarskeho wjedroweho zarjada (OMSZ) a jeje zastupjer z hnydomnej skutkownosću pušćenaj, rozprawja statna powěsćernja MTI. Tak běštej 20. awgusta w Budapesće njewjedro připowědźiłoj, jako měješe so poprawom tradicionalny wohnjostroj k narodnemu swjatkej 20. awgusta wotměć. Zarjadowanje su tuž wotprajili, dokelž je před 16 lětami při wohnjostroju k ćežkemu njezbožu dóšło, při čimž pjeć ludźi zemrě a so wjace hač 300 wosobow zrani. K připowědźenemu njewjedru pak lětsa dóšło njeje.
Nimale 80 lět po jeje słužbje za čas Druheje swětoweje wójny je weteranka britiskeje Royal Air Force Peggy Terry dołh w formje pjeć šilingow zarunany dóstała. Tole bě připadnje za čas koronapandemije napadnyło, jako bě so wojak Royal Air Force w strowotniskej słužbuje ze žonu rozmołwjał. Nětko su jej pjenjezy we wosebitej ceremoniji přepodali.
To a tamne (22.08.22)
Kriminelni w Italskej su fiktiwny stat załožili a z pozdatnje zwjazanymi lěpšinami, kaž na přikład z niskej dawkowej sadźbu, ludźi wo statysacy eurow zjebali. Hižo w aprylu 2021 su zastojnicy domjacnosć w južnoitalskim Catanzaru přepytowali, hdźež bě prawdźepodobnje diplomatiske sydło „suwereneho antarktiskeho stata swj. Jurja“, policija minjeny tydźeń zdźěli. Wjace hač 700 wobydlerjow Italskeje su z 200 do 1 000 eurami wo staćanstwo w njeeksistowacym kraju prosyli.
Dweju policistow je 31lětna žona při zasadźenju w Strausbergu z piłu nadpadnyła. Zastojnicy so njezranichu, zdźěli policajska direkcija wuchod w Frankfurće nad Wódru njedawno powěsćerni dpa. Žonu dowjezechu po zwrěšćenym nadpadźe do chorownje.
To a tamne (19.08.22)
To a tamne (18.08.22)
Nahi muž je so w nocy na srjedu na puć do cyrkwje w Aalenje podał. Kaž 50lětny policiji rozjasni je wón konop kurił a chce nětko nahi, kaž je so narodźił, do Božeho domu hić. Zastojnicy pak dowjezechu muža domoj. W bydlenju přepoda 50lětny policistam tež hišće dobrowólnje sudobjo, kotrež bě z konopju napjelnjene.
Pola mnohich turistow woblubowane konjace kuče na kupje Mallorca njesmědźa strowoty zwěrjatow dla při horcoće wjace jězdźić, wozjewi zawčerawšim radnica stolicy španiskeje kupy Palma. Zakaz zwoprawdźeja, jelizo španiska wjedrowa słužba Aemet najniši žołty warnowanski schodźenk wuwoła. Tón płaći wot něhdźe 36 stopnjow celsiusa.
To a tamne (17.08.22)
W stolicy Nepala Kathmandu tuchwilu žane wotpadki njewotwozyja, dokelž při wulkej deponiji bydlacy protestuja. Wobydlerjo wokoło Banchare Danda deponije hižo někotre tydźenje nakładne awta zadźerža, kotrež chcedźa tam wotpadki dowjezć, kaž lokalne medije rozprawjeja. Wobydlerjo strukturnje słabeje kónčiny wokoło smjećoweje deponije su chudźi a ćerpja pod smjerdom kaž tež zanjerodźenjom wulkeho mnóstwa wotpadkow dla, kotrež tam jenož deponuja a njerecycluja. Z protestom žadaja sej lěpše žiwjenske wuměnjenja.
Zwěrjeću překwapjenku mějachu minjeny kónc tydźenja wobydlerjo Berlinskeho bydlenja. Tam je jich liška wopytała. Ludźo su zwěrjo sobotu rano na balkonje našli, policija zdźěli. Potom pak je liška na třěchu domu ćeknyła. Policisća zamóžachu ju pak zaso na balkon wabić. Přez bydlenje a po schodach je zwěrjo potom zaso won na dróhu běžało. Liška bě spłóšiwa a njeje nikoho nadpadnyła, w zdźělence dale rěka.
To a tamne (16.08.22)
Předrasćeny jako policist je młody muž při hłownym dwórnišću Hagen wustupował. Policisća pak su 21lětneho w nocy na sobotu lepili, jako měješe wón dźěle policajskeje uniformy zwoblěkane, policija wčera zdźěli. Tak chcyše młody muž zaćišć zbudźić, zo je zastojnik. Jako wopodstatnjenje mjenowaše wón produkciju krótkich widejow za swój account w socialnych medijach. Při tym by so wosoby naprašował. Nětko pak je policija přećiwo 21lětnemu jednanje znjewužiwanja powołanskich pomjenowanjow a drasty dla zahajiła.
W Čěskej je wubědźowanski wóz formule 1 na awtodróze jěł a so wo kedźbnosć postarał. Policija je přepytowanja k pozdatnje ilegalnej jězbje zahajiła, zdźěli wčera rěčnica přisłušneho policajskeho prezidija w Praze. Zastojnicy zawěsćichu wšitke wideja podawka, kotrež buchu dotal w socialnych medijach wozjewjenje.
To a tamne (15.08.22)
Zhubjeneho barika je policija w Mannheimje z awtodróhi wuchowała a swojemu wobsedźerjej wróćiła. Šofer motorskeho bě dar za połdralětnu dźowku spřećeleneje swójby při jězbje po zwjazkowej awtodróze A 6 zhubił, policija minjeny pjatk zdźěli. Zo njeby so barikej ničo stało, su zastojnicy wobchad skrótka zadźerželi a jeho z jězdneje wuchowali. Hač na někotre blaki njeje so zwěrjatku ničo stało. Jako dopomnjenku na swoje njewšědne wuchowanje ma barik nětko wopon policije na bančiku připinjeny.
Po třoch měsacach smědźa so kóčki w badensko-württembergskim Walldorfje zaso swobodnje pohibować. Dwě njedźeli zašo hač předwidźane je so dźensa jónkrótny lockdown za kóčki zakónčił. Młodźata wot wotemrěća wohroženych chocholikow (Haubenlerche) su dźakowano wjedrowemu połoženju tak daloko wuwite, zo hižo riziko njewobsteji, zo móhli je kóčki napadnyć.
To a tamne (12.08.22)
Jako štom předrasćeny muž je w bayerskim Ingolstadće kolesowarku wustróžił, a to tak jara, zo je 45lětna padnyła a so zraniła. Žona bě ze swojim mandźelskim w měšćanskim parku po puću, jako so z plastowymi łopjenami zdrasćeny muž naraz pokaza. Wón drje jej hišće pomoc poskići, potom pak so naraz zminy. Policija pyta nětko za swědkami tuteje kuriozneje situacije.
Dwaj měsacaj po zajeću Jasona Alexanera před domom spěwarki Britney Spears su něhdyšeho mandźelskeho spěwarki ranjenja domjaceho měra a ranjenja ćěła dla wobwinowali. Napřećo statnemu rěčnistwu je Alexander wumjetowanja přiznał, zo by so procesej wuwinył. Jeho su mjeztym pušćili. Wón dyrbi pak wotstawk sto metrow k Spears dodźeržeć. Spěwarka bě so 2004 na swojeho přećela wudała, mandźelstwo dźeržeše 55 hodźinow.
To a tamne (11.08.22)
Z hamorom su policisća w Hövelhofje pola Paderborna dwaj měsacaj stare dźěćo ze zamknjeneho awta wuswobodźili. 33lětna mać bě dźěćo mylnje zamknyła a na klučiki w awće zabyła. Starosćo so wo swoje dźěćo wołaše žona nuzowe čisło policije. Jedyn z policistow z nuzowym hamorom wokno šofera kedźbliwje rozbi, zo njeby dźěćo zranił. Přiwšěm wołachu tež wuchowansku słužbu.
200 eurow pokuty napołožić chcedźa w chorwatskim dowolowym měsće Baška na juhu kupy Krk kóždemu turistej, kiž sej z pomocu trjenja lěhadło při brjoze morja „rezerwuje“. Tole su zamołwići za turizm města připowědźili. Dotal njeje jasne, kak chcedźa zakaz přesadźić, wšako dyrbiš ludźi při wupołoženju trjenja lepić. Na kupje Teneriffa sćelu wjacori hotelownicy swojich sobudźěłaćerjow, kotřiž trjenja při poolu prosće zhromadźa.
