To a tamne (20.02.25)
Njeznaći su sydom ćelatow z hródźe w Arzbergu pokradnyli. Skućićeljo su so w nocy do zymskeho kwartěra skoćatow zadobyli, zdźěli policija w Lipsku. Cyłkowna hódnota ćelatow wučinja wjace hač 2 000 eurow.
Ryby su mudre. Tole zwěsćichu nětko wědomostnicy Max-Planckoweho instituta za biologiske zadźerženje w Konstanzu. Při slědźenju na kupje Korsika bě wědomostnikam napadnyło, zo jim wěste ryby při nurjenju sćěhowachu a picu spakosćichu, kotraž bě poprawom jako mytowanje za wuspěšne pospyty postajena. Zadźiwani zwěsćichu, zo přewodźachu ryby bjezwuwzaćnje ludźi, wot kotrychž su hižo raz chłóšćenki dóstali.
To a tamne (19.02.25)
Swětoznata pomazanka je nětko bjez praweje ruki. Lětdźesatki dołho mjenowachu jeho medije „nana nutelle“, tola 14. februara wón w starobje 97 lět zemrě. Francesco Rivella bě nimo Michele Ferrero worjechowu-nugatowu pomazanku wuwił. Rivella bě zežiwidłowy chemikar. Słowo „nutella“ zestaja so z dweju słowčkow, jendźelskeho słowa „nut-“, štož rěka worjech, a „-ella“, štož je klasiska italska kóncowka.
Wótře telefonować móže fatalne sćěhi měć. Znajmjeńša je tole žona w ćahu do Rosenheima nazhoniła. Wona so při telefonaće wjeseleše, zo běše horda, zo je policiji wućeknyła. Ciwilny policist to słyšeše a zazwoni swojich kolegow. Kaž so wukopa, bě so wona wospjet agresiwnje zadźeržała, čehoždla ju hamtske sudnistwo w Mnichowje do psychiatrije přepokaza.
To a tamne (18.02.25)
Nimo tankowanskeho turizma při němsko-awstriskej mjezy je nětko dalšeje přičiny, sej do susodneho kraja jěć a fenki lutować. W Awstriskej dóstanješ za kašćik z 20 prózdnymi blešemi wot spočatka februara 3,90 eurow wjace hač w Němskej. To so hižo čile zwužitkuje, ludźo zdźěla z wjacorymi kašćikami přez hranicu jězdźa. Štož zda so być hrabnjenčko za přetrjebarjow, je za piwarcow katastrofa, dokelž maja dale a mjenje prózdnych blešow z wikowanja k dispoziciji. Nětko pytaja potrjecheni za rozrisanjom problema.
Klanka je znowa zasadźenje policije při kanalu w Berlinje zawinowała. Ludźo běchu tam wčera přizjewili, zo su we wodźe mortweho wuhladali. Na městnje so wukopa, zo jednaše so wo klanku. Na fotach bě klanka na zamjerznjenym kanalu widźeć. Wona wupadaše kaž dźěćo.
To a tamne (17.02.25)
Perfektne slědy je młodostny w sněze zawostajił. W sakskim Altenbergu je wón policiji spěšnje pomhał njeskutk wuslědźić. Kaž Drježdźanska policajska direkcija zdźěli, bě 16lětny zawčerawšim rano zakazane symbole na sćěnje garaže zawostajił. Na městno njeskutka zwołani zastojnicy trjebachu jenož slědam w sněze sćěhować. Wone dowjedźechu jich direktnje k podhladnemu.
Hrónčko „Za dessert je přeco městno“ je nětko wědomostnje wobkrućene. Tak so bańki nerwow wo to postaraja, zo maja ludźo apetit na něšto słódke. Tak mjenowany dessertowy žołdk je tuž w mozach zakótwjeny. To su za wšitkich lubowarjow chłóšćenkow dobre powěsće.
To a tamne (14.02.25)
Kaž Jonas w bibliskich stawiznach: Wjelryba je 24lětneho čołmikarja na juhu Chile spóžrěła a sekundy po tym wuplunyła. Nan muža je njesłyšany podawk z mobilnym telefonom dokumentował. Čołmikarjej njebě spočatnje ani wědome, što so z nim stała. Jako bě w ćmowej tlamje ryby, mysleše na smjerć. Hakle pozdźišo sej situaciju prawje wuwědomi. Najebać to chce dale čołmikować.
Starc je we wobchodźe w Nossenje z pistolu w ruce zasadźenje policije zawinował. Swědcy běchu muža wobkedźbowali a zastojnikow wołali. Tući muža kontrolowachu. Při tym so wukopa, zo je 74lětny hrajkansku pistolu za wnučka kupił a hnydom wupruwował, hač nastroj z papjerjanymi šlebjerdkami woprawdźe praska. Pistolu móžeše starc wobchować. Zdobom pak jeho policisća powučichu, kak ma so z njej w zjawnosći zadźeržeć.
To a tamne (13.02.25)
Nimale 900 kilogramow kokaina je policija w mašinje namakała, kotruž běchu z Kolumbiskeje do Luxemburga přiwjezli. Wopojny jěd bě we walcach schowany, kotrež słužachu k rozkuskowanju kamjenjow. Hódnotu sćazaneho kokaina trochuja na 160 milionow eurow. Zo bychu pakćiki z walcow wućahnyć móhli, dyrbjachu mašinu kompletnje rozebrać. Policija je dweju podhladneju zajała.
Chrobły pad ćeknjenja po njezbožu policija w poruhrskim Herdecke přepytuje. Njeznaty bě na parkowanišću do druheho awta prasnył a na to cedlku zawostajił, tola jenož po zdaću. „Bohužel sym runje do wašeho awta zajěł. Pěšk pak je mje wobkedźbował. Tuž nětko tak činju, jako bych swoje daty zawostajił“, na papjerce steješe. Jako tróšt bě małe słónčko namolowane. Policija pyta nětko za swědkom, wo kotrymž njeznaty piše.
To a tamne (12.02.25)
Kedźbliwy pěšk je w přijimarni hódnotnych maćiznow w hornjej Bayerskej panteroweho chameleona ze styroporoweje tyzy wuchował. Zwěrjo z mjenom Lucifer běchu prawdźepodobnje strowotnych problemow dla wusadźili, fachowcy stacije za reptilije měnja. Muž bě škrabanje w tyzy słyšał a na kóčku tukał. Na to wuhladachu chameleona. Zwěrjo dyrbi nětko do karanteny. Wobsedźerjej hrozy pokuta ranjenja zakonja za škit zwěrjatow dla.
Wot junija minjeneho lěta w swětnišćowej staciji ISS čakacaj astronawtaj móžetaj so nětko snano tola prjedy na zemju wróćić hač myslene. NASA, swětnišćowy zarjada USA, je rozsudźił, zo bjeru za nawrót hižo raz wužiwanu kapslu typa „Dragon“. Poprawom chcychu čakać, doniž njeje nowa kapsla dotwarjena. To pak móhło trać. Trjebany nastroj steji porno tomu hižo w měrcu k dispoziciji.
To a tamne (11.02.25)
Mole w kamorach, winowych škleńcach a samo na zubnych šćětkach – porik we Wulkej Britaniskej je njelubu překwapjenku dožiwił, po tym zo bě sej chětro drohe bydlenje we wosobnej kónčinje na zapadźe britiskeje stolicy kupił. Nětko je sudnistwo rozsudźiło, zo dyrbja kupcam najwjetši dźěl wonych 39 milionow eurow wróćić. Předawar twjerdźeše, zo njeje ničo wo škódnikach wědźał. Sudnik widźeše to hinak.
Cigareta na dwórnišću w Hannoveru ma za 52lětneho prawniske sćěhi. Muž bě z dźěsćomaj w spěšniku ICE po puću do Berlina. Na dwórnišću kurješe wón cigaretu, jako ćah wotjědźe. Dźěći w starobje dźewjeć a jědnaće lět běštaj z wačokami w ćahu. Policija dźěsći w Magdeburgu přewza. Při přepytowanju kófrow namakachu 500 gramow cannabisa. Nětko přepytuja přećiwo mužej.
To a tamne (10.02.25)
Pod Nutellu hišće butru abo nic? Tute prašenje njeje zwjazkowemu kanclerej Olafej Scholzej scyła wažne. „Zwjetša scyła njesnědam“, wotmołwi politikar SPD na prašenje šulerja na zarjadowanju we wobłuku wólbneho boja w Ludwigsburgu. Z Nutellu Scholz tak a tak wjele započinać njemóže: Wot swojeho dwanateho žiwjenskeho lěta wón tule šokolodźanu pomazanku njewužiwa.
Snadny wothłós je njewšědna akcija wólbneho boja Berlinskeho politikarja Lasse Hansena (27) žnjała. Minjenu sobotu chcyše wón w hosćencu w stolicy tysac Cheesburgerow předać a sej za kóždy runje jedyn cent žadać. Planowany nawal kaž něhdy pola Lukasa Podolskyja w Kreuzbergu pak wuwosta: Po informacijach Hansena su 400 Cheesburgerow rozdawali. Reporterojo nowiny B.Z., kotřiž su wo kurioznej akciji rozprawjeć chcyli, tole wobkrućić njemóžachu.
To a tamne (07.02.25)
Za wodźidłom swojeho oldtimera je žona w Ludwigshafenje tčacy wostała, dokelž elektriske přestajenje sedła hižo njefungowaše. Sedło hodźeše so jenož hišće doprědka k wodźidłu sunyć, wróćo pak nic wjace. Tež wohnjowi wobornicy sej žaneje rady njewědźachu. Skónčnje wućahnychu wulke hydrawliske nožicy a žonu wuswobodźichu. Kelko škody su w drohim awće zawostajili, njeje znate.
Šlagrowy spěwar Heino je čestny hósć Semperoweho operoweho bala dźensa wječor w Drježdźanach. 86lětny njebě hišće ženje na tutym balu a so přewšo wjeseli, nowiny pisaja. Loni bě Heino hósć Wienskeho operoweho bala. Spěwać wšak zastupnik jakneho němskeho šlagra w Drježdźanach njebudźe. Za to pak wočakuja jeho w kruhu prominentnych na čerwjenym přestrjencu a na rozmołwje z čestnymi hosćimi.
