To a tamne (07.04.25)
Wjace hač 60 pokradnjenych dźěćacych wozyčkow, sedłow a podobnych wěcow su policisća pola porika w Karlsfeldźe blisko Mnichowa našli. Do toho bě młody nan policiji zdźělił, zo su njeznaći dźěćacy wóz swójby pokradnyli. Při wozyčku pak bě sćelak schowany, kotryž dowjedźe policistow k bydlenju podhladneju. Tam namakachu wóz a dalše wěcy w hódnoće wjacorych sta eurow, kotrež bě porik pokradnył a dale předawał.
Nowy wěstotny koncept su krótko do zahajenja turistiskeje sezony w dowolowym srjedźišću Palma na kupje Mallorca předstajili. Alkoholowym ekscesam minjenych lět chcedźa wotnětka zadźěwać, měšćanosta Jaime Mertínez připowědźi. Tak su tři nowe policajske awta kupili. Nimo toho zasadźuja 170 přidatnych uniformowanych a ciwilnych policistow, zo móhli spěšnje zapřimnyć.
To a tamne (04.04.25)
Tysac eurow pokuty dyrbi bywši wrotar němskeho narodneho koparskeho mustwa Jens Lehmann zapłaćić. Jeho běchu po Oktoberskim swjedźenju z 0,7 promilemi alkohola za wodźidłom awta lepili. Mnichowske hamtske sudnistwo ma tole za přeńdźenje přećiwo wobchadnemu porjadej. Jězbnu dowolnosć je Lehmann hižo před měsacom wotedał. Tuž je naležnosć za njeho wotbyta.
Wjace hač 200 pasažěrow luksusoweje wulětniskeje łódźe „Queen Mary II“ je na norovirus schorjeło. Prěnje rozprawy wo pasažěrach, kiž běchu bluwali a na židlawu skoržachu, su so w měrcu jewili, jako bě łódź w New Yorku pozastała. Po informacijach zarjadnišća za škit před mrětwami USA je 224 z cyłkownje 2 538 sobujěducych schorjeło, nimo toho 17 čłonow mustwa. Woni su izolowani. Łódź tuchwilu desinficěruja.
To a tamne (03.04.25)
Šlinkam je tuchwilu přesuche. Populacija je drje z poměrnje wysokej ličbu do lěta 2025 startowała, suchota w februaru a měrcu pak wuwiće šlinkow tuchwilu haći. To fachowcy Senckenbergskeho slědźenišća w Frankfurće zwěsćichu. Inwazija kaž loni wokomiknje njehrozy, byrnjež małe šlinki hižo widźeć byli.
Bywši nawjedowanski bunker nutřkowneho ministerstwa NDR w Freudenbergu na sewjeru Braniborskeje móžeš kónc tydźenja zaso wopytać. „Bunker 7001 je dźěl widźomnych stawiznow NDR“, organizatorojo wodźenjow zdźěleja. Bunker běchu 1986 dotwarili. Wón skići 200 ludźom městno. W nim chcychu w padźe wójny zjawne žiwjenje w NDR nawjedować. Něhdźe 400 telefoniskich syćow zwjazowaše objekt z policiju, wójskom a statnej wěstotu. Hač do 1989 běchu w nim dwójce wšě wotběhi zwučowali.
To a tamne (02.04.25)
To a tamne (01.04.25)
Chłostanskemu jednanju překročenja dowoleneje spěšnosće dla móže so sakski kultusowy minister Conrad Clemens (CDU) tola hišće wuwinyć. Běłowodźanske hamtske sudnistwo namjetuje jemu dojednanje: Clemens zapłaći pokutu 10 000 eurow. Nimo toho dyrbi wón wobchadny seminar wopytać a 20 hodźin wobchadneje wučby w šulach podawać. Clemens ma tydźeń chwile, so rozsudźić, hač poskitk přiwozmje.
Dwulětny hólc je njezbožo sněhoweho mobila na priwatnym swjedźenju w hornjobayerskim Bischofswiesenje zawinował. 37lětna šoferka bě dźěćo k sebi wzała, jako motor motorowych sanjow hižo běžeše. Hólc zwjertny płunowu ručicu, tak zo mobil z wulkej spěšnosću wotjědźe. Mobil zrazy z wotmachom do zawrjenych wrotow garaže. Pjeć dźěći, šoferka a dalši sobujěducy so zranichu.
To a tamne (31.03.25)
Lěta trajaca zwada wo psyči dawk w sewjerorynsko-westfalskim Hildenje je skónčena. Muž bě so jako lubowar psow w interneće stajnje zaso z psami pokazał. Na to bě jemu měšćanske zarjadnistwo zličbowanku 1 404 eurow za psyči dawk pósłało, dokelž njebě muž jako wobsedźer psow scyła zapisany. Sudnistwo nětko rozsudźi, zo njebě zličbowanka woprawnjena. Psy słušachu mjenujcy dźowce, přećelce, znatym abo susodam.
Atrapa błyskača na priwatnej ležownosći njedaloko württembergskeho Tuttlingena je jara wuspěšna. Wobsedźer zahrody na kromje wsy Frittlingen twjerdźi, zo šoferojo tam nětko wo wjele kedźbliwišo jědu. Zakazać jemu atrapu njemóža. Přiwšěm je sej policija nastroj bliže wobhladała, kotryž runa so błyskačowemu sćežorej. W nim pak njesteji awtomatiska kamera, ale kórkowa škleńca.
To a tamne (28.03.25)
Nachwilnje do chorownje zapokazać dyrbjeli su britiskeho krala Charlesa III. Přičina su wšelake wuskutki terapije přećiwo rakej, Buckinghamowy palast zdźěla. Wšitke terminy su po namjeće lěkarjow wotprajili. Kral je mjeztym zaso na swojim Londonskim kuble Clarence House. 76lětny bě w februaru 2023 zdźělił, zo je na rak schorjeł. Wot toho časa jeho lěkuja.
Njekedźbliwe zadźerženje wužiwarjow e-scooterow je přičina mnohich wobchadnych njezbožow. Tole su slědźerjo Göteborgskeje uniwersity při přepytowanju zwěsćili. Najčasćišo wobkedźbuja, zo jědu ludźo jenož z jednej ruku, zo hibaja so w skupinach abo zo maja mobilny telefon w ruce. Wosebje překwapiło je fachowcow zwólniwosć wužiwarjow, so do strašnych situacijow podać. Štóž roler sam njewobsedźi, nječini sej starosće wo móžnych sćěhach a škodach, w rozprawje rěka.
To a tamne (27.03.25)
Wobsedźerka 15 000 eurow, kotrež bě sprawna sobujěduca w spěšniku ICE namakała, je so přizjewiła. 34lětna ze Schleswigsko-Holsteinskeje bě hižo njedźelu pola policije skoržiła, dokelž z toho wuchadźeše, zo su jej pjenjezy pokradnyli. Wona pak měješe zbožo: 33lětna z Lipska bě tobołu z pjenjezami w spěšniku z Hannovera do Mnichowa wuhladała a policiji přepodała. Pjenjezy za nowe awto chcedźa žonje nětko přepodać.
Z balonom płuna w ruce su 27lětneho šofera wosoboweho awta w Berlinje lepili. Muž bě napadnył, dokelž z wočinjenym woknom zastojnikam nadawaše a płun z balona zadycha. Jako jeho policisća zadźeržachu, bě šofer chětro agresiwny. Hakle po dlěšim času wočini durje a so jim raznje spjećowaše. Policisća dyrbjachu jeho namócnje z awta wućahnyć a sputać. Nětko hrozy jemu chłostanje.
To a tamne (26.03.25)
Nadhodźiny w swětnišćowej staciji ISS dwěmaj astronawtomaj USA njezapłaća. Tole zdźěla swětnišćowy zarjad NASA. Runje druhim přistajenym knježerstwa dóstanjetaj wonaj mzdu za 40 hodźinski dźěłowy tydźeń. Nimo toho wšak přewozmje NASA kóšty za transport, přebywanje a zastaranje w ISS. Techniskeje pany dla dyrbještaj wobaj dźewjeć měsacow na swój nawrót na zemju čakać.
Po dwanaće hodźinach čakanja na lodźe jězora su pomocnicy w Alasce nana a toho dwě dźěsći wuchowali. Lětadło swójby bě so hižo nimale dospołnje podnuriło, medije USA rozprawjeja. Přiwšěm mějachu wšitcy třo hišće wulke zbožo: Małe lětadło bě z njeznateje přičiny na zamjerznjenym jězoru přizemić dyrbjało. Wot toho časa pomocnicy za nim pytachu. Skónčnje mašinu w njesměrnej lodowej pusćinje Alaski wuhladachu.
To a tamne (25.03.25)
Na wšěch 15 000 eurow je žona w spěšniku ICE ducy z Hannovera do Mnichowa namakała. 33lětna přizjewi so na to pola zwjazkoweje policije. Pjenjezy ležachu w tobole na prózdnym sedle w ćahu. Žona tošu policistam přepoda, kotřiž pjenjezy přeličichu. Dotal njeje so nichtó jako wobsedźer pjenjez přizjewił. Žona ma prawo na namakanske myto. Najprjedy raz pak policija pjenjezy wobchowa.
Pjany pasažěr je na lětanišću w Bremenje zapozdźenje wotlěta mašiny na kupu Mallorca zawinował. Jako pilot lětadło hižo na wotlět přihotowaše, sobudźěłaćerjam pjany muž napadny. 53lětny so přikazam stewardesow spjećowaše a jim dosć agresiwnje nadawaše. Pilot swoje přihoty na to přetorhny a muža z lětadła wupokaza. Mašina z dowolnikami móžeše hakle z 45 mjeńšinami zapozdźenja do směra na Španisku wotlećeć.
