To a tamne (14.08.25)
Žona je blisko Lüneburga trut nad baćonjace hnězdo wodźiła, tak zo su ptački hnězdo wopušćili. Policija pad nětko přepytuje – podhlada přeńdźenja přećiwo zwjazkowemu zakonjej za škit přirody dla. Baćony bě trut najskerje hižo něhdy kónc meje abo spočatk junija zahnał. Pječa běchu wobydlerjo žonu tehdy namołwjeli, zo njech přestanje baćony mylić. Trut pak je do hnězda zalećał a tam ležo wostał. Hakle spočatk tohole tydźenja je zamołwity za přirodoškit trut z hnězda wućahnył.
Ćeknjeny kóń je wčera regionalnu železnicu pola Marburga nuzował zastać. Wodźer ćaha nadobo šumjela wuhlada, kotryž podłu kolijow běžeše. Jako so zwěrjo direktnje na kolije měrješe, wón zasta, zo móžeše kóń kolije přeprěčić. Policija je skónčnje přijěła, konja popadnyła a wobsedźerja wuslědźiła.
To a tamne (13.08.25)
Jelizo policija při wobdźěłanju přeńdźenjow problemy ma, potom poskića zastojnicy kóždemu, kotryž pomhać móže, nahladny fenk. Wšako móhł kóždy pokiw pad rozrisać. Za to potom tež zjawnje wabja. Tola tajke postupowanja su w Sakskej rědke. W lěće 2022 je swobodny stat posledni raz pjenjezy za to wudał. Najwyšu sumu minjenych lět we wobjimje 500 000 eurow su zastojnicy kónc lěta 2019 k dispoziciji stajili, jako běchu so juwele ze Zeleneho wjelba zhubili. Tola dóstał ju nichtó njeje.
Zwěrjatownja w Berlinje je w tuchwilnych lětnich prózdninach hižo 147 wusadźenych zwěrjatow přiwzała. Mjez nimi su 79 kóčkow a 26 psow – to je nadpřerěznje wjele. Zdźěla su ludźo tež nopawy w plastowych boksach bjez dźěrkow za powětr něhdźe wotstajili.
To a tamne (12.08.25)
To a tamne (11.08.25)
Syčomłóćawa je so zawčerawšim přez kerčiznu na party w zahrodźe dóstała. Dźesać tonow ćežku mašinu běchu dźěłaćerjo w Badensko-Württembergskej wjacore sta metrow wot zahrody zdalene na polu wotstajili. Kaž policija zdźěli, je so kolos potom bjez wodźerja pohibował a do zahrody zajěł. Na zbožo njeje so nichtó na party w Bad Überkingenje zranił. Tež dom njeje wobškodźeny. Syčomłóćawa bě so w kerčinje zašmjatała a w zahrodźe stejo wostała.
Konopej je minjeny pjatk njeznaty šofer na zwjazkowej dróze we wokrjesu Bad Kreuznach w Porynsko-Pfalcowskej zhubił. Šoferka njemóžeše konopejej wuwinyć a do njeho zrazy. Zraniła so wona při tym njeje. Jeje awto je so sylnje wobškodźiło, policija zdźěli a so swědkow nadźija.
To a tamne (08.08.25)
Atomowy reaktor na měsačku je w lěće 2030 bjeze wšeho móžny. Wo tym je němski swětnišćowy projektowy manager europskeho swětnišćoweho zarjada ESA, Markus Landgraf, přeswědčeny. Fachowcy hižo dołho tajke technologije wuwiwaja a spochi na tym slědźa, wón nowinarjam rjekny. Přiwšěm je sej wón wěsty, zo móhło wuwiće hižo dale być, bychu-li so móžnosće nuklearneje technologije lěpje wuzbytkowali.
Golden Retrievera z nuzy wuswobodźili su čłonojo hórskeje słužby w Awstriskej. Z pomocu helikoptera móžachu psycu sewjerorynsko-westfalskich dowolnikow wuchować, kotraž pak so při njezbožu ćežko zrani. Swójba bě w Vorarlbergu po horach po puću, jako so psyk druheje swójby do psycy da. Ta reagowaše strachoćiwje a padny 40 metrow do nahłeje hłubiny.
To a tamne (07.08.25)
Kupanske wjedro a horcotu wjedrarjo wulkim dźělam Němskeje přichodne dny wěšća. Na juhu Němskeje wočakuja hač do 30 stopnjow, zwjetša wostanje sucho. Jenož na sewjeru drje su šwihele móžne. Hrimanja horcoty dla tohorunja wuzamknjene njesu. Ludźo njesměli na škitnu kremu pře słónco zabyć. W nocach budźe přiwšěm poměrnje chłódno.
Monogamija je po měnjenju wjetšiny wobydlerjow Němskeje najlěpša forma lubosćinskeho žiwjenja. 72 proc. dorosćenych njemóže sej předstajić, z wjacorymi partnerami runočasnje žiwy być. Tole je woprašowanje instituta Civey wunjesło. Jenož 18 procentow sympatizuje z alternatiwnymi žiwjenskimi formami. Přičina wulkeho přihłosowanja monogamiji je jednora: Ludźo su z tutej formu zhromadnosće přewažnje spokojom.
To a tamne (06.08.25)
Wo 1 400 kilogramow přećežki bě transporter na awtodróze A 7, jako jón zastojnicy kontrolowachu. Nan a syn běštaj požčeny wóz za přećah z Bayerskeje do Bremena napakowałoj. Policistam je awto napadnyło, dokelž je zadni dźěl hižo chětro přewisował. Waha na parkowanišću pokaza 4 900 kilogramow město dowolenych 3 500. Šoferej hrozy chłostanka 235 eurow a dypk w Flensburgu.
Dokelž je pawiany w Nürnbergskim zwěrjencu morił, hroža direktorej nětko ze smjerću. Dźesać konkretnych hroženjow su policiji sposrědkowali, direktor Dan Encke zdźěli. W socialnych medijach kopja so njekonkretne hroženja. Tež z listami abo mejlkami jemu hroža. W zwěrjencu su minjeny tydźeń dwanaće pawianow morili, dokelž bě jich wobhrodźenje přepjelnjene. Nichtó nochcyše wopicy přewzać, tohodla dyrbjachu je zasparnić.
To a tamne (05.08.25)
W jastwje wostać dyrbi rapper Sean „Diddy“ Combs z USA hač do spočatk oktobra planowaneho sudniskeho wusuda přećiwo njemu. Přisłušny sudnik w New Yorku je próstwu rappera wo dočasne pušćenje z jastwa wotpokazał. Prawiznicy hudźbnika su próstwu z tym wopodstatnili, zo rapper nikoho njewohrožuje a zo nochce ćeknyć. Woni poskićichu kawciju 50 milionow dolarow, zo by Diddy w domjacym aresće přebywał.
Atomowu milinarnju na měsačku planuje NASA, swětnišćowa agentura USA. Po internych rozprawach přiwza NASA w přichodnych 60 dnjach konkretne poskitki ze stron industrije za reaktor z wukonitosću sto kilowattow. Reaktor ma najpozdźišo 2030 na měsačku dźěłać. Pozadk je přiběraca konkurenca ze stron Chiny. Kraj planuje runočasnje misiju kosmonawtow na trabanće zemje.
To a tamne (04.08.25)
Wójsko Južneje Koreje wotnětka wótřerěčaki podłu mjezy Sewjerneje Koreje wottwarja. Tole je „praktiska naprawa“, kotraž ma napjatosće mjez sewjerom a juhom korejskeje połkupy znižić, zakitowanske ministerstwo w Seoulu zdźěla. Južna Koreja bě z wótřerěčakami přinoški wusyłała, kotrež so přećiwo režimej Sewjerneje Koreje měrjachu. Nowe knježerstwo prezidenta Lee Jae Myunga chce napjatosće z Pjöngjangom redukować.
Wulkan Krašeninnikow je po 400 lětach znowa wudyrił. Stało je so tole na połkupje Kamčatka na dalokim wuchodźe Ruskeje něšto dnjow po zemjerženju před Kamčatku. Mróčel popjeła a płuna saha šěsć kilometrow wysoko. Dotal lawa wulkana lěsy a sydlišća w přirodnym rezerwaće Kronozki njewohrožuje. Krašeninnikow je jedyn z cyłkownje wosom wulkanow w tutej kónčinje.
To a tamne (01.08.25)
Na wšěch 3 000 kubiknych metrow sykaneho drjewa su zamołwići heavy-metaloweho festiwala w schleswigsko-holsteinskim Wackenje skazali, zo móhli so planowane koncerty na swjedźenišću najebać błóto wotměć. Dešć minjenych dnjow – dobre 40 litrow na kwadratny meter – je festiwalnišćo za 80 000 wobdźělnikow do błóćaneho žumpadła přeměnił. Nalada je najebać to dobra, zarjadowarjo twjerdźa. Tuchwilne słónčne wjedro spožča jim „wjele optimizma“.
18 000 eurow dołžeše němskemu financnemu zarjadej w Šwicarskej bydlacy Němc, jako chcyše pomjezny přechod Rheinheim do Němskeje přeprěčić. Při kontroli cłownicy zwěsćichu, zo přećiwo mužej wukaz zajeća předleži. Sudnistwo bě jeho dawkoweho jebanstwa dla zasudźiło. Zastojnicy muža zajachu a do přichodneho jastwa dowjezechu.
