Awtor dźensa

Kilian Hrjehor

Aktualnje steja swětowe mišterstwa w sportowym programje: FIFA klub WM. Tónraz nic jako mały, lědma wobkedźbowany turněr, ale w formaće XXL. Z 32 mustwami, wjacorymi tydźenjemi hrajneho časa, miliardami kóštow a mnohimi wotewrjenymi prašenjemi. FIFA předawa turněr aktualnje jako­ měznik koparskich stawiznow.

Štož bě něhdy małe wubědźowanje ze šěsć abo sydom mustwami, je nětko mamutowy ewent. Najlěpše towarstwa ze wšěch kontinentow swěta nastupja na tak mjenowanym mini-swětowym mišterstwje klubow. To klinči na papjerje napjate, tola we woprawdźitosći je dobytk dwělomny. Hižo nětko je mjezynarodna protyka z koparskimi hrami přepjelnjena. Hrajerjo skorža nad poćežowanjom, trenarjo nad problemom planowanja, zwjazki nad prěkowanjom terminow. A nětko tež hišće tónle turněr!