To a tamne (21.05.26)
Zahinjena wjelryba „Timmy“, kotruž su před něšto wjac hač tydźenjom před danskej kupu Anholt wuhladali, běše prawdźepodobnje „Tina“. Mórski biologa a čłon towarstwa za škit wjelrybow M.E.E.R. Fabian Ritter je nowe fota wo zwěrjeću wuhódnoćił a wonkowne žónske splažne organy zwěsćił. Minister za wobswět Mecklenburgsko-Předpomorskeje Till Backhaus, eksperća a medije su dotal wo muskej rybje rěčeli.
Preparěrowanu swójsku wutrobu je 32lětna Martina Grabsch z Wunstorfa w Nižosakskej přijała. Loni běchu jej wutrobu darićela zasadźili. Najebać mnohe operacije nochcyše młoda žona, kotraž bě 30 lět z chorej wutrobu žiwa była, zo wuoperowany organ prosće preč ćisnu. Staršej staj jeje wutrobu wot znateho medicinarja a plastinatora Gunthera von Hagensa preparować dałoj.
To a tamne (20.05.26)
To a tamne (19.05.26)
Něhdyša zwjazkowa kanclerka Angela Merkel (CDU) by so komisije ekspertow woprašała, by-li wona rozsudźić dyrbjała, što ma so z wjelrybu Timmyjom stać, kotruž běchu z Baltiskeho morja wuchowali a kiž je nětko před Danskej kupu zahinyła. Póndźelu běchu so jeje w podcasće „0630“ sćelaka WDR za tym prašeli. „Sym so woprawdźe prašała, što bych ja nětko činiła“, wona přizna.
Wjace hač 100 000 eurow je 55lětny hotelej w Berlinje dołžny, w kotrymž je cyłe lěto bydlił, bjez toho zo by hdy zličbowanku za to zapłaćił. Muž bě pječa planował, přebytk njezapłaćić. Jemu nětko wobšudźenje we wulkim stilu wumjetuja. Statne rěčnistwo wo tym informuje, zo je muž stwu w měšćanskim dźělu Treptow-Köpenick w aprylu 2023 wotnajał. Wón bě twjerdźił, zo druzy zličbowanku zapłaća.
To a tamne (18.05.26)
Hač zasudźenu prawicarsku ekstremistku Marlu Svenju Liebich do Němskeje přepodadźa, Plzenske krajne sudnistwo dźensa rozsudźi. Liebig, kotruž běchu spočatk apryla na němsko-čěskej mjezy zajeli, sedźi wot toho časa w čěskim jastwje. Jeli sudnistwo rozsudźi, ju Němskej přepodać, wočakuje ju jastwo w Kamjenicy. Za zasudźenej ekstremistku běchu wot kónca awgusta 2025 najprjedy w Němskej, pozdźišo po wšej Europje pytali.
Mortwa wjelryba, kotruž běchu minjeny štwórtk před danskej kupu Anholt wuhladali, je samsne zwěrjo, kiž bě wjacore razy w Baltiskim morju před němskim pobrjohom w pěsku tčacy wostało. Pod mjenom „Timmy“ běštej ryba a jeje wuchowanje němsku towaršnosć wjacore tydźenje zaběrałoj. Kadawer wjelryby danske knježerstwo wotwlec nochce, dokelž to w Danskej z wašnjom njeje.
To a tamne (15.05.26)
Pjeć italskich nurjakow je před Malediwami swoje žiwjenje přisadźiło. Wo tym informuje italske wonkowne ministerstwo. Nurjacy chcychu sej prózdnjeńcy we hłubokosći 50 metrow wobhladać, w zdźělence z Roma dale rěka. Detaile hišće znate njejsu. Zastojnicy na Malediwach njezbožo nětko přepytuja. Mjez nurjakami běchu po informacijach italskich medijow štyrjo studenća resp. sobudźěłaćerjo uniwersity w Genuwje.
Noweho Jamesa Bonda pyta filmowe studijo Amazon MGM. Wo tym informowachu zamołwići na platformje X. Hižo wjacore lěta mnozy wo tym spekuluja, kotry dźiwadźelnik móhł rólu přewzać. Tež bulwarne nowiny běchu wjace króć wo tym hódali. Insiderojo měnja, zo budźe nowy Bond pječa mało znaty britiski dźiwadźelnik w starobje kónc dwaceći, spočatk třiceći lět.
To a tamne (13.05.26)
Mäc Geiz – wobchod za tunje produkty – je tutón tydźeń próstwu wo insolwencu zapodał. Předań w dohromady 180 filialach pak ma tuchwilu pokročować, zdźěla zamołwići na internetnej stronje předewzaća, kotrež ma w Saksko-Anhaltskim Landsbergu swoje sydło a w kotrymž něhdźe 1 200 ludźi dźěła. Jako přičinu za rozsud mjenuja zasadnu zdźeržliwosć kupcow w časach hospodarskeje njewěstosće.
Howjada z pastwy pokradnyli su paduši w Braniborskej – a to hižo trěći raz w běhu minjenych tydźenjow. Njeskutk sta so tónraz we wjesce Grano we wokrjesu Sprjewja-Nysa. Potrjecheny plahowar zhubi 31 howjadow. W zdźělence powěsćernje dpa zwurazni prezident Krajneho burskeho zwjazka Henrik Wendorff, zo ma za prawdźepodobne, zo skućićeljo zwěrjata do wukraja wjezu a je tam zarězaja.
To a tamne (12.05.26)
Tójšto drohoćinkow je dźěćo pěstowarskeje skupiny na hrajkanišću w Berlinje našło. W pěskowym kašćiku w měšćanskim dźělu Wilmersdorf wuhrjeba wone slěbornaki, złoćane debjenki, kruch złota, luksusowe časniki a 6 000 eurow hotowych pjenjez, zdźěli policija w socialnych medijach. Kriminalna policija nětko přepytuje, hač su namakane wěcy dźěl rubjenstwa.
Před zawrjenymi durjemi hłowneho twarjenja stejachu póndźelu studenća Berlinskeje Techniskeje Uniwersity. Wjednistwo uniwersity běše je kónc tydźenja po přepruwowanskim terminje techniskich njedostatkow dla njejapcy zawrěć dyrbjała. Hižo dawno běše po dešćach z wjercha twarjenja woda kapała. Jako „srjedźnu katastrofu“ wopisa situaciju Berlinska senatorka za wědomosć Ina Czyborra (SPD).
To a tamne (11.05.26)
48 pokradnjenych howjadow je bur z Raduša pjatk policiji přizjewił. Cyłkowna škoda wučinja něhdźe 75 000 eurow. Kriminalna policija pad padustwa dla přepytuje. Wona zdźěli, zo dotal žanych dopokazow za to njeje, zo bě skót z pastwy twochnył. Tole njeje lětsa prěni pad rubjenstwa howjadow z pastwy w Braniborskej. W aprylu běchu burej we wokrjesu Łobjo-Halštrow 70 skoćatow pokradnyli.
Dokelž swój njeskutk rubjenstwa jako livestream na platformje TikTok wozjewištaj, poradźi so policiji w Stuttgarće, porik paduchow spěšnje zajeć. Wjacori swědkojo běchu zastojnikow pjatk wječor telefonisce na to skedźbnili, zo wobkedźbuja skućićelow online při rubjenju e-bika. Policija spěšnje zapřimny, tak zo muži w starobje 23 a 36 lět bórze po tym zaja.
To a tamne (08.05.26)
Swój bydlenski dom smě spěwarka Melanie Müller nadal wobsedźeć. Wčera chcychu domske na nanućenym přesadźowanju předać. Za něhdyše dwórnišćo w měšćanskim dźělu Wahren pak njejsu ani jenički poskitk dóstali. Jednanje tuž nachwilnje zastaja, rozsudźi hamtske sudnistwo. Domske z 1 572 kwadratnych metrow wulkej ležownosću je něhdźe 800 000 eurow hódne.
Najwjetši hóčkowany mamut swěta su po wjacorych měsacach dźěła nětko w muzeju w Essenje zjawnosći předstajili. Mamut wobsteji z dohromady 1600 małych hóčkowanych kwadratow, za kotrež běchu 25 000 metrow wołmy předźěłali. Na projekće bě mnoho ludźi sobu skutkowało. Prehistoriski cycak je 2,66 metrow wysoki, 4,20 metrow dołhi a 1,37 metrow šěroki. Z tym je samo wjetši, hač bě planowane.
To a tamne (07.05.26)
Ćah hercow z Oberlichtenauwa zapiska bórze před kralowskim publikumom. Wot 13. meje přebywaja hudźbnicy w Norwegskej a hudźa tam zhromadnje z tamnišim kralowskim hercowskim ćahom. 17. meje, na narodnym swjatku Norwegskeje, zapiskaja na nadróžnej paradźe, kotruž sej tradicionalnje tež kral Harald V. wobhlada.
50 000 US-dolarow poskićujetej ameriski sćelak Fox a job-portal Indeed fanej, kiž je zwólniwy, sej wšě 104 hry lětušeho swětoweho mišterstwa kopańcy wobhladać. Dźěłać ma entuziast kopańcy na Times Square w New Yorku. Nimo toho, zo ma sej wšě hry wobhladać, słuša do nadawkow fana tež, wobsahi za socialne syće produkować. Wosebje wužadace je dźěło potom, hdyž so dwě hrě paralelnje wotměwatej, štož pak so hakle na kóncu mišterstwa stanje.
