Šefa drogoweje cwólby je policija w sewjerorynsko-westfalskim Ratingenje zajała. 34lětneho Němca su do přepytowanskeje jatby dowjezli. Muž je podhladny, zo je we wobłuku mjezynarodnje dźěłaceho kruha wikowarjow drogow znajmjeńša dwanaće tonow kokaina z Južneje Ameriki w hódnoće sto milionow eurow do Němskeje importował. W domje muža namakachu zastojnicy luksusowe twory za 800 000 eurow. Pola přiwuznych muža sćazachu imobilije w hódnoće znajmjeńša 15 milionow eurow.

Spěwarka Sarah Engels pojědźe za Němsku na Eurovision Song Contest do Wiena. 33lětna je so sobotu w Berlinje přećiwo wosmjom požadarjam přesadźiła. Ze swojim spěwom „Fire“, kiž ma wosebje žonam móc a žiwjensku radosć spožčić, je sej wona najwjace dypkow zdobyła. ­Finale w stolicy Awstriskeje je 16. meje.

Nakładne awto z ruku ćahnyć – a to cyłu hodźinu – chce Felix Zappe z Berlina. 35lětny, kiž je hižo ćahi a awta ćahał, zwaži so tak na nowy rekordny pospyt. Při tym chce wón čaru 750 metrow zmištrować. Přewjesć chcedźa rekordny pospyt jutře w centrumje wobchadneje wěstoty ADAC w braniborskim Linthe. Na ćahanje jězdźidłow bě so Zappe za čas koronapandemije specializował, „jako běchu wšě fitnesowe studija swěta zawrjene“.

Při lawinowych njezbožach je lětsa w Awstriskej dotal 26 ludźi žiwjenje přisadźiło. To je wo wjele wjace hač po wjelelětnym přerězku, awstriski kuratorij za wěstotu w Alpach zdźěla. Wosebje zlě bě mjez 15. a 24. februarom, jako 14 ludźi pod sněhom zahiny. Mjez woporami su štyrjo z Němskeje – pućowar a třo sněhakowarjo kotřiž, běchu zboka přihotowanych čarow po puću.

Nakupować, skazać zastupne lisćiki abo prosće so informować: Dale a bóle so internet we wšědnym žiwjenju ludźi přesadźa, mjez młodostnymi tak a tak. Na­jebać to je ludźi w Němskej, kotřiž njeběchu po swójskich informacijach hišće ženje w interneće. „Dobre tři procenty ludźi w starobje mjez 16 a 74 lětami běchu 2025 w Němskej tak mjenowani off-linerojo – woni njejsu hišće nihdy internet wužiwali, Zwjazkowy statistiski zarjad we Wiesbadenje zdźěla. Tole wotpowěduje nimale 2,1 milion ludźi.

Ćěło morjeneho drogoweho bosa „El Mencho“ žada sej toho swójba w Mexiku. Nemesio Oseguera Cervantes bě při třěleńcy z policiju žiwjenje přisadźił. 59lětny bě nawoda najmócnišeho drogoweho kartela w Mexiku. Prawiznik swójby je nětko oficialnje wo to prosył, swójbje ćěło přepodać. Próstwu nětko pruwuja.

Do chorownje zapokazali su norwegskeho krala Haralda V. na kupje Teneriffa. Tole zdźěla kralowski dwór w Oslu. Krala lěkuja tam natyknjenja a wusušenja dla. Wosobinski lěkar krala chce so po najspěšnišim puću na kanarisku kupu po­dać, zo by Haralda při wuhojenju podpěrował. Norwegski monarch bě před dnjemi swoje 89. narodniny woswjećił.

Dwanaćelětny namócny skućićel je so po brutalnym nadpadźe na 26lětneho w Berlinje-Neuköllnje pola policije přizjewił. Tole je rěčnik policije powěsćerni dpa zdźělił. Dwanaćelětny bě 26lětneho minjenu njedźelu w Berlinje po schodźe dwórnišća teptał. Muž so při tym zrani. Njepołnolětny je so předwčerawšim, wutoru, wječor na policajskej straži zastojnikam stajił. Třo dalši skućićeljo w starobje 15 a dwójce 14 lět su so po njeskutku tohorunja pola policije přizjewili.