To a tamne (26.06.26)
Dohromady 64 reptilijow je žona w Hongkongu w swojim bydlenju dźeržała. Mjez nimi bě krokodil, kotryž bydleše na balkonje žony. Zranjene zwěrjo so pod domjacej nadobu chowaše a da so hakle po wjacorych pospytach popadnyć. Plahowanje reptilijow je w Hongkongu zakazane a mnohe ze zwěrjatow w bydlenju žony přisłušeše wohroženej družinje. Tuž zastojnicy žonu zajachu.
Škleńcu z wjace hač 60 złotymi pjeršćenjemi su dźěći w Delnjej Frankskej našli. Za jich wobsedźerjemi nětko na zakładźe grawurow na pjeršćenjach pytaja, wšako pjatnaće z nich tajku ma. Policija zdźěli, zo bě swójba škleńcu kónc meje na wulěće do lěsa blisko Johannesberga našła. Dotal so zastojnikam hišće radźiło njeje, wobsedźerjow debjenkow namakać. Woni pak so dale wo to prócuja.
To a tamne (25.06.26)
Dokelž bě jeho pčołka kałnyła, njeje šofer nakładneho awta ćah na wuskich kolijach widźał a do njeho zrazy. Z teje přičiny železnica Döllnitzbahn w Oschatzu ze swojich kolijow skoči. Zranił drje so nichtó njeje, policija pak trochuje škodu na šěsćcyfrowu sumu. Wagony měješe druha železnica wot městna njezboža wotwlec.
Hladajo na horcotu, suchotu a niłku wodu w rěkach a rěčkach město Drježdźany swojim wobydlerjam nětko zakazuje, wodu z wodźiznow brać. Tole bě delni zarjad za wodźizny wčera, srjedu, postajił. Hač do kónca oktobra zakaz płaći. Ludźo njesmědźa z wjetšich a mjeńšich wodźiznow wodu ani klumpać ani z ruku čerpać. Dokelž drje spadki přichodny čas mało wody wosebje w rěkach narunać njebudu, bě měšćanski zarjad čerpanje zakazał.
To a tamne (24.06.26)
Něhdyše sydlišćo Mayjow su slědźerjo wosrjedź dešćoweho lěsa w Mexiku wotkryli. Slědźerski team pomjenowa je Minanbé, štož woznamjenja w rěči Mayjow „Druheho pućika njeje“. Něhdźe 15 hektarow wulki kompleks ruinow běchu w biosferowym rezerwaće Calakmul w zwjazkowym staće Campeche našli, zdźěli kulturny zawod INAH. Nastaće sydlišća datěruja na čas mjez 600 a 900 do Chrystusa.
Miliony pčołkow su w Texasu chaos zawinowali. Nakładne awto, kiž insekty transportowaše, bě so we wjesce Mauriceville spowróćiło. Na widejach w socialnych syćach su pčołki w hustych rojach w štomach a na zemi widźeć. Na nakładnym awće bě dohromady 400 ludow pčołkow nakładowanych. Zarjady na městnje běchu ludźi namołwjeli, swoje domy njewopušćić, doniž njeje wšo zrumowane.
To a tamne (23.06.26)
Poram, kiž chcedźa so 26. junija zmandźelić, móža stawnistwa w Němskej lědma hišće termin poskićić. Na mnohich městnach su tute mjenujcy hižo wuknihowane. 26.06.2026 drje je za mnohich perfektny datum, sej wěčnu swěru slubić. W Berlinje, Frankfurće a Mnichowje běchu terminy za tónle datum hižo před měsacami rozebrane. Tež 06.06.2026 je so nadměru wjele porow stawnisce zmandźeliło.
Ludźom, kotřiž dosć derje němsce njemóža, zo bychu kupanske prawidła zrozumili, zakazuje wobsedźer kupjele w Saksko-Anhaltskej přistup. Zašły tydźeń dyrbjachu małe dźěćo z hłubokeje wody wuchować, dokelž wone a jeho staršej prawidła pječa zrozumili njeběchu. Nowa regula w Halle pak so wšěm njelubi. Někotři sej nětko žadaja, zo měł wobsedźer prawidła prosće tež jendźelsce wozjewić.
To a tamne (22.06.26)
30 šlinkow je jedna žona druhej w Zhorjelcu zwady dla do wysokich hrjadkow połožiła. Škódniki, kotrež lubowarjo pyšnych zahrodkow a plahowarjo čerstweje zeleniny scyła wučuć njemóža, su w hrjadkach kwětki a zeleninu nakusali a naparachu tak škodu 20 eurow. Policija dyrbi so nětko z padom zaběrać, dokelž je poškodźena njekmanicu wěcneho wobškodźenja dla wobskoržiła.
Najkrótši dźeń lěta woswjeća ludźo w awstralskim Hobarće na cyle wosebite wašnje: nazy. Na wšěch 3 000 ludźi je so tež lětsa zaso na tak mjenowanym Dark-Mofo-Solistice-Swim wobdźěliło. Při wonkownej temperaturje wokoło štyrjoch stopjenjow a dwanaće stopjenjow we wodźe dyrbjachu wobdźělnicy při skoku do rěki Derwent chětro zmužići być. Najstarša mjez nimi drje bě 96lětna, kotraž hižo wjele lět sobu płuwa.
To a tamne (19.06.26)
Při dźeń a wyšich temperaturach drje tuchwilu najmjenje ludźi na hody mysli. Město Weißenfels w Saksko-Anhaltskej pak pyta nětko hižo štom za lětuše hodowne wiki. Sobudźěłaćerjo zarjada za kulturu planuja mjenujcy hižo wjeršk dohodowneho časa. Štom ma znajmjeńša dwanaće metrow wysoki a rjenje zrosćeny być. Štóž tajki poskićuje, móže so hač do 15. awgusta pola města přizjewić.
Elfriede Jelinek, awstriska lawreatka Nobeloweho myta za literaturu, wěnuje so w swojej nowej knize „Unter Tieren“ kapitalizmej a jeho sćěham. Pod masku zwěrjatow wumjetuje wona čłowjekej najšpatniše wěcy, kiž jenož profita dla do skutka staja. Tež wobswětowa kriza a podobne k tomu słuša. 20. oktobra woswjeći Jelinek swoje 80. narodniny, tuž je kniha wjeršk jeje jubilejneho lěta.
To a tamne (18.06.26)
Swoju wustawu je Swobodny stat Sakska nětko w lochkej rěči wozjewił. Sakska je štwórty zwjazkowy kraj Němskeje, w kotrymž maja ludźo z handicapom móžnosć, lóšo zrozumliwe wudaće krajneje wustawy čitać. Prezident krajneho sejma Alexander Dierks (CDU) zwurazni składnostnje zawčerawšeho wozjewjenja, zo je to wažny krok bjezbarjernosće, z kotrymž dźeń a wjace čłonow towaršnosće do demokratiskeho cyłka zapřijamy.
Štóž chce so raz w pokalu swětoweho mišterstwa kopańcy zabłudźić, ma na polu ratarja Adriana Schlenkera w Buggingenje blisko francoskeje mjezy składnosć za to: Na něhdźe połdra hektara wulkej płoninje kukuricy je wón wulki labyrint wusykł, kiž z ptačeje perspektiwy kaž mišterski pokal FIFA wupada. Zo móhł swoju ideju zwoprawdźić, je ratar dohromady 120 000 rostlinow kukuricy zwosadźał.
To a tamne (17.06.26)
To a tamne (16.06.26)
Hape Kerkeling, znaty němski komikar a awtor, je w online-peticiji, w kotrejž jeho jako zwjazkoweho prezidenta namjetuja, dotal 100 000 wot 200 000 trěbnych hłosow docpěł. Na prašenje, hač sej přicpěwa, najwyše statne zastojnstwo w Němskej woprawdźe wukonjeć, wón praji: „Hdyž sej ludźi bliže wobhladam, kotřiž tuchwilu we wodźacych funkcijach na swěće skutkuja, zwažu sej haj prajić!“
Somaliskemu sudnikej Omarej Artanej, kotremuž njeběchu USA zajězd do kraja dowolili, zapłaći FIFA połnu mzdu, tež hdyž so na swětowym mišterstwje w kopańcy njewobdźěli. Kelko sudnicy dokładnje zasłuža, zhonja hakle na kóncu turněra, zdźěli koparski zwjazk. FIFA je Omara Artana nimo toho jako sudnika supercup-finala mjez mustwomaj Paris Saint-Germain a Aston Villa dnja 12. awgusta in Salzburgu powołała.
To a tamne (15.06.26)
Swětowy koparski zwjazk FIFA poskićuje w času swětoweho mišterstwa fanam w stadionje, zo móža swoje mjeno abo mały postrow na stadionowej wobrazowce w běhu hry pokazać dać. Poskitk wězo darmotny njeje: Za tak mjenowany „super shoutout“ žada sej FIFA nimale 70 eurow. Politiske, komercielne abo diskriminowace wobsahi pak koparski zwjazk při tym njeakceptuje.
Dohromady 400 wobydlerjow bydlenskeho bloka w Amsterdamje dyrbješe policija minjeny pjatk w nocy ewakuować, po tym zo bě jón mócna eksplozija strašnje wobškodźiła. Sedmjoch z nich zranjenjow dla w chorowni lěkuja, smjertnych woporow na zbožo njeje. Po dotalnych dopóznaćach policije je kriminelna skupina w pódlanskim twarje bloka rozbuchlinu produkowała, při čimž bě k njezbožu dóšło.
