To a tamne (22.08.25)
Młoda žona je z jastwa w Kamjenicy ćeknyła. Policija rěči wo małolětnej, kotraž měješe swoju pokutu wulišćenja posłužbow dla wotsedźeć. Hižo srjedu bě so wona z jastwa wotsaliła. Dotal přeco hišće bjez wuspěcha za młodostnej pytaja. Wona njebě w regularnym jastwje sedźała, ale we wosebitym zarjadnišću za małolětne skućićelki.
Plyšowy psyk, kotrehož běchu hosćo w hotelu w awstralskim měsće Perth zabyli, ludźi w socialnych syćach zahorja. Wjacore tydźenje hižo spyta hotel w zapadnym dźělu kraja swójbu psa z mjenom Jack namakać, kotrehož běchu wosrjedź junija w płokarni našli. Wot toho časa jeho team hotela na socialnych syćach přewodźuje. Wot najnowšeho je pos samo dźěl hoteloweho teama. „Wón je zacheckował, ale ženje wucheckował“, piše hotel na Instagramje.
To a tamne (21.08.25)
Dokelž lodowc blisko města Hallstatt w Awstriskej spěšnje taje, su nětko, po 50 lětach, prěni raz zaso drjewjane powostanki lifta widźeć. Tutón běchu w 1970tych lětach natwarili, jako ludźo w lěću hišće na lodowcu sněhakowachu. Něšto lět po tym zo běchu lift natwarili, bě so wón zasněžił a w lodowcu hory Dachstein zhubił. Změny klimy dla lodowcy dźeń a spěšnišo taja a tuž su tež historiske powostanki zaso widźeć.
W Berlinje dyrbja ludźo, kiž swoje wotpadki w měsće ležo wostawaja, w přichodźe jasnje wjace pokuty płaćić. Za zbytki cigaretow budźe to nětko 250 město 55 eurow, za ilegalnje na chódnikach abo w lěsu wotstajene spěrawe wotpadki samo 1 500 do 11 000 eurow, wotwisujo wot mnóstwa wotpadkow. Z wysokimi pokutami chce město zanjerodźenju zjawnych městnow zadźěwać.
To a tamne (20.08.25)
Spěšne wubědźowanske awto je na čěskej awtodróze ludźi wulce zadźiwało. Jězdźidło njebě ani za nadróžny wobchad zawěsćene, ani za wužiwanje dowolene, zdźěli čěska policija. Wideja wulěta z awtom tuchwilu w socialnych syćach kursěruja. Wuhladali běchu čerwjene awto na awtodróze D4 blisko města Příbram, něhdźe 50 kilometrow juhozapadnje Prahi. Samo při tankowni bě awto pozastało, rozprawja nowina „MF dnes“.
W Crimmitschau je muž z kolesom, kotrež je na moped přetwarił, padnył a so při tym njemało zranił. Po njezbožu su muža do chorownje dowjezli. Tam tež přepruwowachu, hač je drogi konsumował. A zwěsćichu w jeho kreji amfetaminy kaž tež konop. Za motorizowane jězdźidło njeměješe muž ani zawěsćenje, ani oficialne přizjewjenje. Wón so nětko z wjacorymi wobskorženjemi bědźi.
To a tamne (19.08.25)
Njeplanowany je regionalny ćah po puću ze Schwerina do Berlina njedźelu nawječor w městačku Neustrelitz pozastał. Přičina běchu defektne nuzniki w ćahu. Kaž wopodstatni Wuchodoněmska železnica, běchu so pasažěrojo w ćahu přiběrajcy hóršili. Tak bě personal w ćahu nućeny pozastać. Po krótkej přestawce poda so ćah dale do Berlina. Wo nuznej přestawce bě sćelak NDR jako prěni rozprawjał.
Na lětanišću we Wienje je policija dohromady 25 000 tabletow namakała, kotrež słuža powyšenju potency muži. Medikamenty je psyk policije w dwěmaj sportowymaj tošomaj wučuchał. Žona, kotrejž toši słušeštej, ma so nětko před sudnistwom wusprawnić. Jej wumjetuja, zo je wona tablety ilegalnje do kraja dowjesć chcyła. Ju móhli z wysokej pjenježnej pokutu pochłostać.
To a tamne (18.08.25)
Njewšědneho nócneho hawrona su policisća w nocy wot soboty na njedźelu w Biskopicach popadnyli a nachwilnje w swojej staciji hospodowali. Nosaty bar bě sej do zahrody wulećał, hdźež jeho nazajtra młodostni wuhladachu, informuje Zhorjelska policajska direkcija. Naposledk so wukopa, zo bě zwěrjo ze zwěrjenca města twochnyło, kotrehož woponowe zwěrjo je. Njedźelu nosateho bara wróćo do jeho wobhrodźenja dowjezechu.
W lifće chorownje ducy na porodowu staciju je žona ze swojim partnerom w měsće Herdecke tčacy wostała. Na to hnydom wohnjowych wobornikow alarměrowachu, kotřiž por z pomocu generalneho kluča z lifta wuswobodźichu. Žona móžeše swoje dźěćo bjez dalšich komplikacijow porodźić. Šok pak bě přiwšěm wulki dosć.
To a tamne (15.08.25)
Mortwy hołb je w Berlinje-Hellersdorfje wulke zasadźenje policije zawinił. Swědcy su policiju wołali, dokelž běchu wutřěle słyšeli, na čož je mortwy hołb do jich dwora padnył. Bórze so tam wjele zastojnikow nawali a z dowolnosću sudnika so do bydlenja pozdatneho třělca zadobychu. Tam drje municiju za powětrowku namakachu, ale ani brónje abo čłowjeka. Pozdźišo pak wobydler tutoho bydlenja na policajsku staciju přińdźe, zo by sej swój kluč wotewzał. Twjerdźeše, zo je hołbja z katapultom wottřělił. Policija naležnosć nětko přepytuje.
Za tři měsacy so w Němskej sezona hodownych wikow zahaji. Město Drježdźany so hižo za jědlu abo šmrěkom rozhladuje, kiž móhli na wiki stajić. Štom měł něhdźe 23 metrow wysoki a runje zrosćeny być.
To a tamne (14.08.25)
Žona je blisko Lüneburga trut nad baćonjace hnězdo wodźiła, tak zo su ptački hnězdo wopušćili. Policija pad nětko přepytuje – podhlada přeńdźenja přećiwo zwjazkowemu zakonjej za škit přirody dla. Baćony bě trut najskerje hižo něhdy kónc meje abo spočatk junija zahnał. Pječa běchu wobydlerjo žonu tehdy namołwjeli, zo njech přestanje baćony mylić. Trut pak je do hnězda zalećał a tam ležo wostał. Hakle spočatk tohole tydźenja je zamołwity za přirodoškit trut z hnězda wućahnył.
Ćeknjeny kóń je wčera regionalnu železnicu pola Marburga nuzował zastać. Wodźer ćaha nadobo šumjela wuhlada, kotryž podłu kolijow běžeše. Jako so zwěrjo direktnje na kolije měrješe, wón zasta, zo móžeše kóń kolije přeprěčić. Policija je skónčnje přijěła, konja popadnyła a wobsedźerja wuslědźiła.
To a tamne (13.08.25)
Jelizo policija při wobdźěłanju přeńdźenjow problemy ma, potom poskića zastojnicy kóždemu, kotryž pomhać móže, nahladny fenk. Wšako móhł kóždy pokiw pad rozrisać. Za to potom tež zjawnje wabja. Tola tajke postupowanja su w Sakskej rědke. W lěće 2022 je swobodny stat posledni raz pjenjezy za to wudał. Najwyšu sumu minjenych lět we wobjimje 500 000 eurow su zastojnicy kónc lěta 2019 k dispoziciji stajili, jako běchu so juwele ze Zeleneho wjelba zhubili. Tola dóstał ju nichtó njeje.
Zwěrjatownja w Berlinje je w tuchwilnych lětnich prózdninach hižo 147 wusadźenych zwěrjatow přiwzała. Mjez nimi su 79 kóčkow a 26 psow – to je nadpřerěznje wjele. Zdźěla su ludźo tež nopawy w plastowych boksach bjez dźěrkow za powětr něhdźe wotstajili.
To a tamne (12.08.25)
To a tamne (11.08.25)
Syčomłóćawa je so zawčerawšim přez kerčiznu na party w zahrodźe dóstała. Dźesać tonow ćežku mašinu běchu dźěłaćerjo w Badensko-Württembergskej wjacore sta metrow wot zahrody zdalene na polu wotstajili. Kaž policija zdźěli, je so kolos potom bjez wodźerja pohibował a do zahrody zajěł. Na zbožo njeje so nichtó na party w Bad Überkingenje zranił. Tež dom njeje wobškodźeny. Syčomłóćawa bě so w kerčinje zašmjatała a w zahrodźe stejo wostała.
Konopej je minjeny pjatk njeznaty šofer na zwjazkowej dróze we wokrjesu Bad Kreuznach w Porynsko-Pfalcowskej zhubił. Šoferka njemóžeše konopejej wuwinyć a do njeho zrazy. Zraniła so wona při tym njeje. Jeje awto je so sylnje wobškodźiło, policija zdźěli a so swědkow nadźija.
