To a tamne (30.12.25)
Němski statny minister za kulturu Wolfram Weimer chce so za fairniše popłatki na hudźbnikow ze stron streamingowych platformow kaž Spotify zasadźować. Tohodla je za spočatk 2026 wuměłcow kaž tež zastupjerjow platformow a hudźbnych nakładnistwow na jednanja do kanclerskeho zarjada přeprosył. Weimer chce posrědkować, „je-li trjeba, pak dyrbjał zakonjedawar zapřimnyć“, wón doda.
Ze zakazanym hoberskim wohnjostrojom ze 107 wutřělemi su zastojnicy zwjazkoweje policije z Pólskeje přichadźaceho 56lětneho kónc tydźenja lepili, jako jeho na wotpočnišću při awtodróze blisko Zhorjelca zadźeržachu. Krótko pozdźišo lepichu w bliskosći dalšeho muža ze zakazanej pyrotechniku. Wón měješe wohnjostroj z něhdźe kilogramom eksploziwneje substancy w swojim awće.
To a tamne (29.12.25)
Hobersku hromadu twjerdeho tuka, wolija a druhich wotpadkow su w Londonskej kanalizaciji namakali – zaso raz. Smjerdźata hora waži něhdźe sto tonow a je sto metrow dołha. Zastaraćel města z wodu Thames Water ludźi w tym zwisku napomina, horcy wolij a tučnu kuchinsku papjeru do kanalizacije njemjetać. Jendźelčenjo stajnje zaso horcy wolij po fritěrowanju do nuznika kidnu. W kanalizaciji tuk stwjerdnje a so nahromadźi.
Pozdatny tiger je na awtodróze njedaloko Ludwigshafena zasadźenje policije zawinował. Šoferka wosoboweho awta bě rubježne zwěrjo wuhladała a zastojnikow informowała. Policisća zwěsćichu, zo jedna so wo plyšowe zwěrjo, kotrež bě zhromadnje z dalšimi płatowymi klankami na dróhu padnyło. Prawdźepodobnje njeběchu na awće prawje přiwjazane. Plyšatka su nětko na policajskej straži.
To a tamne (23.12.25)
Zražka z kozu w zwěrjencu zaběraše dźensa sudnistwo w Stralsundźe. Chorobna kasa 63lětneje žony je Ptači park Marlow w Předpomorskej wobskoržiła a žadaše sej 31 000 eurow wotškódnjenja za nastate wudawki za lěkowanje žony. Wona je w zwěrjencu za majkanje padnyła, jako bě koza do njeje bodła. Koleno žony dyrbjachu operować. Chorobna kasa parkej wumjetuje, zo dźerži agresiwne zwěrjata. Tón tole wotpokazuje.
Pozdatny sobudźěłaćer firmy Microsoft je 70lětneho muža w sewjerorynsko-westfalskim Lindlaru wo wjacore tysac eurow wobšudźił. Na wobrazowce jeho kompjutera jewješe so pokiw, zo měł hnydom zazwonić, dokelž so něchtó na jeho konto měri. Sobudźěłaćerjej Microsoft muž swoje kontowe čisło a klučowe hesło zdźěli. Pozdźišo wón zwěsći, zo je so njeznaty na konće posłužował.
To a tamne (22.12.25)
Hodowne štomy su paducham tele dny požadane objekty. W braniborskim Eberswalde su w nocy na sobotu 15 štomow spakosćili, kotrež stejachu zamknjene před twarskimi wikami. W Frankfurće nad Wódru wzachu njeznaći štomy w hódnoće 3 000 eurow sobu a w Oranienburgu něhdźe 40 štomow za cyłkownje 2 000 eurow, policija zdźěla.
Dawk na cokor žada sej ministerski prezident Schleswigsko-Holsteinskeje Daniel Günther. Tole móhło strowšemu zežiwjenju polěkować a přećiwo nadwaze pomhać, je sej politikar CDU wěsty. „Prěni kwartal noweho lěta nastorču iniciatiwu w Zwjazkowej radźe“, rjekny Günther nowinje Welt. „Dawk na cokor je politisce a hospodarsce dawno trěbny, dokelž zawinuje wysoki konsum cokora wulke strowotniske problemy a z tym hoberske wudawki towaršnosće.“
To a tamne (19.12.25)
Na wšěch 29 kilogramow cannabisa měješe žona z USA w swojim wačoku, jaku ju cłownicy na Berlinskim lětanišću BER kontrolowachu. 33lětna bě z New Yorka přilećała. Při kontroli zastojnikam napadny, zo njeběchu w jeje kófrach žane drasty, ale lute čorne plastowe titki. W nich bě maćizna, kotruž pozitiwnje na srědk THC testowachu. Žona twjerdźeše, zo njewě, što w titkach je. Cłownicy ju nachwilnje zajachu.
Nikotin je jěd za wutrobu a žiłki, njewotwisnje wot toho, hač jón přez cigarety, shisha abo e-cigarety kuriš. Tole wozjewja zwjazk europskich kardiologow w najnowšej rozprawje. Wšitke mjenowane formy wužiwanja nikotina škoduja žiłki a zawinuja wyši ćišć kreje a wyši riziko schorjenja wutroby. Lěkarjo su zwěsćili, zo nikotin čłowjekej tež bjez druhich škódnych maćiznow kaž smoły škodźi.
To a tamne (18.12.25)
We wjeršku štoma je muž ze swojim płujadłom wisajo wostał. Njezbožo je pilot w zapadnych westfalskich horach nimale njezranjeny přežiwił. Wón wosta něhdźe 20 metrow wysoko tčacy, wohnjowa wobora Porta Westfalica rozprawja. Prawdźepodobnje bě so powjaz torhnył, z kotrymž muž płujadło wodźeše. Pućowarjo běchu njezbožo blisko Wittkindsburga wobkedźbowali a pomocnikow wołali.
Smě přenajer bydlenja žonu jeje pakistanskeho mjena dla wotpokazać? Z tutym prašenjom je so dźensa zwjazkowe sudnistwo w Karlsruhe zaběrało. Žona žada sej wot wikowarja imobilijow zarunanje, dokelž je ju jeje pochada dla diskriminował. Wospjet bě wikowar wobhladanje bydlenja wotprajił. Jako so wona ze „Schneider“, „Schmidt“ abo „Spieß“ přizjewi, bě termin naraz móžny.
To a tamne (17.12.25)
Bijeńca na kwasu je w Sauerlandskej minjeny kónc tydźenja zasadźenje policije zawinowała. Nastała bě zwada při „mjetanju šlipsow“, podobnje mjetanju kwěćela njewjesty. Ze šlipsom mužojo přichodneho nawoženju zwěsća. Dokelž bě spočatnje rěč wo 30 bičkach, přijědźe policija z wjacorymi awtami. To pak běchu so hosćo hižo zaso změrowali. Njewjesta poćerpje šok a dyrbješe do chorownje.
W runje pokradnjenym awće sej wusnył je paduch w Bad Oeynhausenje w Sewjerorynsko-Westfalskej. 33lětny bě parkowacy Volkswagen Lupo spakosćił. Po tym zo bě wobsedźer awta tole policiji přizjewił, zastojnicy w swojich awtach za nim hladachu. Njewočakowano jim Lupo na dworje napadny. W nim 39lětny spaše. Při kontroli awta namakachu policisća tež drogi. Paducha – wobydlerja města – wzachu sobu na stražu.
To a tamne (16.12.25)
Swoboda měnjenja je so minjene lěta po rozprawje kulturneje organizacije UNESCO po wšěm swěće widźomnje pomjeńšiła. Wotpowědny indeks (Freedom of Expression Index) je mjez 2012 a 2024 wo dźesać procentow woteběrał. Tajki razny spad su dotal jenož w njezwučenych časach wobkedźbowali, w Prěnjej a do Druheje swětoweje wójny abo w času zymneje wójny. Wosebje raznje je so situacija po 2020 pohubjeńšiła.
Lisćina wobdźělnikow ESC, hudźbneho wubědźowanja Eurovision Song Contest 2026 we Wienje je zestajana. Cyłkownje 35 sćelakow z runje telko krajow so wobdźěli, Europska rozhłosowa unija zdźěla. Tež Israel budźe pódla. Israela dla je pjeć krajow wotprajiło. Rumunska, Bołharska a Moldawiska so po wjacorych lětach zaso wobdźěla. Finale budźe klětu 16. meje. Lětsa bě 37 krajow w Baselu wo hłosy wojowało.
To a tamne (15.12.25)
Po njelepym parkowanskim pospyće na parkowanišću haloweje kupjele w južnej Francoskej je žona ze swojim awtom do wulkeho basenka kupjele zajěła. Z awtom přerazy najprjedy płót a potom škleńčanu fasadu kupjele a so we wodźe podnuri. Kupanski mišter a jeho sobudźěłaćerjo 38lětnu žonu a jeje pjeć lět stare dźěćo hnydom z awta wućahnychu. Nichtó so njezrani. „To bě kaž w filmje. Na tajki scenarij njejsmy poprawom přihotowani“, kupanski mišter rjekny. Kupjel wostanje přichodne tydźenje zawrjena.
Strach wulkeho zemjerženja w turkowskej metropoli Istanbulu lěto wob lěto rosće, dokelž geologiske napjatosće pod městom spochi přiběraja. Tole je wuslědk přepytowanja pod nawodom Podstupimskeho Helmholtzoweho centruma za geologiske slědźenje. Posudk bu mjeztym w fachowym časopisu Science wozjewjeny.
To a tamne (12.12.25)
Pozdatny krokodil w lěsnym haćiku njedaloko hornjobayerskeho Pfaffenhofena je zasadźenje policije zawinował. Pućowarka bě hłowu krokodila we wodźe wuhladała, twjerdźo, zo zwěrjo po haćiku płuwa. Policija wuhlada předmjet, kiž wupadaše kaž stary zdónk na wodźe. Zastojnicy jón wućahnychu a zwěsćichu, zo jedna so wo atrapu krokodiloweje hłowy. Policija wza namakanku sobu, zo njeby dalši njeměr zbudźiła.
Demonstraciju přećiwo policiji planuja lěwicarske skupiny wokoło Lipšćanskeje zapósłanče krajneho sejma Juliane Nagel (Lěwica) w Scharzenbergu, a to jutře, dźeń do woblubowaneje parady hórnikow. Policija chce pochod ze stami zastojnikow přewodźeć. Demonstraciju zahaja w 13.12 hodź. – 1312 je pismikowy kode za hesło „All Cops are Bastards“. Namócnosće njewočakuja.
