To a tamne (12.02.26)
Dalšu kročel do směra na měsačk je China z wuspěšnym testom noweje rakety zmištrowała. Kaž zamołwići zdźěla, su na swětnišćowym dwórnišću Wenchang na južnej chinskej kupje Hainan nowu nošacu raketu „Dołhi marš 10“ wuspěšnje wupruwowali. China so na to hotuje, w lěće 2030 z tutej raketu kosmonawtow na měsačk słać. Swójsku staciju w swětnišću China wot lěta 2022 hižo ma.
Film „Das Kanu des Manitu“ je loni pjeć milionow ludźi widźało. Scyła su ludźo w Němskej 2025 zaso husćišo w kinje byli. Cyłkownje 91,9 milionow zastupnych lisćikow su loni předali, zarjad za spěchowanje filma w Berlinje zdźěli. To je 2,1 procent wjace hač 2024. Tehdy běchu ludźo po informacijach zamołwitych 90,1 milion lisćikow kupili. Wobrot je wo šěsć procentow na 924 milionow eurow rozrostł (2024: 868,4 miliony eurow).
To a tamne (11.02.26)
Ralf Schumacher, bywši pilot Formule 1, a jeho partner Étienne chcetaj so zmandźelić. Tole wonaj w interneće wozjewitaj a so zdobom za wutrobne zbožopřeća dźakujetaj. Nadrobniše informacije dotal wozjewić nochcetaj. Ralf Schumacher, bratr sydomkróćneho swětoweho mištra Michaela Schumachera, bě so w juliju 2024 k swojej homoseksualnosći wuznał a swojeho partnera zjawnje předstajił.
Bjez woza přećiwo Putinej poćahnu póstnicarjo lětsa róžowu póndźelu po Kölnje. „To njeje žadyn zmylk“, rjekny nawoda ćaha Marc Michelske powěsćerni dpa. W Kölnje su so lětsa rozsudźili, tutu temu twarcej wozow Jacquesej Tillyjej přewostajić. Strach před represalijemi Ruskeje njebě žana přičina, kaž twjerdźa. Přećiwo Tillyjej je ruska justica toho šćipateje satiry dla chłostanske jednanje zahajiła.
To a tamne (10.02.26)
Paduch je so w cuzym bydlenju na Rujanach kupał. Do toho bě sej muž w kuchni něšto k jědźi zwarił. Susodce swěca w domje we wsy Lohme napadny. Přiwołana policija widźeše, zo muž w kupjeli we wani sedźi. Jako tón zastojnikow wuhlada, spytaše wón ćeknyć. W domje policisća naheho muža nańdźechu. 25lětny paduch wustupowaše agresiwnje a so wobaraše. Tuž jeho nachwilnje zajachu.
Zakaz wužiwanja socialnych syćow za dźěći a młodostnych, wo kotrymž we wjacorych krajach diskutuja, SPD a Lěwica w Němskeje wotpokazujetej. SPD sej město toho žada, socialnym platformam wjace sobuzamołwitosće napołožić. Tež předsydka frakcije Lěwicy Heidi Reichinnek planowany zakaz za młodostnych pod 16 lětami kritizuje. CDU chce kónc februara wo wótrišich prawidłach na šulach rozsudźić.
To a tamne (09.02.26)
Nowe prawidła přećiwo masowemu turizmej płaća wot přichodneje sezony za wopytowarjow woblubowaneje italskeje kupy Capri. Potom pušća jenož hišće organizowane skupiny turistow z maksimalnje 40 wosobami na kupu. To je rada kupy wobzamknyła. Wukazali tež su, zo njesmědźa wodźerjo turistow hižo žane wótřerěčaki wužiwać. Na małej kupje južnje Neapela bydli 13 000 ludźi. W lěću dojědźe sej tam wšědnje 50 000 turistow.
Wužiwanje socialnych medijow zakazać chcedźa nětko tež młodostnym pod 15 lětami w Čěskej. „Sym za to“, rjekny ministerski prezident Andrej Babiš w interneće. Fachowcy su jemu rjekli, zo su socialne medije za dźěći surowje strašne. 71lětny Babiš chcył tuž dźěći škitać. Tež druhe kraje wo tym rozmysluja, tak Babiš.
To a tamne (06.02.26)
Jenož bachtać chcyła je 70lětna žona w bayerskim Kumhausenje, jako nuzowe čisło policije „110“ zazwoni – na wšěch 300 króć wot lońšeje meje. Staruška móžeše sej wěsta być, zo tam stajnje něchtó je, z kotrymž móže wo problemach swěta rěčeć. Nětko pak mějachu zastojnicy toho dosć a žonu wopytachu. Policisća jej doraznje rozłožichu, čemu nuzowe čisło słuži a kak móhli znjewužiwanje chłostać. Hač je tole pomhało, so nětko pokaza.
Žołma gripy tele dny čakarnje chorobnych praksow pjelni. Po informacijach Roberta Kochoweho instituta su ludźo wšěch starobnych skupin potrjecheni. Rozprawa poćahuje so na dobu mjez 26. januarom a 1. februarom. Dopokazali su w prěnim rjedźe wirusy influency A. Přiběrali pak njejsu jenož pady gripy. Tež natyknjenja z wirusom RS přiběraja, štož pokazuje so kaž nazymnjenje.
To a tamne (05.02.26)
Na měsačk a zaso wróćo – a hišće dwójce wokoło zemje – tak dołhe běchu rynki čakacych awtow na awtodróhach Němskeje 2025, cyłkownje 866 000 kilometrow, 7 000 kilometrow dlěje hač lěto do toho. Tole je awtomobilowy klub ADAC wuličił. Tohorunja wobkedźbowali su, zo su so haćenja pomałšo rozpušćili. Najhórje bě w Sewjerorynsko-Westfalskej. Tam je ADAC 35 procentow wšěch haćenjow na dróhach wobkedźbował.
Kruta zyma a zamjerznjene morjo zawinuje dale a wjace problemow, docpěć někotre sewjerofriziske kupy. Dokelž woda tež w přistawach poněčim zamjerznje, njemóža wotnětka přewozne łódźe mjez kupu Spiekeroog a Neuharlingersiel wjace jězdźić. Wobchad přewoznych łódźow na kupu Wangerooge su hižo minjeny pjatk skónčili. Tež kupu Hiddensee w Baltiskim morju tuchwilu njedocpěja.
To a tamne (04.02.26)
W procesu wumocowanja dla dźensa wočakowachu, zo so najstarši syn norwegskeje krónprincesny Mette Marit wosobinsce k wumjetowanjam wupraji. Při zahajenju procesa bě Marius Borg Høiby wčera jenož skrótka stejišćo zabrał a wumocowanje prěł. Porno tomu je 29lětny Høiby namóc w domjacnosći, wobškodźenja, wobchadne přeńdźenja a znjewužiwanje drogow přiznał.
Po přikładźe Awstralskeje chcedźa tež w Španiskej dźěćom a młodostnym pod 16 lětami zakazać, socialne medije wužiwać. Tole je ministerski prezident Pedro Sanchez připowědźił. Španiska chcyła nětko to přesadźić, štož je wospjet připowědźiła, Sanchez na wjeršku knježerstwow swěta w Dubaiju přilubi. Wón přirunowaše socialne medije „ze zwrěšćenym statom, kiž so do zakonjow wohlada a złóstnistwam přihladuje“.
To a tamne (03.02.26)
Před sudnistwom zamołwić dyrbi so wot dźensnišeho najstarši syn norwegskeje krónprincesny Mette-Marit. Marius Borg Høiby je po přeswědčenju statneho rěčnistwa wjacore žony wumocował a splažnje znjewužiwał. Někotre z nich je wón znjewužiwał, jako spachu a je njeskutki filmował. Cyłkownje 38 dypkow skóržby wopřijeja tež domjacu namóc, wobškodźenja a drogowe a wobchadne delikty. Wobskorženeho su sobotu zajeli.
Šěsć dalšich tydźenjow zymy w USA je sławny bobak (Murmeltier) Phil ludźom wěsćił. W městačku Punxsutawney w zwjazkowym staće Pennsylvania su so jeho na swjedźenju Swěčka Marije – połojcy zymskeho počasa – z oraklom prašeli, hač so zyma bórze pominje abo nic. Prašenje bě, hač widźi Phil swój sćin. Bohužel bě wuslědk na njedobro wšěch, kotřiž so bórzomneho kónca zymy nadźijeja.
To a tamne (02.02.26)
Premjeru opery wuchował je basowy bariton, kiž připadnje jako wopytowar w dźiwadle w Kamjenicy sedźeše. Do toho bě so spěwar Johann Kalvelage po prěnim akće Mozartoweje opery „Don Giovanni“ zwjezł. Jeho rólu jako Leporello přewza spěwar Markus Marquardt. Tón skutkuje na Drježdźanskej statnej operje a je z dźiwadłom w Kamjenicy wusko zwjazany. Kalvelage je mjeztym na puću polěpšenja. Jeho móžachu z chorownje pušćić. Kak chcedźa so Marquardtej za jeho pomoc dźakować, hišće njewědźa.
Triumfowe wrota w Washingtonje prezident USA Donald Trump dale planuje a ma mjeztym konkretne předstawy. Wupadać maja wrota podobnje kaž Arc de Triomphe w Parisu – jenož wo wjele wjetše. „Smy najwjetši a najmócniši narod“, rjekny Trump nowinarjam. Wosebity komitej ma namjety zdźěłać.
To a tamne (30.01.26)
Na konju sedźo Marcus Zotan w delnjosakskej wsy Wiedenrode při tuchwilnym zymskim wjedrje rano zahe nowiny roznošuje. Ze swojim 23lětnym walachom Zotanom je muž w sněze lěpje po puću hač pěši abo z kolesom, wón twjerdźi. Zo njeby w rańšich hodźinach k zražkam z awtami dóšło, nosy tež Zotan runje tak kaž jěchar, warnowanski lac. Nimo toho ma kóń reflektory při nohach a při wopuši. Jako myto čaka na konja wosebita snědań w konjencu.
Bjez jězbneje dowolnosće, z kradnjenymaj čisłowymaj taflomaj a pjaneho je policija muža w pfalcskim Landauwje lepiła. Muž spočatnje twjerdźeše, zo je jězbnu dowolnosć zhubił. Spěšnje pak so wukopa, zo je sudnistwo dokument sćazało. Čisła słušachu druhemu awtu. Smjerd alkohola dla bě chětro sylny: Test wunjese na wšěch 1,9 promilow.
