To a tamne (11.10.24)
Kuriozny pad w zwisku z ilegalnej migraciju w Letiskej zjawnosć kraja a medije zaběra. Po hodźiny trajacej honjeńcy je policija skupinu 46 ludźi zajała. Tući běchu mjezu ilegalnje překročili a ćěkachu před policiju w napodobnjenym policajskim awće. „Kak móže so stać“, prašeja so nowiny, „zo wudawamy hoberske sumy za płoty, zadźěwki a betonowe bloki. Samsny čas jědu migranća z jězdźidłom w barbach policije prosće po kraju“?
W Němskej dale a wjace awtow pokradnu. Po informacijach zwjazkoweho kriminalneho zarjada su loni 15 924 wosobowych awtow pokradnyli, dźewjeć procentow wjace hač w lěće 2022. Policija wobkedźbuje tež nowe postupowanje paduchow. Přiběrajcy zadobywaja so do bydlenjow, zo bychu kluče awtow pokradnyli a z nimi wotjěli. Zasadźuja tež škričkowe nastroje k wotamknjenju awtow.
To a tamne (10.10.24)
Wohnjowa wobora je seniorce w Stuttgarće z pomocu elektriskeje piły pomhała, ručne puta zaso wotbyć, za kotrež njemóžeše klučiki wjace namakać. Žona bě sej z wnučku hrajkała a ručne puta wužiwała. Jako spytaše puta zaso wočinić, so wone ćim krućišo začinichu. Z małej piłu, klěšćemi a hamorom so wobornikam skónčnje poradźi, puta wotstronić.
Wjace hač 3 500 zhubjenych wěcow je so za čas oktoberskeho swjedźenja lětsa w běrowje namakankow w Mnichowje nahromadźiło. Mjez nimi je na wšěch 16 kožanych cholowow. Tež wjacore pory žonjacych črijow zbudźa prašenje, kak drje su wobsedźerki domoj přišli. Wulka ličba wotedatych čapkow a předešćnikow pokazuje na lětuše dešćikojte wjedro w druhim tydźenju. Sta móšničkow, wupokazow, mobilnych telefonow a klučow wotpowěduja trendej minjenych lět.
To a tamne (09.10.24)
Swinjacu pječeń z balkona susodki pokradnył je młody porik w hornjobayerskim Mittenwaldźe. Wobydlerka bě wobkedźbowała, kak porik zapakowanu pječeń sobu wza a zazwoni na to policiju. Zastojnicy paduchow lepichu, jako pječeń w kuchni přihotowaštaj. Zbytk pječenje policisća susodce wróćichu. Wěcna škoda wučinja 25 eurow.
Putina jako swědka namjetowali su prawiznicy wobskorženeho reichsbürgera Heinricha XIII. princa Reußa. W sudniskim procesu w Frankfurće su dokumenty prezentowali, kotrež běchu policisća při přepytowanju namakali. Mjez skurilnymi pismami běchu tež listy ruskemu prezidentej Wladimirej Putinej a wonkownemu minister Sergejej Lawrowej. W tutych prošeše so wo připóznaće noweho kralestwa jako stat. Na to prawiznicy namjetowachu, sej Putina na proces skazać.
To a tamne (08.10.24)
Hłódny paduch je so do pěstowarnje w hessenskim Gernsheimje zadobył. Tam warješe nudle a pražeše sej jeja. Policija nima žane pokazki na to, zo je 24lětny muž něšto pokradnył. Skućićel bě so z woknom namócnje do twarjenja zadobył. Alarmowa připrawa informowaše policiju. Ta 24lětneho na městnje zaja. Přećiwo njemu přepytuja nětko wosebje ćežkeho padustwa dla.
Roboter-dirigent ma přichodnu njedźelu Drježdźanskich sinfonikarjow nawjedować. Projekt „Roboter.Sinfonie“ zbudźa hižo nětko wulku kedźbnosć. Mjezynarodnje zestajeny ansambl hudźbnikow načasneje hudźby nawjeduje spočatnje Magnus Loddgart z Nowergskeje. Po přestawce chce wón nawod orchestra robotarce „MAiRA Pro S“ přewostajić. Trenowali su njewšědnu dirigentku w Drježdźanskej techniskej uniwersiće.
To a tamne (07.10.24)
Njewšědneho paducha je sudnistwo w Šotiskej k jastwu 22 měsacow zasudźiło. Muž bě so do dowoloweje chěžki zadobył a tam dlěši čas bydlił, jako by tam doma był. Wón wužiwaše kupjel, bjerješe sej žiwidła z chłódźaka a płokaše drasty w płokanskej mašinje. Awtomatiska kamera wobsedźerja domu informowaše. Přichodny syn wopiteho paducha na to namołwješe, chěžu wopušćić. Policija muža zaja. Před sudnistwom paduch na to pokaza, zo bě bjezdomny a we wuskosćach.
Po wšej Němskej jónkrótny muzej pinguinow w Cuxhavenje nad Sewjernym morjom swoju zběrku předawa. Mějićelej Birgit Berends a Stefan Kirchhoff zběrataj 30 lět pinguiny, wot lěta 2009 matej muzej, kiž njese so z darow. Ličba pinguinow je na 26 000 rozrostła. Hišće hač do 9. nowembra maja zajimcy składnosć, sej pinguina we wupředani kupić.
To a tamne (04.10.24)
Z kapsnym nožom, z kotrymž sej hewak jabłuko přihotuje, je chirurg w jendźelskim Brightonje operował. Lěkar bě hrudźno pacientki z nožom wočinił, sćelak BBC tele dny rozprawješe. Chorownja zwurazni, zo bě to nuzowy pad, dokelž njeje chirurg w chwatku sterilny skalpel namakał. Dale zamołwići měnja, zo njeje tajke jednanje lěkarja z wašnjom. Pacientka pak je operaciju derje přetrała. Policija pad pak přiwšěm přepytuje, dokelž je tam prawdźepodobnje wjele njedostatkow w zwisku z lěkowanjom.
Dokelž bě šofer busa jězdźidło strašnje wodźił a samo do wodźaceje planki jěł, su sobujěducy ze strachom nuzowe čisło narunanskeho busoweho wobchada zazwonili. Přichwatani policisća su šofera potom w Dessau kontrolowali. Kaž so wukopa, měješe 43lětny 1,6 promilow alkohola w kreji.
To a tamne (02.10.24)
Pjenjezy na awtodróze A 1 rozdźělił je wětřik njedaloko Wuppertala. 50lětny hosćencar bě po přestawce swoju móšeń na třěše awta zabył. Na to běchu so papjerjane pjenjezy kilometer daloko po dróze rozdźělili, cyłkownje něhdźe 2 000 eurow, policija zdźěla. Šoferojo informowachu policiju wo lětacych pjenjezach. Hrožeše strach, zo někotři zastanu a za pjenjezami běhaja. Policija awtodróhu zawrě a pjenjezy zezběra.
Na wšěch sydom milionow eurow drje zrumowanje sypnjeneho Carolinoweho mosta w Drježdźanach płaći. Z tuteje sumy město w prěnim „hrubym trochowanju“ wuchadźa. Po wulkej wodźe Łobja chcedźa móst přichodnu póndźelu dale torhać a rumować. Beton mosta móža hišće trjebać. Łódźnistwo pak wostanje dlěši čas blokowane, město zdźěla.
To a tamne (01.10.24)
Wopačny muzej za padustwo wupytał je sej 35lětny muž w Diusburgu. Muž bě njedźelu rano wokno muzeja rozbił a so do njeho zadobył. Při tym zaskoči alarmowa připrawa. Policija na to twarjenje wobstupi a paducha zaja. W nachribjetniku podhladneho namakachu zastojnicy grat za padustwo, ale žanu rubiznu. To wšak by tež wobćežne było: Muzej je specializowany na wulke a ćežke skulptury. Paduch drje měrješe so na muzejowu kasu. Ta pak bě zrumowana.
W pjanosći z trašawku wokoło so třěleli su třo mužojo w Berlinje. Na to přijědźe specialny komando policije do štwórće Prenzlauskeje hory, po tym zo běchu wobydlerjow wobrónjenych na balkonje wuhladali. Zastojnicy so namócnje do bydlenja zadobychu a muži w starobje 63, 34 a 19 lět zajachu. W bydlenju namakachu pistole, municiju a nože.
To a tamne (30.09.24)
Při pytanju hribow w lěsu pola Regensburga je 64lětneho muža dźiwje swinjo nadběhało. Kaž muž nowinje „Donaukurier“ rozprawja, měješe wón strach wo swoje žiwjenje a je 20 mjeńšinow ze skoćećom wojował, doniž njeje skónčnje ćeknyło. Muž a dźiwje swinjo staj so při tym zraniłoj. Jako nadpadnjeny k swojemu awtu chwataše, zetka dalšeho muža, kotrehož je skoćo tohorunja atakěrowało. Tón pak móžeše so z kijom wobarać. Wobaj mužej stej na to zhromadnje do chorownje jěłoj. Policija a lěsnicy za dźiwim swinjećom pytachu a je naposledk zatřělichu.
Turistaj z Vietnama staj tele dny spytałoj z sportowymi črijemi a ćeńkimaj cholowomaj na 4 478 metrow wulku horu Matterhorn zalězć, štož so wězo zymy, sněha a loda dla njeporadźi. Pomocnicy dyrbjachu jeju na 3 500 metrach wuchować.
To a tamne (27.09.24)
Mobilne telefony w jastwje předawał je 36lětny justicny zastojnik w Berlinskim jastwje Tegel. Policisća su mjeztym bydlenje zastojnika kaž tež toho běrow w jastwje přepytowali. 36lětny bě policiji napadnył, po tym zo běchu pola jateho namakany handy wuhódnoćili. Mjeztym je dopokazane, zo je 36lětny prawidłownje mobilne telefony a druhe wěcy do jastwa nosył a tam jatym předawał.
Po 47 lětach jastwa je japanske sudnistwo muža wuwinowało, kotrehož běchu na zakładźe wot policije falšowanych dopokazow trójneho mordarstwa dla k smjerći zasudźili. Je to jedyn z najhóršich padow justicnych stawiznow kraja. 47 lět trajaca izolacija w smjertnej celi je dźensa 88lětneho ćělnje a dušinje zlemiła, toho 91lětna sotra rozprawja. Muža běchu 1966 zasudźili a 2014 pušćili. Hakle nětko bu dospołnje rehabilitowany.
