To a tamne (07.07.25)
Na wšěch 30 kilogramow cannabisa w swojim awće měješe 30lětny muž, jako jeho policisća pjatk dopołdnja připadnje na zwjazkowej dróze 115 njedaloko Cerska na mjezy Braniborskeje a Sakskeje kontrolowachu. Drogi ležachu zapakowane w dwěmaj wačokomaj. Zastojnicy wopojny jěd sćazachu a šofera zajachu. Sudnik je 30lětneho mjeztym do jastwa pósłał. Přećiwo njemu přepytuja ilegalneho wikowanja z drogami dla.
Z balkona třećeho poschoda skočiłoj staj paduchaj w Berlinskej strowotnej studni. Při tym sej wobaj mužej w starobje 48 lět wjacore kosće złamaštaj. Wobeju dowjezechu do chorownje. Swědcy běchu wobkedźbowali, kak so paduchaj do bydlenja zadobyštaj, a zawołachu policiju. Jako mužej policistow wuhladaštaj, skočištaj z balkona. Policisća jeju zastarachu. Wobaj měještaj grat a pjenjezy při sebi.
To a tamne (04.07.25)
Kable nabiwanskeje stacije za elektroawta pokradnyli a tak tójšto škody načinili su skućićeljo w sewjerorynsko-westfalskim Langenfeldźe. Kaž policija zdźěla, su njeznaći w nocy na štwórtk na parkowanišću zahrodoweho centera dźesać kablow stacije wotrězali a pjeć z nich sobu wzali. Po dotalnym trochowanju wobliča škodu padustwa a porjedźenja na znajmjeńša 50 000 eurow. Policija prosy swědkow, so přizjewić.
Třilětny hólc je policiji w bayerskim Bergenje pomhał, wobchadne njezbožo wujasnić. Hólčec bě wčera wobkedźbował, kak šofer awta z nižozemskim čisłom we wsy do parkowaceho awta zrazy a so zminy. Dźěćo scenu nanej z pomocu swojich hrajkowych awtkow předstaji, na čož nan policiju zawoła. Pachoł njezbožo tak nadrobnje wopisowaše, zo móžeše policija 18lětneho zawinowarja namakać.
To a tamne (03.07.25)
Wulka horcota je za železnicu techniske defekty a zapozdźenja zawiniła. Najčasćišo bědźachu so sobudźěłaćerjo ze sćehnjenymi wuhibkami a horcymi motorami. Sapace słónco bě wocl kolijow zezhibowało. Motory ćahow njejsu so dosć chłódźili a su wupadnyli. Nimo toho so podłu kolijow stajnje zaso kerčiny palachu, štož zawrjenje čarow zawinowaše – mjez druhim w Delnjosakskej, Saksko-Anhaltskej a w Hamburgu.
Přepjany, zo móhł do awta zalězć, bě muž w Jenje. Swědkojo prócowanja 33lětneho wobkedźbowachu a policiju informowachu. Jako zastojnicy přijědźechu, njebě muž přeco hišće dale. Policisća zwěsćichu, zo je wón z awtom hač tam dojěł a při zaparkowanju druhe awto wobškodźił. Alkoholowemu testej pak so muž zasakle spjećowaše. Skónčnje jeho sputachu a na stražu sobu wzachu.
To a tamne (02.07.25)
Po sylnych njewjedrach a wjacorych lawinach kamjenjow a błóta su w Tirolskich horach dwě hórskej chaće ewakuowali. Helikopter awstriskeho wójska je něhdźe 50 ludźi wuchował, zamołwići zwjazkoweho kraja Tirola rozprawjeja. Pěši z hory do doła by za turistow přestrašne było, dokelž hrožachu dalše lawiny. Zamołwići sej spočatnje myslachu, zo je sto ludźi w chatach.
Na wšěch 40 wulkich dulow dejneroweho mjasa namakała je žona w delnjosakskim Königslutteru. Mjaso ležeše w folijach zapakowane w přirowje mjez kerkami. Policija měni, zo su njeznaći dule tam ilegalnje wotpołožili. Snadź jedna so tu wo wotpadki gastronomije abo skažene mjaso, kotrež je dejnerowy wobchod ilegalnje wotbyć chcył. Policija prosy swědkow, kotřiž su awto abo podhladnych wobkedźbowali, wo pomoc.
To a tamne (01.07.25)
Žałosćace a wobarace so dźěćo w badensko-württembergskim Iffezheimje je zasadźenje policije zawiniło. Swědkojo tukachu na zawlečenje dźěsća. Na to přijědźe policija z wjacorymi awtami a samo helikopterom. Skónčnje so wukopa, zo běštej staršej dźěćo ze swjedźenja wotewzałoj – z jeho wida pak „přezahe“.
Wotstajenje e-scooterow na chódnikach chcedźa přichodnje raznišo rjadować. Tole připowědźa zwjazkowy minister za wobchad Patrick Schnieder. Přiwótřić chcedźa směrnicy za wupožčowarjow tajkich jězdźidłow. Přichodnje ma zakazane być, rolery prosće na chódnikach parkować abo – ležo wostajić. Tole budźe jenož hišće priwatnym wobsedźerjam dowolene. Poskićowarjo maja koncept zdźěłać, kak sej parkowanje jězdźidłow předstaja. Wosebje we wulkoměstach su rolery na chódnikach wulki problem.
To a tamne (30.06.25)
Njewšědny nadawk mějachu wohnjowi wobornicy sobotu wječor w Böblingenje pola Stuttgarta: Na třěše nakupowanišća steješe psyk, kiž zadwělowany tam a sem běhaše. Ludźo běchu skoćo wuhladali a wobornikow wołali. Tući štyrinohača z wjerćatym rěblom wuchowachu. Horcoty dla bě psyk chětro wučerpany. Na straži jeho z wodu zastarachu, doniž sej wobsedźer psa njewotewza. Kak bě tón na třěchu přišoł, njemóžachu zwěsćić.
Kurjenje při busowych zastanišćach, w kupanišćach abo zjawnych parkach je w Francoskej wotnětka zakazane. Tež w bliskosći šulow, na zjawnych sportnišćach a w knihownjach so hižo kurić njesmě. Tole je ministerka za strowotnistwo Catherine Vautrin wukazała a pokutu 135 eurow připowědźiła. Francoska chce po tutym puću wosebje dźěći před škodami pasiwneho kurjenja škitać.
To a tamne (27.06.25)
Z pokradnjenym dźěćacym kolesom chcyše muž w hornjej Frankskej dener zapłaćić. Njeznaty bě wobsedźerjej wobchoda w Marktredwitzu rjekł, zo drje pjenjezy nima, zo pak by jemu za dener koleso přewostajił. Předawarjej bě to podhladne, zazwoni policiju. Prjed hač zastojnicy dojědźechu, bě so njeznaty zminył. Policisća pak zwěsćichu, zo bě paduch sto eurow drohe koleso w měsće pokradnył. Policija pyta nětko za swědkami.
Šefowka drogoweho wotrjada policije w francoskim Marseillu je podhladna, zo njeje swoje winowatosće spjelniła, jako so 400 kilogramow kokaina ze składa policije zhubi. Tež přećiwo jeje zastupjerjej nětko přepytuja. Dalšeju policistow, kotrajž staj přećiwo drogowym cwólbam slědźiłoj, su zajeli. Njeje wuzamknjene, zo su wobdźěleni kriminelnym pomhali, kokain ze składa pokradnyć.
To a tamne (26.06.25)
Z laserowym pointerom su njeznaći minjenu nóc w Rheinbergu pola Düsseldorfa policajski helikopter slepili. W tym času běchu wjacore helikoptery po puću, zo bychu za zhubjenej wosobu pytali. Muža su njezranjeneho našli. Za čas akcije pilot jedneje z mašinow pytny, zo so na zemi něchtó ze sylnym laserom na njeho měri. Pilot alarmowaše policiju, kotraž skupinu ludźi zwěsći. Laserowy nastroj pak běchu hižo zrumowali. Pilotow helikopterow a lětadłow z laserom slepić je chłostajomny njeskutk.
Nimale štyri promile alkohola měješe šofer wosoboweho awta w kreji, jako při čerwjenej ampli do čakaceho nakładneho awta zrazy. Při dokumentaciji njezboža namakachu zastojnicy wjacore prózdne bleše alkohola a nimo toho drogi w awće. 40lětny dyrbješe krej a jězbnu dowolnosć wotedać. Wěcna škoda: 10 000 eurow.
To a tamne (25.06.25)
Chětro napity a k tomu hišće bjez jězbneje dowolnosće bě paduch w delnjosakskim Stolzenauwje po puću. 36lětny bě do toho sobudźěłaćerjam „Pennyja“ napadnył, jako je w kupnicy kradnył a so po tym z oranžowym transporterom zminył. Policisća awto zadźeržachu. Při tym jim hnydom alkoholowa wóń do nosa stupaše. Test pokaza 3,1 promile. Za jězbnej dowolnosću so jeho podarmo prašachu.
15 000 eurow na jebakow zhubiła je 87lětna žona w durinskim Hermsdorfje. Skućićeljo wudawachu so jako policisća, kotřiž su w susodstwje runje cwólbu paduchow dosahnyli. W jich noticnej knižce namakachu pječa tež adresu staruški. Zo njeby so ničo hórše stało, poručichu žonje, zo pjenjezy z konta wza a jim přepoda. Žona tole činješe.
To a tamne (24.06.25)
Surfowanje psow je minjeny kónc tydźenja zaso tójšto přihladowarjow do pobrjóžneho města Huntington Beach njedaloko Los Angelesa w Kaliforniskej přiwabiło. Psy wubědźowachu so tam na płuwacych deskach. Wosebity star bě Faith, ameriski pitbull-terrier: Hłucha a nimale slepa psyca poda so zmužiće na desce do žołmow. Nimo toho wubědźowachu so psy w slalomowym běhu, při skakanju přez zadźěwki a w dalokoskoku.
Wulkeje hary nadróžneho wobchada dla ćerpi mjeztym kóždy pjaty wobydler Europy. Něhdźe 112 milionow ludźi w 31 přepytowanych krajach dyrbi z trajnej haru w swojej wokolinje žiwych być. Tole piše europska wobswětowa agentura EEA w swojej nowej rozprawje. Hara nješkodźi jenož strowoće ludźi, ale wuskutkuje so negatiwnje na wobswět a hospodarstwo. Polěpšenje njeje wotwidźeć.
