To a tamne (12.09.25)
Swoju awtobiografisku knihu „Inside. Dobyć – přěhrać – znowa započeć“ je bywši tenisowy profi Boris Becker wčera w Berlinje předstajił. Při tym jeho wjacori swójbni přewodźachu. Becker rozprawješe, kak su jemu telefonaty z dźěćimi a přiwuznymi čas jatby přetrać pomhali. Nimo toho je wón swoje nastajenje wo tym změnił, što je w žiwjenju wažne. Becker bě wjacore měsacy we Wulkej Britaniskej w jastwje, dokelž bě při insolwency dźěl swojeho zamóženstwa zatajił.
Ze 14 kilogramami kokaina w awće lepjeneho muža je sudnistwo w Neubrandenburgu k třom lětam a třom měsacam jastwa zasudźiło. Sudnistwo bě sej wěste, zo 43lětny z drogami wikuje. Muža běchu w februaru na němsko-pólskim pomjeznym přechodźe kontrolowali. Pječa njeje wón wědźał, zo ma kokain w hódnoće 900 000 eurow we wačokach.
To a tamne (11.09.25)
Za posudźowanje swójskeje strowoty wužiwa štwórćina ludźi w Němskej mjeztym kumštnu inteligencu. Tole je woprašowanje strowotniskeje poradźowarnje Deloitte wunjesło. Loni bě runje dźewjeć procentow ludźi rjekło, zo praša so w padźe chorosće kumštneje inteligency, mjeztym je jich 25 procentow. Hłowna přičina rozrosta: Kumštna inteligenca je lochko přistupna a na prašenja ludźi spěšne a zrozumliwje wotmołwja.
Hač so nan a syn tola hišće wujednataj? Princ Harry je po informacijach medijow do rezidency swojeho nana krala Charlesa III. w Londonje dojěł. Połdra lěta so nan a syn wjace widźałoj njejstaj. Poměr mjez nimaj je pječa dosć napjaty. Medije spekuluja, zo hotujetaj so mužej w Clarence House traš na rozmołwu, z kotrejž byštaj zwadu skónčiłoj. Pječa je Charles za to swój dowol w Šotiskej přetorhnył.
To a tamne (10.09.25)
Čas jastwa je Boris Becker w swojej nowej knize „Inside“ předźěłał. Najhórše bě nócne wołanje sobujatych, „jako by něchtó wo pomoc wołał“, 57lětny piše. Wusud sudnistwa w Londonje za Beckera kónc apryla 2020 běštej dwě lěće a šěsć měsacow w jastwje. Wón njebě w insolwencnym jednanju swoje zamóženje korektnje dokumentował. Tole je tež w Němskej njesměrnu kedźbnosć zbudźiło.
Sylna nadwaha dźěći a młodostnych je mjeztym wjetši problem na swěće hač hłód. Po najnowšej rozprawje dźěći zastupowaceje organizacije UNICEF je podźěl wuhłódnjenych w starobje mjez pjeć a 19 lětami wot lěta 2000 na 9,2 procentaj woteběrała. Samsny čas je podźěl sylnych a přećežkich dźěći na 9,4 procenty rozrostł. W Němskej je kóžde štwórte dźěćo přesylne. Hłowna přičina je, zo zežiwja so ludźo přiběrajo z fastfood.
To a tamne (09.09.25)
Štyri dny dyrbješe muž w Osnabrücku w skóncowanym lifće wjaceswójbneho domu čakać . Bjez wody, jědźe a telefona bě 70lětny popadnjeny, rěčnik policije zdźěli. Syn je swojeho wučerpaneho nana skónčnje zhromadnje z pomocnikami a policiju wuswobodźił. Muža dowjezechu do chorownje. „Mjeztym je so wón zaso zhrabał“, rěčnik policije zdźěli.
Podarmo je sej 37lětny Polak na toaletu ćaha wućeknył. Na hłownym dwórnišću w Mainzu jeho policisća zajachu. Prawdźepodobnje chcyše so muž kontroli wuwinyć, dokelž njeměješe jězdźenku. Na policajskej straži zastojnicy zwěsćichu, zo předleži přećiwo Polakej wukaz zajeća. Wón bě wospjet zakonje Němskeje ranił. Muž njemóžeše pokutu 5 600 euro zapłaćić a dyrbješe tuž 140 dnjow do jastwa. Nimo toho zapisachu sej zastojnicy wjacore nowe skóržby přećiwo njemu.
To a tamne (08.09.25)
Sportowe awto Formule 2 su policisća na normalnej dróze w Čěskej zadźerželi. Druzy šoferojo běchu zastojnikow informowali, zo je tajke awto po puću. Na to přijědźechu policisća z wjacorymi wozami a helikopterom. 51lětny šofer nochcyše so wuprajić. Alkohol a drogi njejsu zwěsćili. Policija je hižo wjele lět podarmo za awtom pytała, wo kotrymž stajnje zaso w interneće rozprawjeja. Wóz ma 600 PS a je hač do 300 km/h spěšny. Šofer dyrbi z wysokej pokutu a zakazom jězdźenja ličić.
Młody łós (Elch) je na swojim pućowanju na wuchodźe Awstriskeje jednu z najwažnišich železniskich čarow kraja wjacore hodźiny blokował. Kolije zwjazuja Wien ze zapadnej Awstriskej, Němskej a zapadnej Europu. Jako „Emil“ znate zwěrjo steješe pola St. Pöltena na kolijach a so njehibny, jako železnica přijědźe. Mała lokomotiwa Emila z kolijow storči.
To a tamne (05.09.25)
Priwatna sušernja rybow je w delnjosakskim Norddeichu nad Sewjernym morjom zasadźenje wohnjoweje wobory zawinowała. Dowolnik bě za kerčiznu kur wuhladał a nuzowe čisło wolił. Wobsedźer domu so njemało dźiwaše, jako nadobo wohnjowi wobornicy w jeho zahrodźe stejachu. Bjez toho zo bychu porsćik hibnyli, za to pak z ćim wjetšim apetitom dyrbjachu ći zaso wotjěć. W sudobju wisace wuhorje njeběchu hišće dokurjene a „tak a tak za wšěch dosahali njebychu“.
Wólnočasni cowboyjojo schadźuja so tuchwilu na najwjetšich westernowych wikach Europy w Friedrichshafenje nad Bodamskim jězorom. Hač do njedźele wočakuja tam 50 000 wopytowarjow, kiž chcedźa so wónje konjow a kože nasrěbać. Wjace hač 300 wustajerjow ze 16 krajow prezentuje wšitko wot karěrowaneje košle hač ke kožanym škórnjam.
To a tamne (04.09.25)
Dokelž njeje bayersce rěčał je so telefoniski wobšudnik w delnjobayerskim Bruckbergu we wokrjesu Landshut sam přeradźił. Njeznaty bě na 84lětneho zazwonił, so jako jeho wnučk wudawał a wo wulkim njezbožu rozprawjał. 84lětny na to telefonat skónči. Žadyn z jeho wnučkow njerěči wysokoněmsce, starc policiji rjekny. Pjenjezy sej cuzy při telefonje ani wjace žadać njemóžeše, 84lětny bě słuchatko hižo zaso połožił.
30 lět je žona w Berlinje w loteriji stajnje samsne ličby woliła, doniž so jeje sćerpnosć skónčnje njezadani. Wona je 4,4 miliony eurow dobyła. Kaž Berlinske nowiny rozprawjeja, hraje žona w starobje mjez 50 a 60 lětami wot lěta 1996 kóždy tydźeń sobotnu loteriju. Při tym zasadźuje wona stajnje samsne ličby: 5, 11, 13, 39, 42 a 48, wona přeradźi. Dotal je jeje dobyće lětsa najwyše w Berlinje.
To a tamne (03.09.25)
Nimale hodźinu z bydlenja na uniwersitu trjeba tuchwilu kóždy šesty studowacy w Němskej. Zwjazkowy statistiski zarjad zdźěla, zo dyrbi 16 procentow studowacych telko časa za puć do kubłanišća nałožować. Mjez ludźimi, kotřiž wšědnje na dźěło jězdźa, je to runje šěsć proc. 27 procentow wšěch studentow trjeba wjace hač poł hodźiny, zo by campus docpěło. Za jězbu na uniwersitu wužiwa 53 procentow młodostnych busy a železnicy.
Wuwiće wobydlerstwa na wuchodźe a zapadźe Němskeje je tež hišće 35 lět po zjednoćenju kraja jara rozdźělne. Tak je ličba wobydlerjow we wuchodnych krajach mjez 1990 a 2024 wo 16 procentow na mjeztym 12,4 miliony ludźi woteběrała. Samsny čas je wona w zapadnych krajach wo dźesać procentow na 67,5 milionow rozrostła. Najwjetši přirost registrowachu w Bayerskej ze 16 procentami.
To a tamne (02.09.25)
Kuriozne stawiznički naposkać dyrbjachu sej zastojnicy awtodróhoweje policije, jako njedaloko sewjerorynsko-westfalskeho Moersa 22lětneho šofera wosoboweho awta kontrolowachu. Tón přizna, zo njeje hišće nihdy jězbnu dowolnosć měł. Awto z wopačnym čisłom słušeše přećelej, kotrehož pak jeno z předmjenom znaješe. Přiwołany přećel ani prawje njewědźeše, wotkal awto ma, a zo bě je 22lětnemu wupožčił, jemu tež wjace wědome njebě. Policisća awto sćazachu a napisachu wjacore skóržby.
Tak horco kaž lětsa we Wulkej Britaniskej w zašłych 150 lětach njebě, kaž ze zapiskow wuchadźa. Narodna wjedrarnja zdźěla, zo wučinješe přerězna temperatura wot spočatka junija hač do kónca awgusta 16,1 stopjeń, štož je 1,51 stopnjow nad wjelelětnym přerězkom. Dotalny rekord naměrichu lěta 2018.
To a tamne (01.09.25)
Dawk na tobak měł so z wida fachowcow prawidłownje a w dosć raznej formje zwyšić. Tole je najskutkowniši srědk, młodostnych wot kurjenja wotdźeržeć, je sej nawoda Heidelbergskeho slědźenskeho centruma přećiwo rakej, prof. Michael Baumann dospołnje wěsty. Wón pokazuje w tym zwisku na Awstralsku, hdźež dawk na tobak kóžde lěto wo dźesać procentow zwyša. „Tam je podźěl kurjakow mjeztym na dźesać procentow woteběrał“, Baumann rjekny.
Při wobchadnym njezbožu je so bywši měšćanosta New Yorka Rudy Giuliani zranił. 81lětny, kiž bě sčasami wuski zwjazkar prezidenta USA Donalda Trumpa, dyrbješe so w chorowni lěkować dać. Po prěnich dopóznaćach su sej wěsći, zo njebě zražka wotpohladna. Druhe awto bě wotzady do woza zrazyło, w kotrymž Giuliani sedźeše. Tón so při tym zrani.
