To a tamne (18.09.26)
Modelka Gloria-Sophie Burkandt, najstarša dźowka šefa CSU Markusa Södera, je knihu wo swojej generaciji napisała, kotraž póndźelu pod titulom „Generacija KI – w nowym swěće čłowjescy wostać“ wuńdźe. W předsłowje piše 27lětna, zo wěnuje ju „wšěm tym, kotřiž wědźa, zo smy runje w času wulkeje kulturneje změny žiwi, a kotřiž su zwólniwi dokładnje připosłuchać, wuknyć a mosty twarić“.
Najwjetši mórski park wětrnikow w Němskej je energijowe předewzaće EnBW wčera wotewrěło. Wón leži w Sewjernym morju něhdźe 110 kilometrow před kupu Helgoland. Dohromady steji tam 64 wětrnikow danskeho zhotowjerja Vestas, kiž maja cyłkownu kapacitu 960 megawattow. Předewzaće EnBW je něhdźe 2,4 miliardy eurow do projekta inwestowało.
To a tamne (17.09.26)
Michael Kretschmer (CDU) změje wospjet priwatnu awdiencu pola bamža. Swoju prěnju awdiencu měješe sakski ministerski prezident, kotryž přisłuša ewangelskej cyrkwi, w lěće 2022 pola bamža Franciskusa. Temy tehdyšeje rozmołwy běchu wójna w Ukrainje, postupowanje cyrkwje přećiwo znjewužiwanju dźěći a změna klimy. Přichodnu srjedu přijima jeho bamž Leo XIV. w Japoštołskim palasće Vatikana.
Ameriska hniłosć (Amerikanische Faulbrut) – bakterielna chorosć pčołkow – so we wokrjesu Dubja-Błóta rozpřestrěwa. Pjeć padow pčolaceje mrětwy je weterinarny zarjad wot spočatka junija we wokrjesu zwěsćił. Wokoło gmejnow Königs Wusterhausen/Parsk, Schenkendorf/Šenkojce, Mittenwalde/Chudowina, Gallun/Gółuń, Bestensee/Bestwin a Zeesen su zawrjene pasmo zarjadowali.
To a tamne (16.09.26)
Za swój bytostny přinošk k wujasnjenju awtoimunostnych chorosćow spožča awstralskemu imunologej Christopher Goodnowej myto Paula Ehrlicha a Ludwiga Darmstaedtera. Goodnow je mjez druhim wuslědźił, zo imunostny system tak mjenowane B-bańki, kotrež móža swójske ćěło nadpadnyć, składuje, město toho zo by je zničił. Z tym natwari sej wjetši reservoir za wotwobaranje infektow. B-banki pak su zdobom přičina mnohich awtoimunostnych schorjenjow, n. př. multipelneje sklerozy abo drjenja. Myto je ze 120 000 eurami dotěrowane.
5,5 milionow dolarow wulku dobyćersku premiju je sej Alexander Zverev minjenu njedźelu w New Yorku z dobyćom „US Open“, jednoho z najwjetšich tenisowych turněrow swěta, zasłužił. Dawkow dla pak jemu zwjazkowy stat USA New York hnydom połojcu sćaza.
To a tamne (15.09.26)
Drogi w hódnoće něhdźe 20 milionow dolarow su zastojnicy drogoweho zarjada DEA Zjednoćenych statow w zwjazkowym staće Texasu našli. Nimale cyłu tonu wopojadła Crystal Meth spytachu dotal njeznaći pašowarjo na jónkrótne wašnje tarnować. Schowachu je w plastikowych měškach w kumštnych kałowych hłójčkach, kotrež so wot prawych lědma rozeznawać hodźa.
Za slědami Habolanow su minjenej tydźenjej archeologojo blisko gmejny Havelaue w braniborskej kónčinje Havelland ryli. Na wonym městnje je bywše słowjanske hrodźišćo Pilatsch stało. Nimo słowjanskich su wědomostnicy tež artefakty ze železoweje a młodeje kamjentneje doby namakali. Mjez namakankami běchu črjopy z keramiki, kosće zwěrjatow kaž tež zbytki z dobywanja železa.
To a tamne (14.09.26)
To a tamne (11.09.26)
Syna norwegskeje kralowny Mette-Marit, Borga Høibyja, je sudnistwo w juniju dweju wumocowanjow, domjaceje namocy a kopicy dalšich njeskutkow dla k štyrjom lětam jastwa zasudźiło. Wčera su sudnicy powołanje 29lětneho přećiwo wusudej dopušćili. W tuchwilnej přepytowanskej jatbje smě Høiby z elektroniskimi putami w domje norwegskeje kralowskeje swójby přebywać.
Jens Spahn, bywši šef frakcije CDU/CSU w zwjazkowym sejmje, je so wčera w lisće pola čłonow CDU swojeho wólbneho wokrjesa za podawki w zwisku z t. mj. požčenym maćerstwom w USA zamołwił. Wón přizna, zo bě přebojazliwy, zo by wotewrjenje z tutej sensibelnej temu wobchadźał. Nimo toho je swoju swójbu škitać chcył, zdźěli politikar, kotryž mjeztym za frakciju unije w etatowym wuběrku zwjazkoweho sejma sedźi.
To a tamne (10.09.26)
To a tamne (09.09.26)
Dwanaće ručnych granatow su zastojnicy Berlinskeje policije póndźelu z wotnajateho składu wotnjesć dyrbjeli. Po informacijach dźenika Bild běchu je sobudźěłaćerjo składźišća našli. Dotal njeje znate, štó bě granaty tam zawostajił a čehodla. Pozdźišo su je na wosebitym arealu za rozbuchadła znješkódnili.
Bywša kanclerka Angela Merkel (CDU) je prawidłownje na Instagramje „po puću“. Tole wona wčera w rozmołwje na wikach Digital X w Kölnje přizna. Sama wšak aktiwnje zdźělenki njewozjewja. Dokelž pak je wćipna, přeslědźi tam hdys a hdys přinoški a komentary, kotrež ju wšědny dźeń zaběraja, wona wu-zběhny. „Zo pak dóstawam wabjenje za črije za seniorow, kiž maja wosebitu póduš za hładke dróhi, dokelž běch so raz z temu wobsuwanja zaběrała, to mje iritěruje“, Merkel přispomni.
To a tamne (08.09.26)
To a tamne (07.09.26)
Dwě- a třilětne dźěćo nadeńdźechu w swojich pjelškach a jenož z přikrywu na ramjenjomaj sobotu rano na dwórnišću w porynsko-pfalcowskim měsće Rülzheim. Mjeztym zo staršej spaštaj, twochnyštej z domu, dokelž chcyštaj sej w předawanskej pasaži dwórnišća nowe črije kupić. Zastojnicy policije móžachu wobeju bórze zaso čiłej a strowej staršimaj přepodać.
„Festiwalej kumštneje inteligency“ zadźěwać chce profesor za matematiku na grjekskej uniwersiće w Patrasu, třećim najwjetšim měsće w Grjekskej. Tohodla maja jemu studenća z nawočemi, kotřiž so na pruwowanjach wobdźěla, z wopismom lěkarja dopokazać, zo je woprawdźe trjebaja. Dźeń a husćišo wón dožiwja, zo wužiwaja studenća smartne KI-nawoči, z kotrymiž spytaja w pruwowanju wobšudźić. To wuzběhny profesor na online-platformje města.
