Krótkopowěsće (25.09.25)
Sprjewiny hotel za Ukrainjanow?
Budyšin. Krajnoradny zarjad pruwuje, hač njemóhł Sprjewiny hotel pak za požadarjow wo azyl pak za Ukrainjanow dale wužiwać. To je wčera na naprašowanje našeho wječornika zdźělił. Liča z přichadom tydźensce 40 Ukrainjanow, telko bě jich dotal w běhu měsaca. Přičinje za stupacu ličbu Ukrainjanow stej šmórnjenje socialnych wukonow za nich w Pólskej a rozsud ukrainskeho knježerstwa, zo smědźa 18- do 22lětni mužojo kraj wopušćić.
Přihotuja festiwal dudakow
Slepo. Na wčerawšim posedźenju předsydstwa župy Jakub Lorenc-Zalěski su župnu hłownu zhromadźiznu 29. oktobra přihotowali. Dalšej temje běštej 10. festiwal dudakow wot 19. do 21. junija 2026 a wubědźowanje wo najsłódniši štrajzlowy tykanc 20. nowembra, kotrež chcedźa nimo dalšich projektow přewjesć. Županka Diana Maticowa so čłonam gremija za jich angažement dźakowaše.
Spěchuja wopomnišćo
Krótkopowěsće (24.09.25)
Statnik: Cyž a Hančik do prezidija
Budyšin. Předsyda Domowiny Dawid Statnik namjetuje zwjazkowemu předsydstwu (ZP), zo njech Bjarnata Cyža a Marka Hančika jako dalšeju čłonow prezidija třěšneho zwjazka powołaja. To wuchadźa z předłohi wobzamknjenja za pjatkowne wuradźowanje w Nowym Miłorazu. Po wustawkach měłoj prezidijej nimo předsydy a městopředsydow dalšej čłonaj ZP přisłušeć.
Hudźbna šula z nowym designom
Budyšin. Wokrjesna hudźbna šula Budyšin prezentuje so wotnětka z nowym logom a modernizowanym layoutom swojeje internetneje strony. Po słowach fachoweje wjednicy kubłanišća Camille Jehde matej přiměrjeni „moderne wusměrjenje a wotewrjenosć našeje šule posrědkować kaž tež staršim, šulerkam a šulerjam přistup k našim poskitkam wolóžeć“.
Přepytuja mordarstwa dla
Krótkopowěsće (23.09.25)
Wohenjej škody zawinowałoj
Wojerecy/Kulow. Při wohenju minjenu nóc we Wojerowskim nowym měsće staj so mužaj w starobje 29 a 52 lět zraniłoj. Dom z wjacorymi poschodami při Budyskej aleji su zamołwići ewakuěrowali. 33 wobydlerjow je potrjechenych. Bydlenje w štwórtym poschodźe so dospołnje wupali. Po tuchwilnych informacijach njemóža wobydlerjo domu nachwilnje tam bydlić. Tež w Kulowje je so w prózdnym domje paliło. Tam tukaja fachowcy na zapalerstwo.
Wotpušća wodu
Budyšin. W prědnim dźělu Budyskeje rěčneje zawěry blisko Wownjowa wotpušća w přichodne dny tři metry pegela wody. Přičina toho je kontrola twarjenjow na kromje zawěry. Hač do pjatka ma pegel wody 165 metrow nad nulu docpěć. Někotre dźěle zawěry tohodla wusuša, na tute pak njesměš stupić abo tam běhać.
Konjaca tramwajka zahoriła
Krótkopowěsće (22.09.25)
Wuznamjenjenje přepodał
Bukecy. Prezident sakskeje hudźbneje rady prof. Milko Kersten je gmejnje Bukecy wčera na domchowance wuznamjenjenje jako hudźbne městno na wsy (Landmusikort) 2025 přepodał. Myto wopřija 6 000 eurow a hódnoća žiwe a inowatiwne amaterske hudźbne kulturne žiwjenje kaž tež wusahowacy čestnohamtski angažement w gmejnje.
Wokrjesny zwjazk załožili
Zhorjelc. Čłonojo Zwjazka Sahry Wagenknecht (BSW) ze Zhorjelskeho wokrjesa su zawčerawšim wokrjesny zwjazk wutworili. Jens Hentschel-Thöricht bu za předsydu wuzwoleny. Jeho zastupuje Carsten Berg. Z wokrjesnym zwjazkom chcedźa lokalnu strukturu wutworić, we wobłuku kotrejež móža wšitcy zaměrnje dźěłać.
Masarykowy list wočinili
Krótkopowěsće (19.09.25)
Skorža přećiwo LEAG
Choćebuz. Wobswětowy zwjazk Greenpeace a Němska wobswětowa pomoc stej Choćebuskemu zarjadniskemu sudnistwu chwatnu próstwu přećiwo změnje strukturow w energijowym předewzaću LEAG zapodałoj. Tole je Greenpeace nětko zdźělił. Wobě organizaciji so starosćitej, zo chce so koncern přewzaću kóštow za saněrowanje bywšich brunicowych jamow wuwinyć.
Dwurěčne tafle přepodał
Tšupc. Społnomócnjeny za naležnosće Serbow w Braniborskej a statny sekretar za wědomosć a kulturu Tobias Dünow (SPD) je wčera w Tšupcu dwurěčne tafle za štyri gmejny přepodał. Wsy w gmejnach Stara Niwa-Wózwjerch, Nowa Niwa, Błośańska Góla a Tšupc změja wotnětka dwurěčnje popisane tafle. Braniborske ministerstwo za wědomosć a kulturu je naprawu z 4 282 eurami spěchowało.
Stary móst wostanje
Krótkopowěsće (18.09.25)
Wurjadnu „hłownu“ wotměli
Budyšin. Z formalnych přičin je Maćica Serbska wčera wurjadnu hłownu zhromadźiznu w Budyskim Serbskim domje wuhotowała. Jednohłósnje schwalichu čłonojo přiměrjeni wustawkow, kotrejž rjadujetej nadawki předsydstwa towarstwa a jeho reprezentancu w juristiskim zmysle. Po zhromadźiznje zahajichu sezonalny rjad Maćična akademija z přednoškom „Prěni lětdźesatk nakładnistwa Maćicy Serbskeje“ dr. Franca Šěna (čitajće wjace we wutornym wudaću SN).
Wutwar A4 hakle po 2040?
Drježdźany/Budyšin. Planowanje wutwara A4 wuchodnje Drježdźan je Zwjazk jeničce hač do Hermsdorfa přilubił. Dalše rozšěrjenje awtodróhi na tři jězdnje do kóždeho směra chce po prognozy wobchada 2040 pruwować. Tole wuchadźa z wotmołwy sakskeho knježerstwa na naprašowanje zapósłanca krajneho sejma Franka Peschela (AfD). Peschel sej wjac angažementa Sakskeje za Łužicu žada.
F-35 dale preferuja
Krótkopowěsće (17.09.25)
Tři žony za wólby wjesnjanostki
Njeswačidło. Tři žony wabja do 2. koła wólbow wjesnjanostki w Njeswačidle wo wolerjow gmejny: Optikarka Anett Pötschke ze Šešowa, ekspertka za strowotnistwo Silke Mickan-Ziesch z Njeswačidła a kubłanska referentka a swobodna rěčnica Juliane Mazalla z Łuha. Wone wuhotuja tež mnohe zjawne informaciske zarjadowanja (jutře na 4. stronje je wobšěrnišo předstajimy a terminy wozjewimy.)
Doba wupisanja nimo
Budyšin. Doba prěnjeho wupisanja Domowinskeho Myta za hospodarstwo je so zawčerawšim skónčiło. Zarjadej Domowiny su namjety z Delnjeje, srjedźneje a Hornjeje Łužicy dóšli. Nětko ma so nowy wutworjeny mytowanski wuběrk schadźować a wo namjetach wuradźować. Myto přepodadźa na 3. fachowym forumje „hospodarstwo a kultura“ w nowembrje.
Haćenja na železniskej čarje
Krótkopowěsće (16.09.25)
Přestorča knižne předstajenje
Njebjelčicy. Knižne předstajenje „Z Prahi do Palestiny“, kotrež měješe so 18. septembra w Njebjelčanskej wosadnicy wotměć, dyrbi Ludowe nakładnistwo Domowina chorosće dla přestorčić. Nowy termin je wutoru, 30. septembra, w 19 hodź. na Njebjelčanskej gmejnskej žurli na Hłownej dróze.
Rozmołwne koło přihotowali
Budyšin. Na swojim wčerawšim online-posedźenju je Mjeńšinowa rada mjez druhim wo přihotach přichodneho rozmołwneho koła narodnych mjeńšin a rěčacych delnjoněmčiny w nutřkownym wuběrku němskeho Zwjazkoweho sejma wuradźowała. Dale zaběrachu so čłonojo rady ze zetkanjom młodostnych, kotřiž přisłušeja narodnej mjeńšinje abo delnjoněmčinu rěča. Zarjadowanje budźe lětsa w nowembrje w Budyšinje.
Dotal dwaj wjelkaj zatřělili
Krótkopowěsće (15.09.25)
Scholze kandidaturu cofnył
Njeswačidło. Jenički kandidat za wólby hłownohamtskeho wjesnjanosty w Njeswačidle je pjatk swoju kandidaturu cofnył. Martin Scholze z Bóšic bě w prěnim wólbnym kole z 48 proc. trěbnu absolutnu wjetšinu skomdźił. K druhemu kołu njedźelu, 28. septembra, wón hižo njenastupi. Kaž nawodnica wólbow Katrin Ullrich wobkrući, dóstanu wolerjo prózdnu wólbnu cedlku a smědźa – kaž w prěnim kole – mjeno napisać. Tehdom je Juliane Mazalla z Łuha ze 105 hłosami najlěpši wuslědk wšěch 56 wosobow docpěła, kotrež buchu napisane. Wjele hłosow bě njepłaćiwych, dokelž njejsu ludźo nimo předmjena a swójbneho mjena wjesku napisali. Scholze njebě drje za sebje wabił, wjele ludźi pak jeho znaje, tež jako wobdźělnika demonstracijow při B 96.
Kowar znowa w předsydstwje
Krótkopowěsće (12.09.25)
Naprašowanje zahajili
Budyšin. Budyska Allendowa štwórć ma so wožiwić, dale wuwiwać a porjeńšić. Měšćanski zarjad je nětko anonymne naprašowanje zahajił, kotrež je mjez druhim w rušćinje a arabšćinje přistupne. W naprašowanju na internetnej stronje www.mitdenken.sachsen.de/1056903 su konkretne prašenja wo měšćanskej štwórći podate. Hač do 27. septembra móža je zajimcy wupjelnić.
Prezentuje so wospjet w Praze
Praha. Z postrowom zahaji dźensa sakska ministerka za kulturu a turizm Barbara Klepsch lětni swjedźeń Kontaktneho běrowa Swobodneho stata Sakska w Praze. Zarjadowanje, na kotrymž so sakska kultura a hospodarstwo w čěskej stolicy prezentujetej, wotměwa so jónu wob lěto. Partneraj stej lětsa wokrjes Šwikawa a turistiski zwjazk regiona Kamjenica-Šwikawa. Sakska a Čěska mjez sobu nadal wuske styki pěstujetej, štož swjedźeń w Praze wospjet symbolizuje.
Wojerska pomoc Pólskej
