Krótkopowěsće (12.11.25)
Šmórnu přiražku za wučerjow
Drježdźany. Sakski minister za kubłanje Conrad Clemens (CDU) chce wosebitu přiražku za wučerski dorost na zakładnych šulach we wjesnych kónčinach klětu wotstronić. Wuwzaćne rjadowanje płaći w šulskim wobwodźe Budyšin, hdźež ju dale wupłaća. Na šulach druhich družin w Sakskej nowi wučerjo přiražku tohorunja dale dóstanu.
Běrow za pop-kulturu załožili
Drježdźany. Sakskej ministerstwje za kulturu a za hospodarstwo spěchujetej z něhdźe 310 000 eurami nowy běrow za pop-kulturu a hudźbu, kotryž je w oktobrje swoje dźěło zahajił. Wón ma być centralne městno za podpěru hudźbutwórcow a za hudźbne institucije w Sakskej. Zaměr je, mjezsobne styki w branši na- a wutwarjeć, wuměłče a wuměłcow dźeržeć a scenu popoweje hudźby wožiwjeć, zdźěli kulturne ministerstwo.
Zahrjebany pokład namakali
Krótkopowěsće (11.11.25)
Ptaču gripu zwěsćili
Budyšin. Kaž dohladowanski a weterinarny zarjad Budyskeho wokrjesa zdźěli, měješe zahinjeny žoraw, kotrehož běchu 26. oktobra pola Łaza našli, ptaču gripu. Dalše mortwe ptaki njejsu fachowcy dotal zwěsćili. Zo by so domjaca abo wužitna pjerizna škitała, měł so kontakt mjez plahowanymi a dźiwimi ptačkami wobmjezować, tak zarjad. Nimo toho fachowcy doporučeja, pjeriznu w zawrjenych kurjencach abo hródźach škitać.
Wojerowski muzej mytowany
Drježdźany. We wobłuku mytowanja Sakski muzej lěta 2025 je sakska statna ministerka za kulturu a turizm Barbara Klepsch wčera w Drježdźanach Wojerowski hród a měšćanski muzej wuznamjeniła. Wosebite myto je z 5 000 eurami dotěrowane. Ministerka wuzběhny jónkrótny koncept, kotryž Wojerowski muzej z tamnišim zwěrjencom zwjazuje.
Myta za demokratiski angažement
Krótkopowěsće (10.11.25)
Serbski sejm w Złym Komorowje
Zły Komorow. Swoje 50. zjawne posedźenje zarjaduje Serbski sejm w Złym Komorowje. Kaž starobny prezident Rainer Vogel informuje, wotměje so wuradźowanje přichodnu sobotu, 15. nowembra, w 10 hodź. na campusu Braniborskeje techniskeje uniwersity Choćebuz-Zły-Komorow (twarjenje 4, rumnosć 4.240). Mjez druhim tematizuja přichodne wukubłanje wučerjow serbšćiny.
Spěchuja změnu energije
Drježdźany. W regionach, kiž su wot změny strukturow potrjechene, chce Sakska w přichodźe solarne připrawy spěchować, kiž wjacori ludźo zhromadnje wužiwaja. Wo tym informuje sakske hospodarske ministerstwo. Tak chcedźa změnu energije tež we wokrjesomaj Budyšin a Zhorjelc podpěrać. Dohromady steji za to 3,1 milionow eurow ze srědkow EU a kraja k dispoziciji.
Karla Maya počesćili
Krótkopowěsće (07.11.25)
Žadyn zawodny swjedźeń lětsa
Budyšin. Lětuši zawodny swjedźeń sobudźěłaćerjow města Budyšin wupadnje. Za organizaciju zamołwity team je event wčera wotprajił. Hladajo na zjawne wobchadźenje z pedagogiskim personalom nječuja so hižo kmani swjećić. Z tym wočiwidnje přećiwo wuprajenjam wyšeho měšćanosty Karstena Vogta (CDU) protestuja, kiž sej w konflikće z financnym měšćanostu dr. Robertom Böhmerom wottwar personala w pěstowarnjach žada.
Wokrjes prawnisce pruwuje
Budyšin. Hač do kónca septembra je krajna direkcija Budyskemu wokrjesej lětsa 395 dalšich Ukrainjanow připokazała – wjele wjac hač wšěm druhim wokrjesam (na přikład Rudne horiny 146, Šwikawa 25). Krajnoradny zarjad chce to prawnisce pruwować, wšako maja dosć dźěła z přiwzaćom tež tych ćěkancow, kotřiž we wokrjesu njewostanu.
Zapósłanča šulu wopytała
Krótkopowěsće (06.11.25)
Kak mnóstwo datow składować?
Zhorjelc. Město Zhorjelc je wot njedźele, 9. nowembra do 13. nowembra hosćićel konferency astronomiskich zarjadnišćow. Němski centrum za astrofyziku (DZA) zarjadowanje organizuje. Předewšěm chcedźa so wědomostnicy a fachowcy informatiki datowej analyzy wěnować. Astronomojo mjenujcy za swoje slědźenje wjele mnóstwa datow zběraja a njemóža wšitke składować, štož je problem.
Wuběrk zelenu swěcu dał
Berlin. Wuběrk za energiju zwjazkoweho sejma je puć za to přihotował, wotškódnjenje w zwisku ze zakónčenjom wudobywanja brunicy wupłaćić. Wo tym informowaše wčera Radio Lausitz. Tak móže energijowe předewzaće LEAG z přibližnje 1,75 miliardami eurami ličić. Tole je rěčnica za energiju frakcije CDU w Sakskim krajnym sejmje Ina Klemm zdźěliła. Nětko ma tomu hišće komisija EU přihłosować.
Předewzaća wuznamjenili
Krótkopowěsće (05.11.25)
Próstwje wotpowědowało
Radwor. Radworska gmejna smě dalše tři lěta městno klimoweho managera wobsadźić. Próstwje gmejny wo spěchowanje městna je zwjazkowe ministerstwo za hospodarstwo a energiju wotpowědało. Mjeztym dwě lěće Marcel Bellmann nadawki wukonja. Tuchwilu dźěła wón zaměrnje na tym, w gmejnje energijowu towaršnosć załožić. Dale zaběra so wón z tym, kak móhli wjeski gmejny z ćopłotu zastarać.
Wjace pjenjez zwěrjatownjam
Drježdźany. Zwěrjatownje w Sakskej dóstanu w přichodźe wjace pjenjezy. Tole je sakski kabinet wobzamknył, zdźěli wčera ministerstwo za strowotnistwo a socialne Swobodneho stata. Spěchowanske srědki maja wob lěto wot dotal 1,3 miliony eurow na dwaj milionaj eurow stupać. Sakske knježerstwo hódnoći tak zamołwitosć zwěrjatownjow, kotrež wažny nadawk towaršnosće wukonjeja.
Ukrainsku chorhoj paruja
Krótkopowěsće (04.11.25)
Kardinal Dominik Duka njeboh
Praha. W starobje 82 lět je kardinal a něhdyši Praski arcybiskop Dominik Duka dźensa rano zemrěł. 2019 prědowaše w Róžeńće na Božej mši na swjedźenju Marije wopytanja, 2020 poby z Praskimi studentami bohosłowstwa w katolskich Serbach a bě prěni kardinal, kiž poby w Serbskim domje w Budyšinje. Před dwěmaj lětomaj bě prěni w stawiznach, kotryž Serbski seminar w Praze wopyta.
Pjenjezy za bydlenja
Drježdźany. Zwjazk a Sakska so wo to prócujetej, zo studenća zapłaćomne bydlenja dóstanu. Kultusowy minister Conrad Clemens (CDU) přepoda jutře medicinskej powołanskej fachowej šuli Drježdźanskeho měšćanskeho klinikuma zdźělenku wo spěchowanju we wobjimje třoch mio. eurow. Z tutymi pjenjezami ma dom z bydlenjemi nastać, w kotrymž je městno za 39 wučomnikow. Z programom „Młode bydlenje“ Sakska tole spěchuje.
Budyski projekt ze šansu na myto
Krótkopowěsće (03.11.25)
Skóržba gmejny wotpokazana
Ústí nad Labem. Krajne sudnistwo w Ústí nad Labem je wotpokazało skóržbu gmejny Přestavlky, žadacu sej zběhnjenje přihotowaneje wysokospěšnostneje čary mjez Prahu a Drježdźanami. Natwar trasy słuša k wobchadnym prioritam čěskeho knježerstwa. Sudnistwo je w zwisku z projektom wysokospěšnostneho koridora hižo wjacore skóržby sewjeročěskich gmejnow wotpokazało.
Prěni Serb w Iraku
Erbil. Serbski wutrajnosportowc Stefan Möller ze Šunowa bě so minjeny pjatk jako prěni Serb w Iraku w měsće Erbil na mjezynarodnym běhanskim zarjadowanju wobdźělił. Šunowčan doběža jako 11. wot štyrista (3:6 h) na marathonowej distancy 42,195 kilometrow do cila.
DFB pokal wulosowany
Dortmund. Rekordny dobyćer FC Bayern Mnichow trjechi we wosmifinalu DFB-pokala na Union Berlin. Borussia Dortmund hraje doma přećiwo Bayer Leverkusenej. Zakitowar titula VfB Stuttgart dyrbi přećiwo druhemu ligistej VfL Bochumej nastupić. We wuchodnym duelu hrajetej spočatk decembra RB Lipsk a 1. FC Magdeburg.
Krótkopowěsće (30.10.25)
Přepytowanja póndźelu zahaja
Bronjo. Archeologiske přepytowanja hrodźišća pola Bronja započnu so přichodnu póndźelu a traja prawdźepodobnje hač do 13. nowembra, z móžnosću podlěšenja do 21. nowembra. Po prěnim wuhódnoćenju wuslědkow móhli dalše přepytowanja klětu sćěhować. Hrodźišćo pola Bronja je archeologiski pomnik a dźěl přepytowanjow Interreg-projekta, při čimž so wědomostnicy z pomnikami a wuskutkami změny klimy zaběraja.
103 200 eurow za Sprjewiny hotel
Budyšin. Wokrjes Budyšin ma wot 1. nowembra měsačnje 103 200 eurow za zaměstnjenje 200 Ukrainjanow w Sprjewinym hotelu nałožować: 52 500 za podruž a něhdźe 50 700 eurow za wobhospodarjenje. To je krajny rada Udo Witschas (CDU) na naprašowanje wokrjesneho radźićela Steffena Lehmanna (AfD) wotmołwił. Wudawki su přichada dale a wjac młodych Ukrainjanow dla trěbne.
Musical wo Nicholasu Wintonje
Krótkopowěsće (29.10.25)
Drews prawo na rewiziju dóstał
Karlsruhe. Zwjazkowe sudnistwo je skóržbje jednaćela firmy Hentschke Bau Jörga Drewsa přećiwo wusudej Drježdźanskeho wyšeho krajneho sudnistwa přihłosowało. Z tym je rewizija jednanja mjez Zjednoćenstwom přesćěhanych nacistiskeho režima – Zwjazk antifašistow w Sakskej a firmu móžna. Hłownje chce Drews, zo žurnalistiski tekst z wuprajenjemi nastupajo jeho prawicarske zmyslenje šmórnu.
Stabilna, ale nadal wohrožena
Choćebuz. Delnjoserbska kultura „wostanje stabilna“. To praji nowa zakładna studija Serbskeho instituta, kotruž staj Daniel Häfner a Carsten Schürmann wčera w Choćebuzu předstajiłoj. Mjez druhim zwěsćitaj awtoraj „stabilnu ličbu čłonstwa w serbskich towarstwach a wopytowarjow serbskich kemšow“. Tež „zajim za serbske poskitki w digitalnym swěće přiběra“. Toho njehladajo a „najebać wuspěšne rěčne kursy steji delnjoserbšćina dale sylnje pod ćišćom“.
Předewzaće z Rakec mytowali
