Krótkopowěsće (20.02.25)
Prawicarjo w šuli policije
Drježdźany. W druhej połojcy zašłeho lěta, je so zapósłanča Lěwicy w Sakskim krajnym sejmje Juliane Nagel, za ličbu padow z prawicarskim podhladom w sakskej policiji naprašowała. Nětko je nutřkowne ministerstwo Swobodneho stata zdźěliło, zo je w tutej dobje 20 tajkich było. Hač na wuwzaći su wšitke pady we wokolinje Wysokeje šule sakskeje policije (FH) we łužiskim Rózborku zwěsćili.
Nowe warianty sakskeho dialekta
Lipsk. W interviewje hladajo na jutřiši dźeń maćeršćiny zwěsća Lipšćanski rěčny wědomostnik Simon Oppermann, zo so sakski dialekt njepozhubi, ale po jeho měnjenju skerje přeměnja. Wosebje mjez młodostnymi dožiwja změnu wot zakładneje formy k nowym wariantam dialekta. Tež socialne medije, w kotrychž je dialekt přiběracy trend, maja wliw na to.
Nócny spektakl na njebju
Krótkopowěsće (19.02.25)
Aktualna Silly-tura so přetorhnje
Drježdźany. Rockowa band Silly dyrbi swoju „elektroakustisku turu“ chorosće dla přetorhnyć. Šěsć planowanych koncertow, mjez nimi w Drježdźanach, Podstupimje, Budyšinje, Šwikawje a Hof, přepołoža na hinaše terminy. Wšitke tikety wostanu płaćiwe a narunanske terminy so bórze wozjewja, čłonojo hudźbneje skupiny připowědźa.
Poskitk słuchoknihi
Lipsk/Budyšin. Serija „Dolina při rěce“ njeje wjace jenož w ćišćanej formje přistupna. Zajimcy móža sej ju nětko tež jako słuchoknihu naposkać. Prěnjej knize stej na internetnej stronje veles-verlag.de w mp3-formaće zapřijatej. Gabriela Šmajdźina čita tekst na žiwe wašnje. Słuchokniha hodźi so za starobu wot štyrjoch lět. Syman Handrik je za tutón projekt rjanu, cunju hudźbu skomponował.
Walentinski eksperiment
Krótkopowěsće (18.02.25)
Dojednanje wo hrodźišću
Wětošow. Konflikt mjez městom a wobhospodarjom słowjanskeho hrodźišća w Radušu Davidom Chmélikom (SN rozprawjachu) je zakónčeny, kaž nam měšćanosta Bengt Kanzler wobkrući: Měšćanska rada je wčera wječor wužiwanske zrěčenje podlěšiła. Tež dołhodobne zrěčenje po herbskotwarskim prawje je přihotowane. Zo by dale inwestować móhł, zniži město Chmélikej dań.
Sudniske jednanje skomdźił
Budyšin. Budyske hamtske sudnistwo je wčera přećiwo kandidatej towarstwa Łužiskeje Aliancy za wólby 2. Serbskeho sejma Marcej Sturmej zajeće a přepytowansku jatbu wukazało. Sturm njeběše na sudniskim jednanju wotpohladneho jězdźenja bjez jězbneje dowolnosće dla přitomny a so tež zamołwił njeje. Do toho běchu zastojnicy policije na wukaz sudnika podarmo spytali, wobskorženeho doma nadeńć.
Kedźbu na lodźe!
Krótkopowěsće (17.02.25)
Wuspěšna sezona skónčena
Budyšin. Z předstajenjom wječorneho ptačokwasneho programa „Lubosć na žołmach“ w Slepom je Serbski ludowy ansambl wčera nawječor swoju lětušu sezonu zakónčił. Na dohromady dźesać předstajenjach po cyłej Łužicy je na wšěch 1 500 přihladowarjow přichwatało. Wosom předstajenjow bě wupředatych. Tež program za dźěći „Tajny pakćik“ bu sobotu w Budyšinje posledni króć předstajeny.
Wjace dźěći schorje na gripu
Berlin. Ličba chutnje na influency schorjenych dźěći je wot spočatka lěta drastisce stupała. Spočatk februara su w němskich chorownjach pjeć króć wjace dźěći z ćežkej gripu lěkować dyrbjeli, hač spočatk januara. To zdźěli Němska towaršnosć za pediatrisku infekciologiju (DGPI). Wosebje potrjechene su dźěći w starobje pjeć do wosom lět.
Mjenje pjenjez za festiwal
Krótkopowěsće (14.02.25)
Přizjewjenska doba so skónči
Drježdźany. Towarstwa, zwjazki a institucije maja jenož hišće hač do 1. měrca chwile, so za Dźeń Saksow a z tym zwisowace spěchowanske srědki w projektnym běrowje w Sebnitzu přizjewić a požadać. Dźeń Saksow wotměje so lětsa wot 5. do 7. septembra. Po zakónčenju přizjewjenskeje doby njemóža organizatorojo hižo próstwy wo spěchowanje wobkedźbować. Formulary su na wotpowědnej internetnej stronje wozjewjene.
Pomocnikow nadpadnyli
Budyšin. W Budyšinje je zawčerawšim skupina šěsć wosobow wólbnych pomocnikow Lěwicy nadpadnyła. Pomocnicy běchu informaciske stejnišćo strony posłužowali. Po słowach Lěwicy běchu skućićeljo z prawicarskeje sceny. Policija nětko pad přepytuje. W běhu wólbneho boja je w Sakskej wospjet k nadpadam na wólbnych pomocnikow Lěwicy dóšło.
Němske firmy profituja
Krótkopowěsće (13.02.25)
Awto do skupiny ludźi zrazyło
Mnichow. Wosrjedź Mnichowa je dźensa awto do skupiny ludźi zajěło. Kaž policija zdźěli, su so wjacori při tym zranili, někotři z nich ćežko. Pječa su tež dźěći mjez zranjenymi. Pomocnicy su ze sylnymi mocami na městnje njezboža. Šofera wosoboweho awta su zajeli. Po informacijach rozhłosa steješe na Mnichowskim Stiglmaierowym naměsće skupina stawkowacych. Hač bě šofer wotpohladnje do ludźi zajěł, njewědźa.
Powětr tuchwilu jara špatny
Budyšin. Tež w našim regionje je po datach zwjazkoweho wobswětoweho zarjada powětr tuchwilu jara hubjeny. Wčera su w Budyšinje přerěznje 36 mikrogramow najstrašnišeho drobneho próška na kubikny meter naměrili, w Niskej 44 a w Zhorjelcu 55. Swětowa strowotniska organizacija poruča jako maksimum 5 mikrogramow. Tele dny pobrachuje wuměna powětra w delnich worštach.
Film z wuchodoněmskej temu
Krótkopowěsće (12.02.25)
Narodniny woswjećili
Wojerecy. Wuchowanska straža we Wojerecach je wčera swoje 10lětne wobstaće woswjećiła. Z wjace hač 172 000 zasadźenjemi wob lěto wuchowanska centrala wuchodna Sakska zamołwiće słužbu za ludźi w nuzowych połoženjach wukonja, wuzběhny nawoda centrale Stefan Schumann na wčerawšim swjedźenskim zarjadowanju.
We Łužicy chcedźa stawkować
Budyšin. Dźěłarnistwo verdi namołwja tele dny k stawkam přistajenych zjawneje słužby. Tomu sćěhuja sobudźěłaćerjo měšćanskich zarjadnistwow w Budyšinje, Běłej Wodźe a Niskeje hdźež chcedźa zajutřišim stawkować. Verdi žada sej w aktualnych tarifowych jednanjach za přistajenych Zwjazka a komunow mjez druhim wosom procentow wjace mzdy, znajmjeńša měło to 350 eurow wob měsac być.
Ekstremisća ludźi mobilizuja
Krótkopowěsće (11.02.25)
Přichod schadowanki zaručeny
Choćebuz. Schadowanka wotměje so lětsa 29. nowembra w kofejowni Delnjoserbskeho gymnazija, poslednju sobotu do adwenta, kaž bě to do časa korona-pandemije z wašnjom. Wčera je w Choćebuskim Serbskim domje 20 ludźi wo přichodźe zarjadowanja wuradźowało, mjez nimi awtorojo čitarskich listow po lońšej schadowance. Załožba trjeba podpěru a pyta team, kotryž wjeršk organizuje.
Zasadźa so za regulaciju
Drježdźany. Hladajo na dale a wjac wjelkow w Sakskej chce so nowe sakske knježerstwo za regulaciju zasadźeć. Tole je nětko sakski minister za ratarstwo a wobswět Georg-Ludwig von Breitenbuch (CDU) připowědźił. Zaměr je, w Sakskej regionalnje přiměrjeny wjelči management zmóžnić. Po cyłej Sakskej je tuchwilu 43 wobkrućenych wjelčich teritorijow.
Bratstwo podpěra iniciatiwu
Krótkopowěsće (10.02.25)
Nowa redaktorka časopisa
Budyšin. Redaktorka časopisa ewangelskich Serbow Pomhaj Bóh Trudla Malinkowa swoju zamołwitosć po 25 lětach kónc lěta woteda. Nowa redaktorka Katja Meyerowa, ewangelska Serbowka a studowana, inženjerka pochadźa ze Sćijec a bydli hižo wjele lět ze swójbu w Münsteru. Dotal je w časopisu prawidłownje za dźěći pisała. Wona wjeseli so na nowy nadawk, kotryž budźe hłownje z Münstera wukonjeć. Jónu wob měsac přebyła wšak prawidłownje we Łužicy.
Dźewjeć koncertow planowali
Budyšin. Za komorny hudźbny swjedźeń, kotryž wotměje so lětsa wot 15. do 21. awgusta, su dźewjeć koncertow na hrodach a w cyrkwjach na wuchodźe Sakskeje planowali. Tak přijědźe mjez druhim bračist Nils Mönkemeyer, lawreat myta Grammy Bobby McFerrin abo kwartet Grundmann do Łužicy.
Widejowa hra dobywa swět
Krótkopowěsće (07.02.25)
Brigada zwučuje za koncerty
Hejnicy. Chór 1. serbskeje kulturneje brigady přebywa wot wčerawšeho do njedźele na jubilejnym 20. chórowym lěhwje w Hejnicach. Tam nazwučuja spěwy za koncert 17. meje w Malešecach a 18. meje w Husce we wobłuku Serbskeho ewangelskeho cyrkwinskeho dnja. Zajutřišim wobrubi chór njedźelniše kemše w hnadownej cyrkwi Marije domapytanja.
Wowčer wostanje předsyda
Róžant. Skupina CDU Ralbicy-Róžant je wčera swoju sobustawsku zhromadźiznu w Róžeńće wotměła. Nimo rozprawow wo dźěle strony stejachu wosebje nowowólby předsydstwa na dnjowym porjedźe. Přitomni čłonojo wuzwolichu dotalneho předsydu Alojsa Wowčera znowa do zastojnstwa. W swojej dźaknej narěči Wowčer wuspěšne dźěło skupiny minjenych lět wuzběhny.
Wo městno so požadać
