Krótkopowěsće (07.02.25)
Brigada zwučuje za koncerty
Hejnicy. Chór 1. serbskeje kulturneje brigady přebywa wot wčerawšeho do njedźele na jubilejnym 20. chórowym lěhwje w Hejnicach. Tam nazwučuja spěwy za koncert 17. meje w Malešecach a 18. meje w Husce we wobłuku Serbskeho ewangelskeho cyrkwinskeho dnja. Zajutřišim wobrubi chór njedźelniše kemše w hnadownej cyrkwi Marije domapytanja.
Wowčer wostanje předsyda
Róžant. Skupina CDU Ralbicy-Róžant je wčera swoju sobustawsku zhromadźiznu w Róžeńće wotměła. Nimo rozprawow wo dźěle strony stejachu wosebje nowowólby předsydstwa na dnjowym porjedźe. Přitomni čłonojo wuzwolichu dotalneho předsydu Alojsa Wowčera znowa do zastojnstwa. W swojej dźaknej narěči Wowčer wuspěšne dźěło skupiny minjenych lět wuzběhny.
Wo městno so požadać
Krótkopowěsće (06.02.25)
Andreas Ošika njeboh
Budyšin. Andreas Ošika, jednaćel Serbskeho šulskeho towarstwa (SŠT), je wčera w starobje 46 lět njejapcy wumrěł. Předsydku SŠT Katharinu Jurkowu je powěsć šokowała, zo bu Ošika, „přeco přewšu měru angažowany, wjesoły a wšěm wotewrjeny čłowjek“, tak „nahle ze wšědneho dnja torhnjeny“. Sobudźěłaćerjo SŠT a druhich institucijow w Serbskim domje su jeho dźensa w nutrnosći wopominali.
„Wjesołe póndźele“ pokročuja
Budyšin. Dohromady wjace hač 50 towarstwow, iniciatiwow a cyłkow towaršnostneje a cyrkwinskeje zjawnosće chcedźa tež lětsa kulturne zarjadowanja we wobłuku akcije „Happy monday Bautzen – Wjesoła póndźela Budyšin“ wuhotować. Wone maja so wot 24. februara na Budyskich naměstach wotměć.
Potrjecheni pruwuja skóržbu
Krótkopowěsće (05.02.25)
Twarja bórze dźěle za pancery
Zhorjelc. Zwjazkowy kancler Olaf Scholz (SPD) je dźensa ze sakskim ministerskim prezidentom Michaelom Kretschmerom (CDU) w Zhorjelcu oficialnje wozjewił, zo so tamniša twornja Alstom brónjenskemu koncernej KNDS předa. W Zhorjelskim zawodźe Alstom dźěła 700 ludźi. Tam chcedźa w přichodźe dźěle za pancery zhotowić.
Dwójnemu etatej přizwoliła
Budyšin. Sakska krajna direkcija je dwójnemu etatej za lěće 2025 a 2026 Budyskeho wokrjesa přizwoliła. Předwidźanym kreditam a inwesticijam je direkcija pod wěstymi wuměnjenjemi přihłosowała. Cyłkowny wolumen wučinja lětsa něhdźe 680 milionow eurow, klětu budźe to 703 milionow eurow. Lětsa drje hodźi so etat z rezerwami wurunać. Klětu pak je deficit, čehoždla dyrbi Budyski wokrjes strukturny koncept zdźěłać.
Němske wotpadki w Čěskej
Krótkopowěsće (04.02.25)
Wobšěrny program předstajili
Kamjenc. Składnostnje měšćanskeho jubileja „800 lět Kamjenc“ je lětsa wobšěrny program předwidźany. Wčera su organizatorojo programowy zešiwk za swjedźenski kónc tydźenja w meji předstajili. Na štyrjoch jewišćach w měsće su zarjadowanja tež ze serbskim podźělom planowane. Mjez druhim tam Popsorben, Holaski, Horjany abo rejowanskej skupinje Smjerdźaca a Wudwor wustupja.
Forum wědy 10 milionow dróši
Budyšin. Serbski forum wědy na Lawskim arealu, nowe stejnišćo Serbskeho instituta a Serbskeho muzeja, budźe město spočatnje planowanych 44,5 milionow něhdźe 55 milionow eurow płaćić. Tutu sumu nam direktor Załožby za serbski lud Jan Budar wobkrući. Zo bychu dale na wulkoprojekće dźěłać móhli, ma sakske ministerstwo za infrastrukturu a wuwiće kraja kóštam přizwolić.
Program Lěwicy tež serbsce
Krótkopowěsće (03.02.25)
Wjace ludźi bjez dźěła
Budyšin. Ličba bjezdźěłnych w Hornjej Łužicy je minjeny měsac na wjac hač 21 000 stupała. To je nimale šěsć procentow wjace hač měsac do toho. Nawodnica Budyskeje dźěłoweje agentury Marion Richter pokaza na sezonalne přičiny. Wot wjedra wotwisne branše maja zymsku přestawku. Kwota bjezdźěłnych w Budyskim wokrjesu wučinja 7,7 procentow.
Zemjerženje južnje Drježdźan
Drježdźany. Južnje Drježdźan je so zawčerawšim, sobotu, w 9.12 hodź. zemja třasła, zdźěli sakske ministerstwo za wobswět. Zemjerženje měješe na skali sylnosć 2,6 a bě z tym najsylniše minjenych lětdźesatkow. Fachowcy lokalizowachu epicentrum mjez Drježdźanami a Pirnu blisko Łobja. Wjele wobydlerjow třasenje zemje jasnje pytny.
Migranća trjebaja wjac porady
Krótkopowěsće (31.01.25)
Serbski sejm chce kooperaciju
Budyšin/Berlin. Serbski sejm namołwja Domowinu ke konstruktiwnej kooperaciji město blokady. W zdźělence kritizuje Hajko Kozel, zo sej mjeńšinowa rada, w kotrejž je Domowina zastupjena, wot Zwjazkoweje centrale za politiske kubłanje šmórnjenje Serbskeho sejma z brošurki žada (hlej wčerawše SN). Runja Danam a Frizam měli tež Serbja z dalšej politiskej organizaciju, Serbskim sejmom, w mjeńšinowej radźe reprezentowani być.
Požadanja wotnětka online
Budyšin. Załožba za serbski lud spožča hižo lěta wukrajnym studowacym stipendije za dźělny studij sorabistiki na Instituće za sorabistiku na Lipšćanskej uniwersiće. 22. januara je załožba požadansku proceduru na online-požadanje přestajiła a wupisanje aktualizowała. Požadanja maja so přeco hač do 1. měrca wotedać.
Bobry spěšniše byli
Krótkopowěsće (30.01.25)
Přiradu do wustawkow zapisali
Budyšin. Na wčerawšim posedźenju Budyskeje měšćanskeje rady wobdźělichu so tež čłonojo dźěłoweho kruha za serbske naležnosće města. To su Judit Šołćina, Susana Hozyna, Benjamin Wirt a Robert Krawc. Nětko bu wutworjenje přirady za serbske naležnosće do wustawkow města zapisane. Dalšich štyrjoch kandidatow přirady chcedźa w februaru wuzwolić.
Caren Lay rozsud kritizuje
Wojerecy. Zapósłanča zwjazkoweho sejma Caren Lay (Lěwica) kritizuje rozsud krajnoradneho zarjada Budyskeho wokrjesa, zo projekt „Partnerstwa za demokratiju“ financielnje njepodpěra. „To demokratiskim strukturam w našim wokrjesu škodźi“, wona podšmórny. Krajneho radu wokrjesa Uda Witschasa (CDU) zapósłanča šwika, dokelž rozsudy z financielnym ćežemi wokrjesa wopodstatni.
Psyče zapřahi so wubědźowali
Krótkopowěsće (29.01.25)
Lěwica: Žane pancery ze Zhorjelca
Zhorjelc. Předsydka frakcije Lěwicy w sakskim krajnym sejmje Susanne Schaper so kritisce hladajo na móžnu produkciju pancerow w Zhorjelcu wupraja. Brónjenski koncern KNDS chce tamnišu twornju Alstom přewzać. „Chcemy wěste a dobre dźěłowe městna w industriji. Tola nic w zwisku z wobrónjenjom“, Schaper zwurazni. Přichodny tydźeń zwjazkowy kancler Olaf Scholz (SPD) twornju wopyta.
Nowy poskitk šulerjam
Hórnikecy. Budyska dualna wysoka šula, Budyske energijowe a wodowe zawody EWB kaž tež Hórnikečanska energijowa fabrika su poskitk šulerjam wot 8. lětnika hač do sekundarneho schodźenka II přihotowali. Pod hesłom „Energijowe dny“ skića młodostnym móžnosć, so ze strukturnej změnu we Łužicy rozestajeć a sej powołanske wobłuki w energijowym hospodarstwje wotkryć. Terminy su w februaru, juniju a oktobrje.
Pytaja społnomócnjenu
Krótkopowěsće (28.01.25)
Koncern so na přichod hotuje
Choćebuz. Dohladowanska rada a hłowne zhromadźizny předewzaća Łužiska energija a milinarnje (LEAG) su wčera kurs změny koncerna wobkrućili a nowu strukturu wobzamknyli. LEAG so strategisce znowa wusměri a chce kupcam naslědne energijowe móžnosće poskićić a zastaransku wěstotu zaručić. Brunica změje dale wulki podźěl na tym.
Kak dale ze serbskej rjadownju?
Radwor. K druhemu razej su so zastupjerjo gmejny, Domowiny, staršich, pěstowarnjow a šulow wčera schadźowali, zo bychu wo přichodźe serbskich rjadownjow w Radworju wuradźowali. W přichodnym šulskim lěće wočakuja sylny 1. lětnik, tak zo zda so serbska rjadownja zaručena być. Wot 2026/27 budźe zaso wužadanje, serbsku rjadownju najebać mału ličbu šulskich nowačkow zaručić.
Zajim za Ukrainu woteběra
Krótkopowěsće (27.01.25)
Namołwa: Serbski sejm wolić!
Budyšin. Serbski sejm chce srjedu nimo ćežišćow kubłanskeho koncepta a naćiskow statneho zrěčenja tež namołwu někotrych Serbow předstajić, kotřiž k 2. wólbam Serbskeho sejma namołwjeja. Z přeprošenjom su zdobom lisćinu prěnich podpěraćelow šěrili. Prěni mjenowany, předewzaćel Tomaš Rječka, je nam wobkrućił, zo namołwu podpěruje a budźe srjedu tež přitomny. Mjez 22 mjenami su dale Marko Suchy, Ludmila Budarjowa, dr. Christiana Piniekowa, Róža Domašcyna, Benedikt Dyrlich, Maja Nagelowa, dr. Grit Lemke, Alexander Pólk, Wolfgang Kraus, Hanka Jenčec, Hella Stoleccyc, Lutz Hillmann, Reiner Nagel, Pawoł Rota, dr. Měrćin Wałda, Alfons Wićaz, dr. Viktor Zakar, dr. Peter Kroh, Jens Zahrodnik, dr. Pětr Wjacławk a Matthias Körner.
Wusud na dobro labela LABA
