Krótkopowěsće (19.01.17)
W Sakskej wjace insolwencow
Drježdźany. W Sakskej je loni ličba plajtow předewzaćow přiběrała, hinak hač po wšej Němskej. Kaž hospodarska naprašowarnja Bürgel zdźěla, je 1 099 firmow insolwencu přizjewiło, to je 6,7 procentow wjace hač lěto do toho. Z 73 plajtami na 1 000 předewzaćow leži Sakska snadnje nad cyłoněmskim přerězkom. Po wšej Němskej je ličba plajtow wo 6,2 procentaj woteběrała.
Nóc chětro zymna była
Lipsk. Minjena nóc bě w Sakskej, Saksko-Anhaltskej a Durinskej chětro zymna. Najsylniši zmjerzk w Sakskej naměrichu z minus 19,2 stopnjomaj w Deutschneudorfje, informuje Němska wjedrarnja w Lipsku. W Bad Elsteru bě minus 18,6 a w durinskim Veilsdorfje minus 16,8 stopnjow zyma. Tež přichodne dny nas zmjerzki dale přewodźeja.
Wódne ptaki ličili
Praha. Kaž stajnje druhi kónc tydźenja w januaru je tež lětsa wjace hač 400 profesionalnych a amaterskich ornitologow wódne ptaki w Čěskej ličiło. Na tradicionalnej akciji wobdźělichu so tež škitarjo přirody a skawća. Za ličenje ptačiny w Europje je runje januarski čas idealny, dokelž so ptaki we wulkich mnóstwach hromadźa.
Krótkopowěsće (18.01.17)
24. september namjetowany
Berlin. Zwjazkowe knježerstwo CDU/CSU a SPD namjetuje 24. september jako termin wólbow zwjazkoweho sejma. Kabinet je dźensa wotpowědny naćisk nutřkowneho ministra Thomasa de Maizièreho (CDU) schwalił. Formelnje pak rozsudźi wo tym zwjazkowy prezident Joachim Gauck. Powšitkownje wočakuja, zo wón namjet knježerstwa sćěhuje.
Wulkoracija přećiwo cwólbje
Drježdźany. Z wulkoraciju je 600 policistow dźensa přećiwo mjezynarodnej cwólbje paduchow a potajerjow postupowało. Při tym přepytachu 31 objektow w Drježdźanach, Lipsku a Halle. 15 Vietnamjanow a Georgičanow su zajeli. Woni běchu předewšěm žiwidła kradnyli, kotrež Vietnamjenjo w swojich wobchodach dale předawachu.
Greenpeace šwika koncern
Krótkopowěsće (17.01.17)
Wothłosuja wo stawku
Zhorjelc. Dźěłarnistwo IG metal je dźensa swojich čłonow w Zhorjelskej tworni wagonotwarca Bombardier namołwiło, wo stawku wothłosować. Bombardier chcył produkciju přerjadować a tójšto ludźi pušćić. Rozmołwa hospodarskeho ministra Sigmara Gabriela (SPD) z koncernom njebě wuspěšna. Wuslědk wothłosowanja wočakowachu wječor.
Wukony młodych wuzběhnył
Drježdźany. Sakski ministerski prezident Stanisław Tilich (CDU) je wukony młodych angažowanych sportowcow, hudźbnikow a wědomostnikow w Sakskej wuzběhnył. „Wy chceće so dale wuwić, to trjebamy“, rjekny Tilich wčera na nowolětnym přijeću w Drježdźanach-Hellerauwje. Mjez 800 přitomnymi běchu młodostni, kotřiž su so wuspěšnje na wubědźowanjach wobdźělili.
Kemše tež w esperanto
Krótkopowěsće (16.01.17)
Za atraktiwne wjesne žra
Drježdźany. Sakske statne ministerstwo za wobswět a ratarstwo je dźensa druhu namołwu programa „witalne wjesne žra a srjedźišća“ zahajiło. Tak móža gmejny nětko zaso wo spěchowanske srědki prosyć. Zaměr je wjesne kónčiny zesylnić. Tak móža próstwarjo srědki za saněrowanje abo wottorhanje twarjenjow runje tak zasadźić kaž za wutworjenje atraktiwnych wjesnych žrow.
Wo reformje rěčeli
Podstupim. Braniborski ministerski prezident Dietmar Woidke (SPD) je dźensa w Podstupimje z kritikarjemi dwělomneje wokrjesneje reformy rěčał. Tež Choćebuski wyši měšćanosta Holger Kelch (CDU) reformu kategorisce wotpokazuje. W běhu zetkanja wšak njeje k žanomu rozrisanju dóšło.
Industrija z dobytkom
Kamjenc. Sakske industrijne předewzaća su loni po předležacej bilancy dobytk nadźěłali. Tole wozjewi dźensa krajny statistiski zarjad ze sydłom w Kamjencu. Tak je cyłkowny wobrot wot januara do oktobra wo 0,9 procentow na 47,7 miliardow eurow rozrostł. Produkcija jězdźidłow a jězdźidłowych dźělow pak registrowaše wulke straty.
Krótkopowěsće (13.01.17)
Mjenje wopytowarjow přišło
Drježdźany. Lěta 2016 je mjenje wopytowarjow do sakskich muzejow přišło. Statne wuměłske zběrki Drježdźany mějachu dźewjeć procentow mjenje hosći, Kamjeničanski statny muzej za archeologiju dwaceći procentow a Lipšćanski muzej tworjaceho wuměłstwa samo štwórćinu mjenje. To zdźěla sakske ministerstwo za wuměłstwo w Drježdźanach.
Wjace wukrajnikow w Čěskej
Praha. Po wuličenju Čěskeho statistiskeho zarjada přebywa w Čěskej republice tuchwilu telko wukrajnikow kaž hišće ženje. W nowembru 2016 bě jich 495 000 wosobow (4,5 procentow wobydlerstwa kraja). Mjez nimi přewažuja Słowacy, Ukrainjenjo a Vietnamjenjo. Najwjetši podźěl cuzych statnych přisłušnikow zwěsćichu w Praze (14 procentow), najmjeńši we wokrjesu Opava (jedyn procent).
LEAG wostanje sponsor FCE
Krótkopowěsće (12.01.17)
Kopańce w sydlenskim rumje
Podstupim. Gmejna Kopańce (Neuhausen) přisłuša serbskemu sydlenskemu rumej. To je hłowny wuběrk Krajneho sejma Braniborskeje na swojim wčerawšim posedźenju wobzamknył. Přirjadowanje Carneho Gozda (Schwarzheide) a Šejkowa (Schipkau) pak wuběrkownicy wotpozakachu. Wo dalšich 16 próstwach njejsu hišće rozsudźili.
Wobchad sněha dla haćeny był
Lipsk. W Sakskej, Saksko-Anhaltskej a Durinskej bě nadróžny wobchad minjenu nóc sněha a zalodźenych dróhow dla haćeny. W Kamjenicy a wokolinje zličichu 93 wobchadnych njezbožow ze 168 wobdźělenymi jězdźidłami. Tež we wuchodnej Sakskej dóńdźe k wjacorym njezbožam. Wokoło Zhorjelca su někotre awta z hładkeho puća do přirowa zjěli.
Wojerski konwoj we Łužicy
Wochozy. Konwoj armeje USA je wčera na Wochožanske wojerske zwučowanišćo dojěł. Něhdźe 40 wojakow tam zaměstnichu a zastarachu, kaž Zwjazkowa wobora zdźěla. Dźensa chcychu do Pólskeje jěć. Wojacy su dźěl 4 000 wojakow sylneje jednotki wójska USA, kotrež je tuchwilu po puću z Bremerhavena do srjedźneje a wuchodneje Europy.
Krótkopowěsće (11.01.17)
Internat ma praktikanta
Choćebuz. Vincent Lukas skutkuje wotnětka w internaće Delnjoserbskeho gymnazija Choćebuz jako praktikant. Młodźenc je w druhim wukubłanskim lěće na kubłarja. Jako bywši šuler gymnazija měješe wón dobre wuměnjenja za wupisane městno. Žadanej běštej dwurěčnosć a zajim, w serbskich institucijach skutkować chcyć.
Wadźa so wojakow USA dla
Podstupim. Zaměr USA, swoje wojerske jednotki do srjedźneje a wuchodneje Europy přepołožić, je w Braniborskej protesty a raznu politisku debatu zbudźił. Zastupnicy Lěwicy a AfD šwikaja akciju jako „wójnsku hrožacu politiku“. Rěčnicy CDU transport wojakow porno tomu zakituja. Ministerski prezident Dietmar Woidke (SPD) bě debatu z kritiskimi wuprajenjemi wo wojakach nastorčił.
Hendricks: Wjelki njetřěleć
Krótkopowěsće (10.01.17)
Roman Herzog njeboh
Berlin. Bywši zwjazkowy prezident Roman Herzog je 82lětny zemrěł, kaž zwjazkowy prezidialny zarjad powěsćerni dpa w Berlinje zdźěla. Herzog steješe wot lěta 1994 hač do 1998 na čole Zwjazkoweje republiki. Politikar CDU zasadźeše so njesprócniwje za reformy w kraju a politikarjow a bě wobydlerjow w tym zmysle stajnje zaso pohonjował.
Legida hižo njedemonstruje
Lipsk. Organizatorojo hibanja Legida su připowědźili, zo demonstracije přećiwo wukrajnikam přichodnje hižo na dróze njewotměwaja. Najebać to chcedźa so dale schadźować, informowaše wčera sobuorganizator Arndt Hohnstädter. Wčera na poslednjej demonstraciji zličichu něhdźe 400 wobdźělnikow.
Žane wětrniki ptakow dla
Modrava. Hižo šěsć lět prócuje so čěski miliardar Daniel Křetínský wo dowolnosć, twarić 18 milinowych wětrnikow pola Modravy we wuchodnym dźělu Rudnych horin. Nětko je krajny zarjad w Ústíju nad Labem plan doskónčnje wotpokazał: Wětrniki móhli žadne družiny ptakow wohrozyć, mjez druhim brězana (Birkhahn) a bakuta (Schnepfe).
Haas poražku poćerpjeł
Krótkopowěsće (09.01.17)
Rěča dźěłowych městnow dla
Berlin. Planowany wottwar dźěłowych městnow we wuchodoněmskich wotnožkach wagonotwarca Bombardier bě hłowna tema rozmołwy w ministerstwje za hospodarstwo w Berlinje. Na nju wočakowaše minister Sigmar Gabriel braniborskeho ministerskeho prezidenta Dietmara Woidku (wobaj SPD), sakskeho premiera Stanisława Tilicha (CDU) a šefa Bombardiera Laurenta Trogera.
Woidke: Reformu njewotprajimy
Podstupim. Braniborski ministerski prezident Dietmar Woidke (SPD) chcył hladajo na planowanu wokrjesnu reformu w nuzy lud rozsudźić dać. „Reformu njewotprajimy“, rjekny wón nowinarjam w Podstupimje. Wo nadrobnosćach pak móhło so hišće rěčeć, wón zwurazni.
Němscy sektěrarjo do Čěskeje
Krótkopowěsće (06.01.17)
Za stejnišćo w Budyšinje
Drježdźany. Sakski społnomócnjeny za podłožki stasi Lutz Rathenow nochce swój zarjad pomjeńšić. Rozmysluje samo wo tym, w Budyšinje dalše stejnišćo wotewrěć, kaž rjekny wón dźensa sćelakej MDR. Tak móhli ludźo w bjezposrědnjej wokolinje do swojich aktow hladać. W Budyšinje móhł sej Rathenow tež serbskorěčne poradźowanje předstajić.
Wjac skóržbow dóšło
Drježdźany/Budyšin. Na sakskich zarjadniskich sudnistwach, mjez druhim w Budyšinje, je nimale 6 400 skóržbow přećiwo wotpokazanju próstwow wo azyl dóšło. Tole zdźěli dźensa sakski justicny minister Sebastian Gemkow (CDU) w Drježdźanach. Ličba skóržbow je porno tamnym lětam jasnje wjetša.
Dźiwje swinje wosrjedź města
Ústí nad Labem. Magistrat w sewjeročěskim Ústíju nad Labem pyta za móžnosćemi, ličbu přewjele dźiwich swini pomjeńšić. Wone přebywaja mjeztym tež hižo w měšćanskich parkach a samo we wobydlenych štwórćach města. Hońtwjerjo su nětko namołwjeni je třěleć – za kóžde w měsće zatřělene dźiwje swinjo dóstanu pjenježne myto.
Z běłym lacom do finala
